10
En Jesus Padahk doahr Mweipijoang in Pwoapwoaud
1 Jesus injang wijahu, inlahng wein Judea, inla oaloap Pillap Jordan. Armaj dir pel pwuroahng pokondohng ipoa, Ih padahk oang ihr doahr Ih kin kalap wia.
2 Pharisee pwi indoa ipoa pwa irai en jong lidipihdi Ih. Irai idoak, “Padahkihoang kamai ma asai Kojonneddo mweidoahng woal men en mweijang pahioa?”
3 A Ih japoang, wud pwehng irai, “Dahkij Moses koajoanehdi oang kamwai?”
4 A arai pajpoangwa pwa, “Moses koajoanehdi kijilikoau in kamweid en wiawi, a woal men kak mweijang pahioahu.”
5 Jesus pwehng irai, “Moses insingehdi kojonned oauwe oang kamwai, pwa jang in amwai nohn koapsakai.
6 Puk Joarwi pwa, jang in sapin kawa, ‘Koahs wiahda armaj woal apel li.’
7 ‘Jang in kahrpoahioauwe woal men pirin mweijang jamah apel inah ih pasoahng pahioahu, ara roahmenne paspene wiahla oau.’
8 Ara ne johla wia roahmen a emennoar.
9 Doari, joh armaj men en kamweidpijoang da ma Koahs ne kapsahpene.”
10 Nehn ahr dilda nehn ummwo, Nah sohnpadahkkok idoak ipoa irair oauwe.
11 Ih pwehng irai, “Ma woalmen pirin mweijang pahioa, painkihla emen li sohrohr, ih wiahda dipen kamwahl.
12 Pel doahroar ma lihmen pirin mweijang pahioa apel painkihla emen woal sohrohr, ih pel kamwahl.”
Jesus Kapaiahda Jeri siksik pwi
13 Armaj pwi wahdohng Jesus jeri pwi pwa en kihdahng poah pohrai; sohnpadahkkok ken lipwoarehda armajjok.
14 Nehn en Jesus kidal da me, Ih lioas pwehnglahng sohnpadahkkok, “Mweidoahng jerihkan en indoa ipoai. Kamwai joah iroahdi irai; pwa wein Koahs ioar wein joangoan armaj pwiai.
15 Ngoahi pwehng kamwai in mehlel, pwa emen ma jehpirin oaloa Wein Koahs doahroar jeri siksik men, ih johkak dilda loaloa.”
16 Ih ken oaloa jerihok, kihda poahk pohn emenemen Ih kapwaihahda irai.
Mwahnkapw Koapwoahpwoa men
17 Jesus onnonop pwa en wia jeiloak oau, a mwahnkapw men kijoudo ipoa, poadpwomwla mwohn Ih pwehng Ih, “Jounpadahk Mwehu, da ngoahi en wia pwa ngoahi en kak oaloa mour joahsuk?”
18 Jesus pwehng ih, “Amwda koawoa ke panginki Ngoahi jounpadahk mwehu? Joh emen ma mwehu, Koahs oar doari.
19 Koawoa kidal kojonneddok: ‘Joah kojukdi armaj; joah kamwahl; joah pirap; joah likamw; joah kapweipwei armaj; woaunki joamoamw apel inoamw.’ ”
20 Mwahnkappwo japoang Ih, “Maing oai jounpadahk, jang oh in oai siksik ngoahi ne kapwaihahda mehpwiai ohroj.”
21 Jesus ipwilkihda ih, pwehng ih, “Mehkij oar luhwoa, alwe noaskihla meohroj ma koawoa anki, kioang dupkoa kan armaj joamwoahmwoa kan, oamw pai nehnloannge nen koalikla; indoa pwilihla Ngoahi.”
22 Nehn en mwahnkappwo rong lal pwiai, ih injinjuwedla, ken allaluhla. Pwa woal koapwoahpwoa men ih.
23 Jesus jipwoalwehng Nah sohnpadahkkok pwehng irai, “Ia apwal in armaj koapwoahpwoa en dilda nehn Wein Koahs!”
24 Sohnpadahkkok pwuriamweikihla sikesik pwiai. A Jesus uhjehlahr pel pwa, “Noai jeri, kamwai en kidal doahr apwal in dilda nehn Wein Koahs.
25 Apwal oang armaj koapwoahpwoa men en dilda nehn wein Koahs jang kamel men en dilda nehn pwokin si pas.”
26 Sohnpadahkkok pel pwuriamweila dauluhl ki me, irai pwahpene nehn pwungarai, “Doari, a inje kak mourla?”
27 Jesus jipwoallahng irai, ih pwa, “Me johkak ipen armaj, a ipen Koahs ih kak; pwa ipen Koahs meohroj kak pwoaida.”
28 Peter pwehnglahng Jesus, “Maing, kamai ne kihdi joang ohroj pwa kamai en pwilihla koawoa.”
29 Jesus pwehng irai, “Eh! Ngoahi pwehng kamwai in mehlel, pwa ma emen ma pirin mweidla umwah, riah, inah, jamah, nah jeri, japwah kan, ki Ngoahi apel Rongmwehuwo,
30 pirin oaloa koalik jang nehn mour in di oauwe. Ih pirin oaloa pak epwiki in umwah, in riah, in inah, in nah, in japwah kan — apel in loklok kan. A nehn mour ma pirin indoa, ih pirin oaloa mour joahsuk.
