5
Jesus Kasihkeida Woal Men Ipen Pil Oau
1 Mwerin mehpwiai, joaroawi laplap oau in mihn Jew ken wiawi, Jesus ken indahlahng Jerusalem.
2 Doari, nehn Jerusalem ipen Wanihmwin Jihpw, mine loapin pil oau ma palang limoau pidekihpene, ma adanki Bethzatha in lal in Hebrew.
3 Ma johmwehu dir kin minmine nehn palang pwiai, min majkun, min dangpel, apel min mwoasor. [Irai kin joujowi pwa pillo en mwoakidda.
4 Pwa epwi anjoau sohnloang in Koaunno kin indihdohng in loapin pillo pwa en kamwoakidihda. Doari, nehn anjoauwo ma loapin pillo kin mwoakidda, emen ma pispisla loaloa oh mijoa, ioar ih ma pirin mwehula jang joangoan johmwehuwo ma ih anki.]
5 Woal men mine wijahu, ma johjohmwehuki johnpar jilihjek waluh.
6 Nehn Jesus ah kapangda woallo apel kidalda pwa ih minminehki wijahu anjoau roairoai, Ih ken pwehnglahng, “Koah joah nimen sihkeida?”
7 Woal johmwehuwo japoang, “Maing, joh noai armaj men ma pirin wahdihwehng ngoahi nehn loapin pillo nehn anjoauwo ma ih kin mwoakidda. Pwa nehn oai kin allaluhdihwe, emen kin mijoahla ngoahi.”
8 Jesus pwehng ih, “Uhda, oaloa kioammwen, alu.”
9 Nehn anjoauwohr woallo sihkeida, ih ken pwoakda kiahu inla.
Me wiawi rehnin Sabbath oau.
10 Mihn Jew-ok pwehng woallo ma mwehula, “Rehnnoauwe rehnin Sabbath, kin uhwoang asai Kojonned koah en wa kioammwen.”
11 Ih japoangki irai, “Woal ma kasihkeida ngoahi ma pwehng ngoahi, ‘Oaloa kioammwen, alu.’ ”
12 Irai kalelpoak, “Inje Ih ma pwehng koah en oaloa kioammwen alu?”
13 A woal mwehulahu jehjoa inje Ih, pwa wijahu ne pokonla, apel Jesus ne inlahjang wijahu.
14 A doahr mwerin anjoaukij, Jesus pel kapangda woallo nehn Umw Joarwiho, Ih pwehng ih, “Kapang, koah ne mwehuda, koah joah pwuroahng dihp, pwa me naunahjang me nen lelloang koawoa.”
15 Woallo ken inla pwehng mihn Jew-ok pwa Jesus ma kemwehuwihla ih.
16 Ioar kahrpoa oauwe ma kahrehda mihn Jew-ok irai sapda nimen koalkoa Jesus, pwa Ah kemwehuwihla woallo in rehnin Sabbath.
17 Doari, Jesus ken japoangkihlahng irai, “Joamoaiho kin doadoahk anjoau ohroj, doari Ngoah pel uhdahn doadoahk.”
18 Ioar lal oauwe ma kahrehioang mihn Jew-ok irai engdehnkihoang irai en kojukdi Jesus, jaudi pwa ah koauwehla kojonned in Sabbath, apel ki Ah pwa ma Jamahwa Koahs, apel kapahrakkihoang Ih Koahs.
Manman in Nihn Koahsso
19 Jesus ken pwehnglahng irai, “Ngoah pwehng kamwai in mehlel: Nahu johkak wia mehkij in pein Ih, pwa me Ih kin kapang ma Jahmmo kin wia, ioarroar mehkoa Ih kin wia. Pwa da ma Jahmmo kin wia, ioar ma Nahu pel kin wia.
20 Pwa Jahmmo ah kin ipwilki Nahu, Ih kin kajalehioang meohroj ma pein ih kin wihwia. Doari, Ih pirin kajalehioang Ih wihwia kan ma koalikjang me; a kamwai ohroj nen pwuriamweikihla.
21 Pwa doahroar en Jahmmo Ah kin kapwohrihda min mehdi kan, apel kioang irai mour, pel doahroar en Nahu pel kin kioang mour irai kan ma Ih kin pwungki.
22 Pel joh emen ma Jahmmo kin kadeikda, pwa Ih ne kioang Nahu manman unjek en kadeik;
23 pwa armaj ohroj en woaunki Nahu doahroar arai pel woaunki Jahmmo. Ma emen ma joah woaunki Nahu, Ih pel joah woaunki Jahmmo ma kadardo Nahu.
