3
Kuwɛɛ nwo do kuwɛɛ titɔ̃
1 Ilɑɑɔ̃ í dede ŋɛ hɑi si bɑlɛ do Kirisi ɑjɔ. Nɑ nŋu, i dɛ mii ndii lele bii Kirisi wɑ bubɑ si ɑwɔ njɛi Ilɑɑɔ̃ ŋɑ.
2 Mii ndii lele ŋɑi í sĩɑ i yɑ mɑɑ lɑsɑbu si ŋɑ. I mɑɑ̀ ce lɑsɑbui mii ndii ilɛ ihɛ̃ ŋɑ,
3 domi ì ku si mii ndii ɑndunyɑ ŋɑ, kuwɛɛ titɔ̃ nŋɛ í nɔ wɑ sinɡɑ do Kirisi ɑjɔ bi Ilɑɑɔ̃.
4 Kirisii í jɛ kuwɛɛ nŋɛ do ntɔ, nɔ ɑjɔ iyi ɑ́ fɑɑtɑ wɑ, do iŋɛi ɑjɔ, nɔ ɑɑ bɑ ikpɛ̃ nŋɛ si ɑmboeɛ.
5 Nɑ nŋu, i kpɑ kubii mii ndii ɑndunyɑ iyi wɑ ce icɛ si ŋɛ fei. Mii ndii ɑndunyɑ ŋɑui í jɛ ɑbo kɑɑfe ku sũò, do dɑɑ lɑɑlɔ, do binɛ, do kubi nfe nfe, do kɔdɛɛi mii nkpɔ. Ntɔ ntɔ bii ì wɑɑ ce kɔdɛɛ, mii nkpɔi í yɑ tɔɔ si ɑɡbɛi Ilɑɑɔ̃.
6 Mii ŋɑu bɛ feii í yɑ fɑ idɔɔkɔ̃i Ilɑɑɔ̃ wɑ si inɛ ŋɑ iyi ɑ̀ kɔ ku jirimɑ ideɛ.
7 Iŋɛ tɑkɑ nŋɛ bɛɛbɛi ì yɑ tɑko i mɑɑ ce ŋɑ wo wɑɑti iyi ì wɑ si dulum ŋɑu bɛ ŋɑ.
8 Ammɑ nsɛi, i nyɔ mii ŋɑu bɛ fei ŋɑ, hɑi idɔɔkɔ̃, do mbɛɛtɛ, do inɔ sɑ̃mi. I mɑɑ̀ yɑ jɔ̀ ɑrɑbu wɑlɑkɔ ide ku sisi ku fitɑ hɑi si ɡɛlɛ nŋɛ ŋɑ.
9 Nɔ i mɑɑ̀ yɑ sɔɑ njɛ ibo ŋɑ si nɑ iyi í jɔ̀ ì jɔ̀ dɑɑ nwo do dɔ̃ɔnɛɛ tɑ̃ ŋɑ,
10 nɔ ì nɛ dɑɑ titɔ̃ ŋɑ. Ì bɑɑ ì jɛ ɑmɑnɛ titɔ̃ ŋɑ iyi Ilɑɑɔ̃ woo tɑkɑ nwɑ wɑ kpɑɑsi kpɛlɛ kpɛlɛ ku bɑ i jɔɔ nɔ i mɑ̀ɑ sɑ̃ɑ sɑ̃ɑ ŋɑ.
11 Bɛɛbɛ mɔi si inɔ nŋɛ inɛ ɡɔ kù jɛ mmu, hɑi dimu mmu ŋɑ hee do Zuifu ŋɑ, hɑi inɛ ŋɑ iyi ɑ̀ ce bɑnɡo hee do inɛ ŋɑ iyi ɑ kù ce fei, hɑi inɛi ilɛɛko ŋɑ do ilu iju dũdũ ŋɑ, hɑi ɑru ŋɑ do hɑi jɛ ɑru ŋɑ. Nŋu ŋɑu bɛ fei Kirisi nŋu ɑkɑ̃i í jɛ fei ndɛɛ nɔ í wɑ si inɛ fei.
12 Nɑ nŋu, si nɑ iyi í jɔ̀ Ilɑɑɔ̃ í bi ŋɛ nɔ í cicɑ ŋɛ ì jɛ tɛɛ ŋɑ, mii iyi í jɔ i mu ŋɑ wee, ɑrɑɑre do jiidɑ ku jɛ do ɑrɑ ku kɑye do dɑɑ didɔ̃ do temuɑ.
