15
Jesus ioar Suhkoahn Wain Mehlelwa
1 “Ngoah ma suhkoahn wain mehlelwa, a Joamoaiho jounmwoaswelwa.
2 Rahk ohroj ma johkin mine wah, Joamoaiho kin pakkahjang. Ih kin kamwosmwosihdi rahk ohroj ma kin kajalehda wah, pwa irai en pel dirla wah.
3 Kamwai ne mwakelkelkihda padahk kan ma Ngoah ne padahkihoang kamwai.
4 Kamwai oauwoang Ngoahi, a Ngoah pel pirin oauwoang kamwai. Ma kamwai joah poaddoang Ngoahi, kamwai johkak uhwa, doahroar rahn suhkoa pas pel johkak uhwa, ma ih joah poaddoang in palwoaroan suhkoahu.
5 “Ngoah ma suhkoahn wainwa, a rah kan kamwai. Ma emen ma poaddoang Ngoahi, a Ngoah oang ih, pirin uhdahn dir wah; pwa kamwai johkak wia mehkij ma joah Ngoahi.
6 Emen ma joah poaddoang Ngoahi pirin doahroar rahn suhkoa pas ma kerpwihekla mengla. Joangoan rah pwiai pirin kihekpene apel kerpwiheklahng nehn oai, wija ma irai pirin jirepla.
7 Ma kamwai oauwoang Ngoahi, a Oai mahjan kan kin oauwoang kamwai, doari, kamwai pirin poaki mehkij ma kamwai anahne, uhdahn pirin pwoaihoang kamwai.
8 Ling in Joamoaiho pirin janjalda, ma kamwai pirin uhwahda dir, a ioar doahroar me amwai pirin wiahla Noai sohnpadahk.
9 Ngoah ipwilki kamwai, doahroar Jahm ipwilki Ngoahi; kamwai minmine nehn Oai limpoak.
10 Ma kamwai pirin kapwaihahda Oai kojonned kan, kamwai pirin minmine nehn Oai limpoak, doahroar Oai kin kapwaihahda en Joamoaiho koajoandi, apel minmine nehn Ah limpoak.
11 “Ngoah ne padahkihoang kamwai mehpwiai pwa Oai peren en mine ipamwai, a amwai peren en unjekla.
12 Oai kojonned oang kamwai: kamwai en ipwilpene nehn pwungamwai kan, doahroar Oai kin ipwilki kamwai.
13 Limpoak wa keiou koalik ma emen anki oang ah pirien kan, ioar ih en mihndahkihla ah mour ki irai.
14 Kamwai ioar oai pirien, ma kamwai kin wia dahkij Ngoah padahkihoang kamwai.
15 Ngoah johla pirin panginki kamwai lidu, pwa lidu johkin kidal dahkij ah koaun kin wia. A Ngoah pirin panginki kamwai pirien, pwa Ngoah ne padahkihoang kamwai joang ohroj ma Ngoah ne rongjang ipen Joamoaiho.
16 Jaudi kamwai ma pilda Ngoahi, a Ngoah ma pilda kamwai. Ngoah ma pilda kamwai pwa kamwai en alwe kaparahda wah dir, joangoan wah kan ma mwehu johkak ohla. Doari, Jahmmo pirin kioang kamwai meohroj ma kamwai pirin poaki Ipoa in Oadoaihoa.
17 Doari, me Oai kojonned: kamwai en ipwilpene nehn pwungamwai kan.”
Kalioas in Jampah
18 “Ma jampah kin lioassoang kamwai, kamwai en lemleme pwa ih lioassoang Ngoahi mwohn ah lioassoang kamwai.
19 Ma kamwai kijehn jampah oauwe (a kamwai pwen jaudi), doari, jampah oauwe pirin ipwilki kamwai doahroar ah kin ipwilki nah kan. A Ngoah pilda kamwai jang nehn jampah; doari, jaudi kamwai kijehn jampah. Ioar kahrpoan en jampah ah kin lioassoang kamwai.
20 Kamwai lemleme dahkij Ngoah ne pwehng kamwai: ‘Joh lidu men kin laplap jang ah koaun.’ Ma irai ne koalkoa Ngoahi, irai pel pirin koalkoa kamwai. Ma irai kapwaihahda oai padahk kan, irai pel pirin kapwaihahda amwai padahk kan.
21 Irai pirin wiahioang kamwai mehpwiai ohroj pwa Noai kamwai, pwa irai jehjoa Ih ma kadardo Ngoahi.
22 Nen pwen joh diparai, ma Ngoah joah indoa padahkkoang irai; a apkas irai ne johla kak akpwungki diparai kan.
23 Emen ma lioassoang Ngoahi, ih pel lioassoang Joamoaiho.
24 Ma Ngoah joah wiahda joangoan doadoahk kan ma joh emen wia mwohn mijarai, nen joh diparai; a apkas irai ne kapang oai wihwia kan, doari irai ken lioassoang Ngoahi apel Joamoaiho.
25 Ioar kahrpoan mehpwiai ahr wiawi, pwa dahkij ma ne insingdi nehn arai Kojonned en pwoaida: ‘Irai lioassoang Ngoahi, in joh kahrpoa.’
26 “A Jounjauwaj pirin indoa, ioar Ngen mehlello, ma indoa jang ipen Jahm. Ngoah pirin kadardo Ih jang ipen Jahmmo, ioar Ih pirin kadehde doahroar Ngoahi.
27 A kamwai pel pirin kadehdehda doahroar Ngoahi, pwa kamwai ne pwilpwili Ngoahi jang in sapinno.