13
Karajraj in Jounkamwoaroa
1 Rehnnohr Jesus injang in ummwo Ih indihla in oaroahrin jeddo, wijahu ma Ih mwindi pwa en wia ah padahk.
2 Pokonin armaj koalikkoau pidekihpene Ih. Ih ken doaudahng nehn pohs pas, mwindi, a pokonno uhda pohn oaroahrin jeddo.
3 Ih doadoahkki karajraj pwa en pwehng irai me dihrdir.
“Armaj men mine ma inlahng kamwroa ah liporrohk.
4 Doari, nehn ah kamwkamwroa ah liporrohk, epwi mwoardi oang nehn al siksik in nehn mwoaswello, mahnsang pwi sangdo kangjang.
5 Epwi liporro kipdi nehn wija sakaikai ma pwirejjo poadpoad. Liporrohk pispisin koapda pwa pwirejjo poadpoad.
6 A anjoauwo ma joauwo dakda, suhkoahk pispisinnoar mengla pwa koalohraiok johpwa lel nehn wija loal.
7 Epwi liporrohk kipdi nehn pwungen suhkoa soaksoak. A suhkoa soaksoakkok koapda kajasihkeihla irai.
8 A epwi liporrohk kipdi nehn pwirej mwehu uhwahda, epwi min epwiki, epwi weneijek, a epwi jilihjek.
9 “Armaj men ma mine sioa mihn rongrong, a ih en rong.”
Kahrpoan Karajrajjok
10 Nah sohnpadahkkok indoa ipen Jesus idoakkoang Ih, “Amwda koawoa ke kin doadoahkki karajraj nehn oamw kin lalloang armaj kan?”
11 A Jesus japoang irai, “Kamwai ne mweimweioang en woahwoahkihla me rir in Wein nehnloannge, a irai joah.
12 Pwa armaj men ma anki mehkij, ekij nen pel aluhwoang, pwa ih en anki koalikjang. A oang ih ma joh ah mehkij, dahkij ma mine ipoa nen pel kihekjang.
13 Ioar kahrehda Ngoahi kin padahk oang irai in karajraj, pwa armaj kin kapang da Ngoahi wia, a irai johkin soahk, irai rong da ngoahi kin pwa, a irai johpwa nimen rong ke woahwoahki.
14 Me ioar kokohp in Isaiah, pwoaida iparai ma pwa:
‘Kamwai pirin rongrongrong, a johpwa woahwoahki;
kamwai pirin kapkapang a joah dehdehki.
15 Pwa mohngiongin armaj pwiai ne koapsakaila,
siarai kan pongpongla,
a irai moairpene,
pwa mijarai kan en joah kapang,
a siarai kan johkak rong,
a mohngiongirai johkak woahwoahki,
a irai johkak okdekdohng Ngoahi
pwa Ngoahi en kemwehuwihla irai.’
16 “A kamwai, meid pai kamwai ma mijamwaikan kak kapang, apel siamwaikan kak rong.
17 Ngoahi en kadehdehng kamwai pwa joukohp dir apel armaj pwung dir nimen kapang da ma kamwai kapkapang apel rong da ma kamwai rongrongrong, a irai johkak.
Jesus Kawoahwoahda Karajraj in Jounkamwoaroawo
18 “Kamwai rong apel padahkihdi woahwoahn karajraj in Jounkamwoaroawo.
19 Irai kan ma rong mahjan in Wein nehnloannge a johkin woahwoahki, irai doahroar liporrohk ma mwoardi pohn allo, Ngen nauna kan indoa jerkihjang dahkij ma ne poaddi nehn mohngiongirai.
20 Liporro ma kin mwoardi oang nehn wija sakai woahwoahki irai kan ma kin rong oaloahda apel perenkihda.
21 A johkin soangdi iparai, ma apwal oau ke kojkoj kin lel irai pwa Mahjanno, a irai kin pispis in lohdi.
22 Liporrohk ma mwoardi oang nehn pwungen suhkoa soaksoakkok doahroar araihok ma rong apel oaloahda Mahjanno, a nen johpwa kos Mahjanno nen johla mine iparai pwa jang in pwunod in jampah apel ipwilki pai in jampah nehn arai mour, kahrehda arai joh kak kihda wahrai.
23 Liporrohk ma koapda nehn pwirej mwehuwo ioar kajalehda mohngiongin iraihok ma rong apel woahwoahkihla Mahjanno, doar uhwahda dir pehn epwi min epwiki, epwi weneijek, a epwi jilihjek.”
Karajraj in Dipwdipw
24 Jesus pwehng irai apas karajraj: “Wein nehnloannge doahroar jounkamwoaroa men ma kamwroahdi ah liporrohk mwehu nehn ah mwoaswello.
25 Oau pwong armaj ohroj moair, ah imwinsihsi indoa kamwroahdi suhkoa dipwdippwi nehn pwungen suhkoahn wihd.
26 Anjoauwo ma suhkoahk sapda koap pwa en uhwa, dipwdippwok pel koapda.
27 Nihn woal nah liduhwok indoa pwehng ih, ‘Maing, jaudi liporro mwehupwi koawoa kamwroahdi nehn oamw mwoaswello? Ia injang dipwdipw pwiai?’
