20
Peidekki doahr Manman in Jesus
1 Oau rehn ehn en Jesus Ah wihwia Ah padahk oang armaj kan nehn Umw Joarwiho apel kapkapahrakki Rongmwehu, jamwrou laplappok apel jounpadahk in Kojonneddok, pwilihkihla koaun pwi indoa ipoa,
2 pwehng Ih, “Pwehng kamai, en inje manman ma koawoa wiahki mehpwiai? Ke inje ma kioang koawoa manman en wia joang pwiai?”
3 Jesus japoang, “Ngoahi nimen idoak ipamwai mehkij. Kamwai pwehng Ngoahi.
4 Ma en John jounpoapdaij ah manman in poapdaij injang ipen Koahs ke ipen armaj?”
5 Irai sapda akpwungpene nehn pwungarai, “Da kisai en pwa? Ma kisai pwa, ‘Sapjang ipen Koahs,’ a Ih nen pwehng kisai, ‘A da kamwai joah kamehlelehki John?’
6 A ma kisai pwa, ‘Sapjang armaj,’ pokon oauwe pirin kasoahki kisai sakai pwa irai kin wiahki John joukohp men.”
7 Irai japoangki Jesus, “Kamai jehjoa pwa ia wija ah manman in poapdaij injang.”
8 Jesus pwehng irai, “A, ngoahi pel jehpirin pwehng kamwai, en inje manman ma Ngoahi wihwiahki mehpwiai.”
Karajraj in Jounmwoaswel pwi nehn Mwoaswelin Wain
9 Jesus pwehng pokonno karajraj pase: “Woal men koadoahkoahda mwoaswelin wain oau, ih kioang jounmwoaswel pwi irai en kouwahki. A ih jeiloakla likin anjoau roairoai.
10 Ne lel anjoau in doddol wehn wainnok, ih kadarla lidu men ipen jounmwoaswellok pwa en oaloa ah pwaij jang nehn ah mwoaswello. Jounmwoaswellok pokihla liduhwo apel kadarla ih johpwa kioang mehkij.
11 Ih pel pwuroahng kadarla emen nah liduhwok; a jounmwoaswellok pel pokihla, kamehkihda ih kadarla johpwa kioang mehkij.
12 Woallo pel kadarla kajilmen in nah lidu. Jounmwoaswellok pel koauwehla ih, kerpwihla likin.
13 Doari, woallo ma anki mwoaswel in wainno ken lemleme, ‘Da ngoahi en wia? Ngoahi pirin kadarla noai jermwein kajampwallo pwa irai nen uhdahn woaunki!’
14 A nehn en jounmwoaswellok kapangda jermweinno, irai pwahpene nehn pwungarai, ‘Ioar nihn woallo jermwein wa me. Kisai kojukdi pwa kisai en ankihla mwoaswelin wainne,’
15 Irai ken kerpwihla ih jang nehn mwoaswello, kojukdi ih.”
Jesus pwa, “Dahkij koaun in mwoaswel in wainno nen wiahng jounmwoaswellok?
16 Ih pirin pein inla pwa en kojukdi jounmwoaswellok, ih kioang epwi jounmwoaswel sohrohr mwoaswelin wainno.”
Nehn armajjok ahr rongda mehpwiai, ihr pwa, “Me johkak wiawi!”
17 Jesus jipwoallahng irai, idoak, “A ia woahwoahn lal in Puk Joarwi oauwe?
‘Sakai ma jounkou umw kan ne kerpwihla pwa johkaspoa,
a wud wiahla sakai wa ma keiou kajampwal?’
18 “A, emen ma kipdihoang pohn sakaiho pirin ohla, a emen ma sakaiho kipdihoang pohn ih, nen mwisdi.”
Peidek in Dupuk Daksis
19 Jounpadahk in Kojonneddok apel jamwrou laplappok raprapahki mehkij irai en joalihkihdi Jesus anjoau pispis, pwa irai kidal pwa ih karajraj ki irai; a irai mijik armajjok.
20 Ioar mehwa irai kapkapangki anjoau mwehu, pwa irai en dupukla armaj pwi kadarla en lidipihki Jesus peidek pwi, pwa irai en kihlahng Ih pehn manman in koapinahn Rome.
