3
Ammɑ í sĩɑ i mɑ̀ ŋɑ iyi kuwɛɛ nwɑ ɑ́ nɑ ku ɡɑɑbu si wɑɑtii ɑnkɑ̃ɑnyi. Amɑnɛ ŋɑ ɑɑ mɑɑ ce idei iri nŋɑ, lɑsɑbu nŋɑ fei si fiɑi ɑ́ yɑ wɑ, ɑɑ jɛ woo tɔɔ fufu, ɑɑ nyisi iyi ɑŋɑ ɑ̀ jɛ nɡɔɡɔ, ɑɑ mɑɑ bu Ilɑɑɔ̃. A kɑɑ jirimɑ bɑɑ nŋɑ ŋɑ, ɑɑ jɛ ɡudulu ŋɑ, ɑ kɑɑ mɑ̀ bɛɛrɛi Ilɑɑɔ̃. Aɑ jɛ hɑi nɛ kubi ŋɑ, ɑ kɑɑ nɛ ɑrɑɑrei inɛ ŋɑ, ɑɑ jɛ woo sɔ irii inɛ ŋɑ, ɑ kɑɑ mɑ̀ ɑrɑ nŋɑ, ɑɑ jɛ inɛ ku ɡɑɑbu ŋɑ, nɔ ɑɑ jɛ mbɛɛi woo ce jiidɑ ŋɑ. Aɑ jɛ ilu zɑmbɑ ŋɑ, ɑ kɑɑ nɛ lɑsɑbu jiidɑ, ɑɑ nɛ fɑɑo. Aɑ bi fɑɑyii ɑndunyɑ ku re Ilɑɑɔ̃. Aɑ mɑɑ too kpɑ̃ɑi Ilɑɑɔ̃ do ɡɛlɛ, ɑmmɑ ilu muɑfiti ŋɑi domi ɑ̀ kɔsi ɡbuɡbɑ̃ɛ. Fɑ ɑrɑɛ hɑi bi ɑmɑnɛ dimi bɛɛbɛ ŋɑ. Gɔɡɔ ŋɑ ɑɑ mɑɑ lɔ kpɑsɛ̃ do kpɑsɛ̃ ŋɑ ɑ mɑɑ kɑ̃miɑ inɑɑbo hɑi dondɑ kulɛlɛ ŋɑ. Inɑɑbo ŋɑu, dulum du ŋɑ í cɑɑ nɔ ɑ̀ wɑɑ too binɛ ikɑ̃ ikɑ̃ fei. Iju iyi í mɑ́ fei inɑɑbo bɛɛbɛ ŋɑu ɑ̀ wɑɑ dɛ ɑŋɑ ɑ mɑ̀ nɡɔɡɔ, ɑmmɑ ɑ kɑɑ nɔ ɑ mɑ̀ ntɔu pɑi. Si bɛi Zɑnɛsi do Zɑmbɛɛsi ɑ̀ kɔsi Moizi wo, bɛɛbɛ mɔi inɛ ŋɑu mɔ ɑ̀ kɔsi ntɔu, iri nŋɑ í sindɑ mɑm mɑm. Nɑɑnɛ ku dɑsi nŋɑ kù nɛ ɑrɑnfɑ̃ɑni kɑ̃mɑ. Ammɑ kookɑɑi nŋɑ kɑɑ bɔò ŋɑ bii kɑ̃mɑ, domi inɛ fei ɑ́ nɑ ku yɛ sũmu ku jɛ nŋɑ, si bɛi ɑ̀ yɛ ti Zɑnɛsi do Zɑmbɛɛsi.
Iyi Pɔlu í dɑsi Timɔtee ku ce
10 Ammɑ ɑwɔ ì mɑ̀ sɑ̃ɑ sɑ̃ɑ yɑɑse bɛi ǹ kɔ inɛ ŋɑ si cio do yɑɑse bɛi ǹ ce isɛɛnɛm bi tu ŋɛ, do mii ŋɑ iyi ǹ dɑsi idɔ n ce, do nɑɑnɛ ku dɑsim, do lɑɑkɑim, do suurum, do kubim, do temuɑm. 11 Ì mɑ̀ bɔ̃nɛ iyi ɑ̀ nyisim do ijuukpɑ̃ iyi í bɑm si ilui Antiɔsi do Ikonimu do Lisitu. Kù nɛ bɔ̃nɛ ɡɔ iyi n kù yɛ bɛ. Ammɑ Lɑfɛ̃ɛ í nyɑm hɑi si fei ndɛɛ. 12 Ntɔi, inɛ iyi wɑ bi ku ce kuwɛɛɛ dee dee si wɑjui Ilɑɑɔ̃ si ɑnu ɑkɑ̃ iyi í ce do Jesu Kirisi kù nɛ bɛi ɑ́ ce iyi kù yɛ ijuukpɑ̃. 13 Ammɑ inɛ lɑɑlɔ ŋɑ do woo sɔ ibo ŋɑ wɑɑti kɑ̃mɑ fei lɑɑlɔ nŋɑ í yɑ mɑɑ kɔ̃ɔsii. Si bɛi ɑ̀ wɑɑ dĩ ijui inɛ ɡɔ ŋɑ, bɛɛbɛ mɔi ɑ̀ wɑɑ dĩ ijui ɑrɑ nŋɑ. 14 Ammɑ ɑwɔ, leekĩ dim dim si cio iyi ɑ̀ kɔɛ si, iyi ì dɑsi nɑɑnɛ, domi ì mɑ̀ inɛ iyi í kɔɛ si. 15 Hɑi keekeɛi, ì mɑ̀ kukɔi idei Ilɑɑɔ̃ iyi ɑ́ yɔkɔ ku muɛ bisi i dɑsiò Jesu Kirisi nɑɑnɛ ku bɑ i bɑ fɑɑbɑ. 16 Kukɔi idei Ilɑɑɔ̃ fei hɑi bi Ilɑɑɔ̃i wɑ nɑɑ. Nɔ í nɛ ɑrɑnfɑ̃ɑni ku kɔ́ inɛ ŋɑ si cio, ku nyisi ɑmɑnɛ kurɑrɑɛ, nɔ ku dɑsiɛ kpɑ̃ɑ jiidɑ mɑ́, nɔ ku nyisiɛ yɑɑse bɛi ɑ́ jɛò dee dee, 17 ku bɑ inɛi Ilɑɑɔ̃ ku kɔ̃, nɔ ku tɑ̃ sɔɔlu ku ceò icɛ jiidɑ bɑɑ yoomɑ fei.