9
Jesus Kemwehuwihla Woal Mwoasor men
Jesus doaudahng pohn pohsso jeila oaloap jeddo, nehn Ah koaujoanno*. Woalpwi wahdohng Ih woal mwoasor men mine pohn rohp oau. Anjoauwo ma Jesus kapang arai pwojon, Ih pwehng woal mwoasorro, “Koapwoarpwoar, noai jeri! Dipoamw kan ne lapwda.”
A epwi Jounpadahk in kojonneddok ma mine o lemlemehki pwa “Woal mene lahlahwe.”
Jesus kidal arai lamlam, doar Ih ken pwa, “Amwda kamwai ke lamlam nauna nehn mohngiongimwai kan? Ia minno moangoai, Ngoahi en pwa, ‘Dipoamw kan ne lapwda,’ ke, ‘Uhda alu’? A Ngoahi en kamehlele oang kamwai en kidal pwa Nihn‑Armaj anki manmanin mahkoahng dihp pohn jampah.” Ih pwehng woal mwoasorro, “Uhda, oaloa kioammwen koawoa inla nehn umwoammwo.”
Woallo ken uhda inla in umwahu. Nehn en pokonno kapang me irai inenin majpwehkda; irai kapnga Koahs ma kioang armaj joangoan manman oauwo.
Jesus pangin Matthew
En Jesus injang o nehn Ah allaluhla, Ih kapangda woal men, adanki Matthew, jounrik daksis, ma onnonohn nehn ah oahpisso. Jesus pwehng ih, “Pwilihla Ngoahi.”
Doar ih ken uhda pwilihla Ih.
10 Nehn en Jesus mwingmwinge nehn umwen Matthew‑o, jounrik daksis apel armaj dipan dir indoa pel mwinge pwili Ih apel nah sohnpadahkkok. 11 Pharisee pwi kapang me pwehng nah sohnpadahkkok, “Amwda amwai Jounpadahkken ke pwili jounrik daksis pel armaj dipan kan mwinge?”
12 Nehn Ah rongda me, Jesus pwa, “Jaudi armaj sihkei ioar anahne jounwini, a armaj johmwehu. 13  Inla woahwoahkihda woahwoahn mehkije jang nehn Puk Joarwi: ‘Ngoahi mwehuki kadek, jaudi meiroangin mahn.’ Ngoahi joah indoahng pangin armaj pwung, a armaj dipan kan.”
Peidekki doahr Kaijihjol
14 Doar nihn John jounpoapdaij sohnpadahkkok indoa idoak oang Jesus, “Amwda kamai apel Pharisee‑ok kin dod amai kaijihjol a nihmw sohnpadahk kan ken johkin kaijihjol?”
15 Jesus japoang, “Imdoahr nihn woallo ma pirin koapwoapwoaud sohnkaparrok en injinjuwed ma ih minmine iparai? A oau anjoau ma pirin indoa ma woal kamwohddo pirin wijik jang irai; doari, ioar anjoauwo irai pirin kaijihjol.
16  “Joh armaj kin doahng dipwin likkoau kapw kij in likkoau dehn oau, pwa dipwin likkoau kappwo nen pworpene doapwdoapwjang in likkoau merinngo, nehn kakoalikihla soahroakko. 17  Joh armaj kin widekihoang wain kapw nehn dohn wain dehn. Pwa dohn wainno nen pwokpijoang, wainno widekla, dohn wainno ohla. Wain kapw en widekihoang nehn dohn wain kapw, a kapwa nekdekla.”
Jerpein Mehdi men apel Li Johmwehu men
18 Nehn Ah pwahpwahpwa me, koaunin mihn Jew men indoa poadpwomwla mwohn Jesus pwehng Ih, “Noai jerpeinno kapwehsen mehdi. A indoa kioang poahmmwen puwoa, pwa ih en mourda.”
19 Jesus uhda pwilihla ih, pwilihki nah sohnpadahkkok.
20 Anjoauwo lihmen ma johmwehuki insa koarkoar johnpar eijek riau indoa likinjarkin pukkoangdi imwin Ah likkoauwo. 21 Liho pwehng pein ih, “Ma ngoahi pwen kodurroar Ah likkoauwo, ngoahi nen mwehula.”
22 Jesus jipwoalla pwehng ih, “Koapwoarpwoar, Noai jerpein, oamw pwojon ne kasihkeida koawoa.” Liho mwehula anjoauwohr.
23 Anjoauwo ma Jesus dilda nehn umwen koaunno Ih kapang jounkoajoanngok apel armaj kan loakloakoa, 24 Ih pwehng irai, “Kamwai dilla, jerpeinne johpwa mehdi, a ih moair.” A irai uruhrki Ih.
25 Mwerin armajjok dilla, Ih dilla loaloa koldi poahn jerpeinno, ih pwohrda. 26 Rong oauwe lohk pijoang nehn wija ohroj.
Jesus Kemwehuwihla Woal Majkun Roahmen
27 Jesus daudauluhlla jang wijahu, woal majkun roahmen kaujla Ih, poangpoang, “Mahkoahng kama, nihn David!”
28 Nehn Ah ne dilda nehn umw, woal majkunnok indoa Ipoa, a Ih peidek oang ara, “Kamwa kamehlele pwa Ngoahi kak kemwehuwihla kamwa?
“Eh, Koaun,” ira japoang.
29 Doar Ih jair mijara pwa, “Me en wiawi jang in amwa pwojon;” 30 ira pwuroahng kapangda wija. Jesus pwehng ira, “Kapang pwa johpwa emen en kidal mehkije.”
31 A ira inla likin kalohkihjili wijahu ohroj.
Jesus Kemwehuwihla Woal Loahsoang men
32 Nehn ara allaluhla, woal loahsoang men ma ngen jaus dilingla ih wijikdohng Jesus. 33 Anjoauwo ma ngen jausso diljang ipoa, woal loahsoanngo lallalda. Pokonno inenin pwuriamwei pwa, “Kahjikkoar mehkij doahre wiawi nehn Israel.”
34 A Pharisee‑ok pwa, “Koaunin ngen jaus kan ma kioang Jesus manman in kajroahjang ngen jaus.”
Sohn Doadoahk Jipid
35 Jesus allaluhjili nehn kahnihmw apel koujapw ohroj, padpadahk nehn jinakoke kan, padpadahkki doahr rongmwehuin Weiho, kemwehuwihla joangoan johmwehu ohroj ipen armaj kan. 36 Nehn Ah kapang pokonno, Ih ipwilkihda irai, pwa ara injinjuwed apel joh jauwajparai, doahr jihpw ma ne joh jiloapoarai. 37 Doar Ih pwehng Nah sohnpadahkkok, “Roakke koalik a sohn doadoahk jipid. 38  Poaki koaun in roakke en kadardo sohn doadoahk dir pwa en doadoahk nehn mwoaswello.”
* 9:1 nehn ah koaujoanno Capernaum (kapang 4:13)