21 Irai pwiai idoak ipen Jesus, “Maing Jounpadahk, kamai kidal pwa oamw lal kan apel padahk kan pwen inenin pwung, pwa koawoa johkin injinohki mwomwen armaj, pwa kupwur en Koahs oang armaj ioar ma koawoa kin injinohki padahki.
22 Pwehng kamai, ma uhwoang kojonned pwa kamai en dupuk daksis oang Caesar in Rome ke joah?”
23 Jesus kidal ahr widing, Ih pwehng irai,
24 “Kajalehioang Ngoahi oau mwani silperren! Mijen inje apel oadoan inje ma mine puwoa?”
A irai japoang, “Caesar.”
25 Jesus pwehng irai, “Doari, dupukkoang Caesar dahkij ma en Caesar, a dupukkoang Koahs dahkij ma en Koahs.”
26 Irai johkak kajapwunge Ih in mehkij mwohn pokonno, irai ken nennenla, pwuriamweikihla Ah pajpoanngok.
Peidek doahr Iejda
27 Sadducee pwi indoa ipen Jesus. Irai kin pwa armaj mehdi kan jehpirin mourda jang mehdi. Irai idoak ipen Jesus,
28 “Maing Jounpadahk, Moses koajoandi oang kamai kojonned oauwe; ma woal men mehdi jang pahioahu joh nihra jeri, a rien woallo en painkihla liohdiho pwa ira en kapwaihahioang riahu ma mehdi nah jeri.
29 A, doari, riarihoau mine, woal ijimen; riarai woal koalikko painkihda lihmen, a ih mehdihjang, joh nah jeri.
30 “Woal karoahmenno pel painkihda liohdiho pel joh jeri;
31 kajilmen in riariho pel wiahda pel doahroar joanngohr wiawihoang ohroj irai ijimenno, irai mehdi jang pahioaraiho ohroj joh nihrai jeri.
32 Mwerin liho pel mehdi.
33 A doari, nehn rehnno ma armaj iejda, inje ma pirin pahien liho? Pwa irai ijimenno ohroj painkihda liho.”
34 Jesus japoang, “Woal apel lihkan nehn jampah kin pwoapwoaud,
35 a woal apel lihkan ma warroang iejda jang mehdi mourki mourin mweiho ma pirin indoa, irai johkin pwoapwoaud.
36 Pwa irai ne doahroarla sohnloang kan ma ne johla kak mehdi. Irai ioar nihn Koahs, pwa irai ne iejda jang mehdi.
37 Moses pel kadehdehda in mehlel doahroar en ihr mehdi kan ahr pirin iejda. Pwa nehn sikesik in suhkoa umpwumpwullo, Moses kahdanki Koaunno ‘Koahs in Abraham, Koahs in Isaac, Koahs in Jacob.’
38 Ih ioar Koahs in ihr ma mour jaudi Koahs in ihr ma mehdi, pwa armaj ohroj kin mour oang Ih.”
39 Epwi jounpadahk in Kojonneddok pwehng Jesus, “Maing Jounpadahk oamw pajpoang pwung!”
40 Pwa irai johla nimen peidek oang Ih.
Peidek doahroar Messiah
41 Jesus pwehng irai, “Imdoahr amwai kak pwa Messiah nihn David?
42 Pwa pein David pwahla nehn Pukin Psalm kan:
‘Koaunno pwehng oai koaun;
Koawoa en mwindi oang in loap moaun in Ngoahi,
43 Oaroh Ngoahi en wiahkihla oamw imwinsihsi kan loangin pehn pwoalkoamwen kan.’
44 “A, ma David panginki ah ‘Koaun,’ a imdoahr Messiah Ah kak wia nihn David?”
Jesus Kainoapwihdi armajjok jang Jounpadahk in Kojonneddok
45 Nehn en armaj ohroj rongrong, Jesus pwehng nah sohnpadahkkok:
46 “Kamwai kalke kamwai jang jounpadahk in Kojonned kan ma kin mwehuki mine nehn likkoau roairoai, aluhjili mwohn armaj kan, kin nimen armaj kan en rahnmwahuwi irai nehn pokon kan, kin pilda dohiarai in mijoa nehn jinakoke kan, kin mwehuki moangehda sehpil kan nehn kamdipw kan,
47 ma kin kihjang liohdi kan ahr meohroj, a kin nimen kapkap roairoai! Arai koaloklok uhdahn pirin koalik mehlel!”