24 “Ngoah pwehng kamwai in mehlel: ma emen ma kin rong Oai padahk apel pwojon Ih ma kadardo Ngoahi, ioar ih ma anki mour joahsuk. Ih johpwa pirin lelloang kadeik, pwa ih ne injang mehdi lelloang mour.
25 Ngoah pwehng kamwai in mehlel: anjoau oau pirin indoa — doari, ne lel — ma mehdi kan pirin rongda ngilen Nihn Koahsso, apel irai kan ma rongda pirin mourda.
26 Pwa doahroar Jahmmo ma sapin mour, pel doahroar Ah kioang Nahu en pel wia sapin mour.
27 Apel Ih ne kioang Nahu manman pwa en wia kadeik, pwa Ih Nihn-Armaj.
28 Kamwai joah pwuriamweiki mehpwiai, pwa anjoau oau pirin indoa ma irai ohroj ma mine nehn joaujoau kan pirin rong ngiloa,
29 apel irai pirin diljang nehn arai joaujoau kan. A irai kan ma wihwia mwehu pirin iejdahng mour, a irai kan ma wihwia nauna pirin iejdahng koaloklok.”
Kadehde oang Jesus
30 “Ngoah johkak en wia mehkij in pein oai koajoandi. Pwa Ngoah kin wia kadeik in mwomwen en Koahs kin pwehng Ngoahi. Doari, Oai kadeik kin pwung pwa Ngoah johkin rapahki pein injenoai, Ah kupwuren Ih ma kadardo Ngoahi.
31 “Ma Ngoah pirin kadehde mwomwen pein Ngoahi, mehkan ma Ngoah pwa jehpirin uhdahn wia mihn kadehde mehlel.
32 A mine emen ma kin kadehde Ngoahi, apel Ngoah kidal pwa dahkij Ih kin sikoahki Ngoahi pwen mehlel.
33 Kamwai ne kadarlahng John nihmwai sohnpakairrok, ih ne kadehdehda doahroar me mehlello.
34 Jaudi pwa Ngoah en uhdahn anki kadehdehn armaj; Ngoah pwa mehpwiai pwa kamwai en mourkihla.
35 John doahroar lahm oau ma kin okkokkok apel marmaram, apel kamwai kin nimen perenki ah maram anjoau kij.
36 A mine Oai kadehde ma koalikjang kadehde kan ma John ne wiahda: Pwa mehkan ma Ngoah kin wihwia, ioar doadoahkkok ma Joamoaiho kin mweidoahng Ngoahi en wia, mehpwiai ioar oai kadehde ma kin kajalehda pwa Jahmmo ma kadardo Ngoahi.
37 Apel Joamoaiho ma kadardo Ngoahi, pein Ih pel kadehdehda mwomwen Ngoahi. Kamwai kahjik rong ngiloa, apel kapang mijoa,
38 apel Ah lal kan johpwa kin minmine nehn loaloamwai kan, pwa kamwai joah pwojon Ih ma Ih kadardo.
39 Kamwai kin sukuhlki Puk Joaroawi pwa kamwai lemleme pwa kamwai pirin diar mour joahsuk jang loaloa. A Puk Joaroawi kin kadehde doahroar Ngoahi!
40 A kamwai kia indoahng ipoai pwa kamwai en anki mour.
41 “Ngoah joah rapahki kaping jang ipen armaj kan.
42 A Ngoah kidal kamwai, Ngoah kidal pwa joh amwai limpoak oang Koahs nehn mohngiongimwai kan.
43 Ngoah indoahki in manman in Joamoaiho, a kamwai johpwa kajamwo Ngoahi. A nehn en emen ah kin indoahki in pein oadoa, kamwai kin kajamwo.
44 Kamwai kin anahne oaloa kaping jang emenemen kamwai. A kamwai joah jong in rapahki kaping jang Ih ma kalahpwuk ioar Koahs. Doari, ia mwomwen amwai en kak kamehlele Ngoahi?
45 Kamwai joah lemleme pwa Ngoah pirin kadipoa kamwai ipen Jahmmo. Mine emen ma pirin kadipoa kamwai, ioar ih Moses, ma kamwai kin koapwoarpwoarki.
46 Ma kamwai uhdahn kamehlele Moses, kamwai pel pirin kamehlele Ngoahi, pwa Moses insingehdi mwomwen Ngoahi.
47 Apwa amwai joah kamehlele ah lal kan, imdoahr amwai en kak kamehlele Oai padahk kan?”