17
Jesus Kapkapki Nah Sohnpadahkkok
1 Nehn Jesus Ah pwahla mehpwiai, Ih ken jipwoaldahlahng nehnloannge, pwa, “Joamoai, Oai anjoau ne lel. Kalingihla Nihmw mene, pwa Nihmw mene en pel kalingihla Koawoa.
2 Pwa Koah kioang Nihmw mene manman in koaun armaj ohroj, pwa en kak kioang mour joahsuk irai ohroj ma Kooah kioang Ngoahi.
3 A mour joahsuk woahwoahki en kidalla Koawoa, pwa Koawoahr Koahs mehlelwa, apel kidalla Jesus Christ ma Koah ne kadardo.
4 Ngoah ne kajalehda Oamw ling nehn jampah; apel Ngoah ne kadoarihla doadoahk kan ma Koah ne kioang Ngoahi en wia.
5 Maing Joamoai! Kalingihda Ngoahi mwohn Mijoammwen anjoau oauwe, kalingihkihda Ngoahi linngohr ma Ngoah ne anki nehn Oai minmine Ipoamw mwohn jampah oauwe ah kahjikkoar wiawihda.
6 “Ngoah ne kajalehda Koawoa ipen armajjok ma Koah kioang Ngoahi nehn jampah. Irai nihmw, a Koah kioang Ngoahi irai, irai ne kapwaihahda Oamw lal.
7 A apkas irai ne kidal pwa mehkan ohroj ma Koah ne kihdoahng Ngoahi pel indoahjang ipoamw.
8 Pwa Ngoah ne kioang irai padahk kan ma Koah kioang Ngoahi, a irai ne oaloahda. Irai ne kidal pwa ioar me mehlelwa: ma Ngoah indoa jang ipoamw, a irai kamehlele pwa Koah ma kadardo Ngoahi.
9 “Ngoah kin kapkapki irai. Ngoah joah kapkapki jampah, a irai kan ma Koah kioang Ngoahi, pwa irai ioar nihmw.
10 Meohroj ma Oai ioar Oamw; a meohroj ma Oamw ioar Oai; a Oai ling janjalda nehn irai.
11 Apkas Ngoah pirin allaluhwoang Ipoamw. Ngoah johla pirin minmine jampah; a irai pirin minminehr nehn jampah. Maing Joamoai ma Joaroawi! Nekidki irai oadoammwen ma manman, addo ma Koah ne kihdoahng Ngoahi, pwa irai en wiahla oau doahroar asa kin wia oau.
12 Nehn Oai minmine iparai, Ngoah ne jiloahkihdi irai oadoammwen ma manman, addo ma Koah kihdoahng Ngoahi. Ngoah ne apwali irai, a joh emen nehn pwungarai ma kak joaloangla; ioarroar ih ma ne kileldi en joaloangla, pwa lal in Puk Joaroawi en pwoaida.
13 A apkas Ngoah pirin allaluhwoang Ipoamw, a Ngoah ne pwahla mehpwiai nehn jampah, pwa irai en kak anki Oai peren nehn mohngiongirai kan, in unjek mehlel.
14 Ngoah ne kioang irai Oamw lal, a jampah ne lioassoangkihda irai pwa irai jaudi kijehn jampah, doahroar Ngoah ma jaudi kijehn jampah.
15 Ngoah joah poaki Ipoamw pwa Koah en kihjang irai nehn jampah, a pwa Koah en poaroahjang irai me Naunahu.
16 Doahroar Ngoah ma jaudi kijehn jampah, pel ioar doahroar irai jaudi kijehn jampah.
17 Kajarwihkihla irai me mehlello; Oamw lal ioar ma mehlel.
18 Ngoah ne kadarla irai nehn jampah, doahroar Oamw kadardo Ngoah nehn jampah.
19 A ki irai, Ngoah kajarwihkihoang Koawoa pein Ngoahi, pwa irai en pel kajarwihoang Koawoa.
20 “Ngoah joah kapkapki irai kalahpwuk, pwa pel irai kan ma pirin pwojon Ngoahi ki arai padahk.
21 Ngoah kapkap pwa irai ohroj en wiahla oau. Maing Joamoai! Irai en wiahla oau Ipasa, doahroar Oamw mine Ipoai, a Ngoahi Ipoamw. Irai en wiahla oau, pwa jampah en kamehlele pwa Koah ma kadardo Ngoahi.
22 Ngoah ne kioang irai linngohr ma Koah ne kihdoahng Ngoahi, pwa irai en wiahla oau, doahroar Asa wia oau:
23 Ngoah iparai a Koah Ipoai, pwa irai en uhdahn wiahla oau, pwa jampah oauwe en kidal pwa Koah ma kadardo Ngoahi, a Koah ipwilki irai doahroar Oamw ipwilki Ngoahi.
24 “Maing Joamoai! Koah ne kihdoahng Ngoahi irai, a Ngoah anahne irai en pwili Ngoahi mine wijahu ma Ngoah pirin mine, pwa irai en kak kapang Oai ling, linngo ma Koah ne kihdoahng Ngoahi ki Oamw ipwilki Ngoahi mwohn jampah oauwe ah kahjikkoar wiawihda.
25 Joamoai, Koah ma Pwung! Jampah oauwe jehjoa Koawoa, a Ngoah ma kidal Koawoa, a irai pwiai ne kidal pwa Koah ma kadardo Ngoahi.
26 Ngoah ma kahrehioang irai en kidalla Koawoa, a Ngoah pel pirin doaudoaulahr pwa limpoakko ma Koah ne wiahng Ngoahi en pel mine iparai, a Ngoah en pel kak mine iparai.”