31 Armaj dir anjoau oauwe kin mine mijoa, irai pirin mwerinla, a armaj dir ma kin mine mwerin, irai pirin mijoahla.”
Kajiluh in en Jesus Kohpda doahr Ah pirin Loklok apel Mehdi
32 Jesus apel Nah sohnpadahkkok allaluhla nehn allo indahlahng Jerusalem, Ih aluhla mijen Nah sohnpadahkkok; a irai ma kauj ih allalu dirkihla majpwehk. Ih pel pwuroahng kalahpwukla ipen irai eijek roahmenno pwehng irai da ma pirin wiawihoang Ih,
33 “Kamwai kidal pwa kisai allaluhdahlahng Jerusalem, wijahwa ma Nihn‑Armaj pirin likliklahng ipen jamwrou laplap apel jounpadahk in Kojonned kan. Irai pirin kadeikda Ih pwa Ih en kojkojdi. Irai pirin kihlahng Ih ipen mihn likin kan.
34 Ih pirin wiahla mihn kapis iparai; irai pirin andipoa, poki, apel kojukdi Ih. A in rehn kajiluh Ih pirin iejda.”
En James apel John Poakpoak
35 Nihn Zebedee jermwein roahmen, James apel John, ara indoa ipen Jesus pwehng, “Maing Jounpadahk, mine mehkij kama nimen koawoa en wiahng kama.”
36 Jesus idoak ipara, “A dahkij, kamwa nimen Ngoahi en wiahng kamwa?”
37 Ara pwehng Ih, “Kama nimen koawoa en kihdoahng kama lingin oamw wei nehn anjoauwo ma koawoa pirin Nahmwarkihla, apel mweidoahng pwa kama en kak mwindi ipoamw, emen loap moaun in koawoa, a emen loap meing.”
38 Jesus pwehng ara, “Kamwa jehjoa pwa dahkij kamwa poakpoakien. Kamwa kak nim mwoakin loklokko ma Ngoahi pirin nim? Kamwa kak poapdaijkihla poapdaijjo ma Ngoahi pirin poapdaijki?”
39 Ara pwehng Ih, “Eh kama kak.”
Jesus pwehng ara, “Doari, ne mwehu; Kamwa pirin nim mwoakko ma Ngoahi pirin nim apel poapdaijki poapdaijjo ma Ngoahi pirin poapdaijki.
40 A mwindi loap moaunin apel loap meingin, joah mweimwei oang Ngoahi en pilda; pwa Koahs ma pirin kioang irai kan ma Ih koaunopdahng.”
41 Nehn en sohnpadahk eijekko ahr rongda poakpoak oauwe, irai lioassoangkihda James apel John.
42 Jesus ken panginpene irai pwehng, “Kamwai kidal doahroar armaj laplap in nehn rosros kan, doahroar ahr kin kolkol sihkei manman in koaunda armaj rosros kan, apel koaun kan kin anki manman ohroj.
43 A ih jehpirin doahr me ipamwai. Inje ma nimen laplap ioar ih pirin papah ohroj;
44 A inje ma nimen keiou ioar ih pirin wiahla nihn ohroj lidu.
45 Pwa pel Nihn‑Armaj indihdo, jaudi pwa armaj en papah, a Ih en papah armaj ohroj apel mihndahkihla Ah mour pwa en koamoaurla armaj dihrdir.”
Jesus Kemwehuwihla Woal Majkun men
46 Irai lel Jericho; a nehn en Jesus apel Nah sohnpadahkkok apel pokon koalik oau diljang nehn kahnihmmwo, woal majkun joamwoahmwoa men, oadoa Bartimaeus, nihn Timaeus, mwindi imwin allo mehlahn poakpoak.
47 Nehn ah rongda pwa Jesus mihn Nazareth ioar allaluhla, ih sapda rahrahu pwa, “Maing Jesus, kijehn kadaudok in David, jeuweje ngoahi!”
48 Dirin ihr lipwoarehda pwa en nennenla. Ih kapwa kakoalikihla ah rahrahu, pwahpwahpwa, “Koawoa ma kijehn kadaudok in David, jeuweje ngoahi.”
49 Jesus uhdi pwa, “Kamwai ukdohng Ngoahi.”
Irai pwehng woallo, “Koawoa, injenmwahula! Uhda! Ih pangpangin koawoa.”
50 Ih pispisinnoar kejpwihdi ah joakiddo, uhda inla ipen Jesus.
51 Jesus idoak oang ih, “Da koawoa mwehuki Ngoahi en wiahng koawoa?”
A woal majkunno japoang, “Maing, ngoahi nimen pwuroahng kapang wija.”
52 Jesus pwehng ih, “Alwe; oamw pwojonnen ne kemwehuwihla koawoa.” Nehn anjoauwohr ih kapangda wija; ih ken pwilihla Jesus nehn allo.