28 Jounmwoaswello pwehng irai, ‘Imwinsihsi men ioar wia men.’ Irai idoak, ‘Kamain inla wijdahjang dipwdippwok?’
29 Ih japoang, ‘Joah, kamwai nen pel koauwehla suhkoa mwehuwok.
30 Mweidoahng ohroj en koapda lel anjoau in doddol. A ngoahi kapwa pwehng joundoddol kan irai en kasohrohr jang dipwdipw kan irai pwidengihla a min mwehu kan irai en kioang nehn oai johkohu.’ ”
Karajraj in Liporrohn Mustard
31 Jesus pwehng irai apas karajraj: “Wein nehnloannge doahroar liporrohn mustard oau poaddi nehn ah mwoaswello.
32 Me ioar liporrohwa ma keiou siksik jang liporro ohroj, a koapda wiahla suhkoahwa keiou koalik nehn mwoaswello, nehn ah ne wiahla suhkoa koalik pas, mahn kan kin sangdo, koammoaldi pohn rah kan.”
Karajraj in Ihs
33 Jesus pwehng irai apas karajraj: “Wein nehnloannge doahroar me: lihmen oaloa ihs kij doaloahkihda pilahwa koalik kij. Pilahwa ohroj ken pwoaida.”
Doahr en Jesus Doadoahkki Karajraj
34 Anjoau ohroj Jesus kin doadoahkki karajraj doahr me oang pokonnok; Ih johkin sikesik oang irai joah doadoahkki karajraj.
35 Me kapwaihahda kokohppo jang joukohppo ma pwa:
“Ngoahi pirin doadoahkki karajraj nehn oai pirin sikesik oang irai.
Ngoahi pirin kajalehng irai joang kan ma johpwa janjal jang anjoauwo jampah wiawihda.”
Jesus Kawoahwoahda Karajraj in Dipwdipw
36 Anjoauwo Jesus injang pokonno, inla dilda nehn ummwoau. Nah sohnpadahkkok sohdo ipoa pwehng Ih, “Maing, kawoahwoahng kamai karajrajin dipwdippwok nehn mwoaswello.”
37 Ih japoang irai, “Woallo ma poadokdi liporro mwehuwo ioar Nihn‑Armaj.
38 Mwoaswello ioar jampah; a liporro mwehuwok ioar armaj ma sohn Weiho; dipwdippwok ioar armaj koa ma nihn Jehsen;
39 a imwinsihsiho ma poadokdi dipwdippwok ioar Jehsen. Anjoau in doddol wehn suhkoahu ioar imwin jampah, a joundoddollok ioar sohnloanngok.
40 Doahroar dipwdippwok kasohrohrla apel jirepla, ioar doahr da pirin wiawi imwin jampah.
41 Nihn‑Armaj, pirin kadarla nah sohnloanngok, pwa en kihpene irai ohroj jang nehn Ah Weiho ma kin kahrehng armaj nehn dihp apel ohroj ma kin wia me nauna kan,
42 irai pirin kerpwihla irai nehn oai pwidenngo, wijahu ma irai pirin joangjoangjoang apel keikeikeisakai.
43 A irai kan ma pwung pirin lingla doahroar joauwo nehn Wein Jamaraiho. Armaj men ma mine sioa, en rong!
Karajrajin Pai Kajampwallo ma Oakkoakla
44 “Wein nehnloannge doahroar me. Woal men kidalda pai kajampwaloau ma oakkoakla nehn japwoau. Nehn ah kidalda, ih pel pwuroahng jaripdi nehn pwirejjo ih ken perenda inla noaskihla ah koapwoa ohroj, ih japahlla dupukda jappwo.
Karajrajin Sakain nehn Pwaihoau
45 “Pel oau, Wein nehnloannge doahroar me. Woal men roaproapoan sakain nehn pwai ling.
46 Nehn ah kidalda oau ma inenin ling, ih noaskihla me ohroj ih anki ih dupukkihda sakaiho.
Karajrajin Nehkko
47 “Pel oau, Wein nehnloannge doahroar me. Nehk in loakjiddoau ma jojohdi nehn jeddo pwa en koldi joangoan mwumw ohroj.
48 Anjoauwo ma nehkko ne dir, irai warahkihdahla poahrinjeddo, mwindi, nehkpijoang mwummwok. Mwumw mwehuwok, irai kioang nehn arai pwukohk, a min naunahk kerpwihekla.
49 Me ioar pirin doahroar imwin jampah. Sohnloanngok pirin indoa kasohrohrihpijoang armaj naunahk jang ipen armaj mwehuwok,
50 kerpwihla armaj naunahk nehn oai pwidenngo, wijahu ma irai pirin joangjoangjoang apel keikeikeisakai.
51 “Kamwai woahwoahki mehpwiak?”
“Eh,” irai japoang, “kamai woahwoahki.”
52 Ih pel pwehng irai, “Jounpadahk in kojonneddo ohroj ma ne wiahla sohnpadahk in Wein nehnloannge, doahroar armaj men ma kihjang nehn ah johkohu me kapw apel me dehn.”
Jesus Johla Kenken Nehn Nazareth
53 Anjoauwo ma Jesus ne doari Ah siksikoahng irai karajrajpwiai, Ih injang wijahu.
54 Ih japahllahng uhdahn Ah wijahu. Nehn Ah padpadahk nehn jinakoke, ohroj ma rong Ih inenin pwuriamweikihla. Irai idoak, “Ia Ih kihjang Ah loalkoang apel manman?
55 Jaudi Ih ioar nihn daiksanngo jermweinwa me? Jaudi Mary ioar Ah nohnohwa, jaudi riah woalkoa James, Joseph, Simon, apel Judas?
56 Jaudi riah lihkan ohroj ma kin pel koaujoan ipasai? Ia Ih kihjang mehpwiak?”
57 Doari, irai ken johla nimen kamehlele Ih.
Jesus pwehng irai, “Joukohp men kin woaun wija ohroj, a jaudi nehn pein ah wija apel nehn ah peneinei.”
58 Doari Ih wia manman jipidpwihoar wijahu pwa jang in irai joah pwojon.