3
John jounpoapdaij Koaunopda Al
Nehn rehn pwiok John jounpoapdaij indoa padpadahk nehn japwsoahn in Judea, ih pwa, “Kamwai koluhla pwa Wein nehnloannge* ne koaroando.” John ioar woalwa ma joukohppa Isaiah pwa:
“Ngilloau ma kin poangpoangpoang nehn japwsoahn:
‘Kamwai koaunopda alin Koaunno,
kamwai kainenehla Ah al kan ma Ih pirin alu loaloa!’ ”
En John likkoauwok wiawihda jang winen kamel, ih kangirki kilin kahu nen lopkoa. Kanah mwinge ioar padda apel jukehn loanglap in nehn woallo. Armaj jang Jerusalem, jang koujapw ohroj nehn wein Judea apel wijahkan ohroj koaroannoang Pillap Jordan indoa pwa, irai en woahkda diparai kan, a ih poapdaijihla irai nehn Pillap Jordan.
A nehn a kapang dirin Pharisee apel Sadducee allaluhdo ipoa pwa en poapdaij, ih pwehng irai, “Kamwai sinekpwi, inje pwehng kamwai pwa kamwai kak pisjang koaloklok in Koahs ma nimenoar lel kamwai? Kamwai wiahda siahk kan ma pirin kajalehda amwai ne koaluhla apel wiliakapwla. Kamwai joah lemleme pwa kamwai nen kak pisjang koaloklok pwa kamwai kadaudokin Abraham. Ngoahi pwehng kamwai pwa Koahs kakkoar wiahda nihn Abraham jeri jang in sakai pwiai! 10 Jiloahu ne onopdahng poaloahdi sipin suhkoa ohroj ma johkin kihda wah mwehu, en poalpoaldi peidekla nehn oaiho. 11 Ngoahi poapdaijihki kamwai pil pwa en kajalehda amwai koluhla, a Ih ma pirin indoa mwerin ngoahi pirin poapdaijihki kamwai Ngen Joarwi apel oai. Ih inenin laplapjang ngoahi; ngoahi johpwa warroang wa Ah sandellok. 12 Ih kol nah poahkko, onopdahng pwa en kasohrohrihpijoang liporrohn wihd kan jang in kilinnok. Ih pirin nekidla wah kan nehn johkohu, a okojla kilinnok nehn oaiho ma johkak kunla.”
En Jesus Poapdaijla
13 Jesus ken injang Galilee inla Pillap Jordan pwa en poapdaijla ipen John. 14 A John jong en kauhdi, pwehng Ih, “Ngoahi anahne koawoa en poapdaiji ngoahi, a koawoa ken indoa ipoai?”
15 Jesus japoang, “Joah kauhdi, pwa ioar koajoandi wa me, pwa ioar ma koanoahng kisa kapwaihahda kupwur en Koahs.” John ken pwungkihla.
16 Jesus ken poapdaijla, Ih doauda jang nehn pillo; anjoauwo nehnloannge risda, Ih kapang Ngenin Koahs indihdo in mwomwen mwurei men jokdi pohn Ih. 17 Ngilloau jang nehnloannge pwa, “Me ioar noai jermwein kajampwalwa, ma Ngoahi keiou ipwilki.”
* 3:2 Wein nehnloannge Mihn Jew kan mehj kin inenin mijikin pwa ke insinge oadoan Koahs, ioar kahrehda Matthew kin insingehdi “Wein nehnloannge” ah mehlelin lal pwiai ioar “wein Koahs”