13 Í yɑ yɔkɔò njɛ temuɑ ŋɑ nɔ i yɑ kpɑ idei kurɑrɑi njɛ ŋɑ bii ide ɡɔ í lɔ si ɑnini nŋɛ. Si bɛi Kirisi í kpɑ idei kurɑrɑ nŋɛ, iŋɛ mɔ i yɑ ceɑ njɛ bɛɛbɛ ŋɑ.
14 Iyi í re mɔm i bi njɛ ŋɑ. Kubiui ɑ́ jɔ̀ i yɑ mɑɑ ɡbɔsi njɛ jiidɑ jiidɑ ŋɑ.
15 Nɔ i jɔ̀ lɑɑkɑi ku sũ iyi Kirisi í mu nŋɛ ku mɑɑ ce icɛ si idɔ nŋɛ, domi si lɑɑkɑi ku sũu bɛi Ilɑɑɔ̃ í kpe ŋɛ i jɛò ɑrɑ ɑkɑ̃ ŋɑ. Nɔ i yɑ mɑɑ sɑɑbuɛ ŋɑ.
16 I jɔ̀ idei Kirisi ku kɔ̃ mɑm mɑm si idɔ nŋɛ ŋɑ, nɔ ku mu nŋɛ bisi ntɔ ntɔ ku bɑ i kɔ njɛ si cio nɔ i muɑ njɛ ɡbuɡbɑ̃ ŋɑ.
17 Si kookoosu nŋɛ do si kufɔ nŋɛ i ce fei ndɛɛ do irii Lɑfɛ̃ɛ Jesu nɔ i sɑɑbu Ilɑɑɔ̃ Bɑɑbɑ ŋɑ nɑ sɑɑbuɛ.
Anu ɑkɑ̃i inɛ ŋɑ si kuwɛɛ titɔ̃
18 Iŋɛ inɑɑbo ŋɑ, i sũɑ mɔkɔ nŋɛ ŋɑ iri ilɛ si bɛi í jɔ inɛ iyi í nɛ ɑnu ɑkɑ̃ do Lɑfɛ̃ɛ ku ce.
19 Iŋɛ mɔkɔ ŋɑ, i bi ɑbo nŋɛ ŋɑ, i mɑɑ̀ yɑ jɔ̀ i ɡɑɑbu si ŋɑ ŋɑ.
20 Iŋɛ ɑmu ŋɑ, i jirimɑ iyeò bɑɑ nŋɛ ŋɑ si ide bɑɑ yoomɑ fei, domi bɛɛbɛi ɑ́ dɔ̃ɑ Lɑfɛ̃ɛ si.
21 Iŋɛ bɑɑ ŋɑ mɔ, i mɑɑ̀ kɔ̃ idɔi ɑmɑ nŋɛ ŋɑ inɔ nŋɑ ku fɔ.
22 Iŋɛ ɑru ŋɑ, i jirimɑ lɑfɛ̃ɛ nŋɛ ŋɑ si fei ndɛɛ si ɑndunyɑu ihɛ̃, ku mɑɑ̀ jɛ bii ɑ̀ leekĩ ɑ̀ wɑɑ cɔ ŋɛ nŋu ɑkɑ̃. I jirimɑ ŋɑ do inɔ ɑkɑ̃ ŋɑ si nɑ iyi í jɔ̀ ì mɑ̀ bɛɛrɛi Lɑfɛ̃ɛ ŋɑ, nɔ ku mɑɑ̀ jɛ mii iyi ɑ́ dɔ̃ɑ ɑmɑnɛ ŋɑ si nŋu ɑkɑ̃i ì wɑɑ bi ku ce ŋɑ.
23 Iyi ì wɑɑ ce fei i coo do inɔ ɑkɑ̃ ŋɑ, nɔ ku jɛ bɛi Lɑfɛ̃ɛi ì wɑɑ ceɑ ŋɑ, kù jɛ ɑmɑnɛ ŋɑ.
24 I mɑ̀ ŋɑ iyi Lɑfɛ̃ɛ ɑ́ sɑ̃ nŋɛ ribɑ nŋɛ ŋɑ, iyi í jɛ tubu iyi í jilɛɑ inɛɛ ŋɑ, domi Kirisii í jɛ Lɑfɛ̃ɛ nŋɛ iyi ì wɑɑ ceɑ icɛ ŋɑ.
25 Ammɑ inɛ iyi í yɑ mɑɑ ce lɑɑlɔ, ɑ́ yɛ ribɑɛ si bɛi lɑɑlɔ kuceɛ í to, domi Ilɑɑɔ̃ ci yɑ nyɑ inɛ ɡɔ ikɑ̃.