2
Maria barana sang Tuhan Yesus
(Mateos 1:18-25)
1-2 Satu kali, waktu Kirenius jadi kapala daꞌera di Siria, ais raja bésar, nama Agustus, kasi kaluar parenta bilang, “Samua orang yang di bawa pamarenta Roma pung kuasa musti pulang kampong ko iko sensus!” Itu kali partama ko pamarenta Roma itong dia pung rakyat bagitu. Jadi samua orang pulang kampong ko iko sensus.
4-5 Naa, itu waktu, Yusuf tenga di kampong Nasaret di propinsi Galilea. Dia su batunangan deng satu nona, nama Maria, yang ada dudu parú. Yusuf tu, raja Daud pung turunan, jadi dia musti pulang pi Daud pung kota Betlehem di propinsi Yudea ko iko sensus.
Andia ko dong dua barangkat pi kota Betlehem. Waktu dong su ada di sana, Maria pung waktu mau barana su sampe. Ma di situ, dong sonde dapa kamar di losmen. Andia ko dong maso pi dalam kandang. Ais ju dia barana Ana partama, Ana laki-laki. Ju dong bungkus sang Dia deng kaen, ko kasi tidor dalam binatang dong pung tampa makan.
Tuhan Allah kasi tau sang gambala dong
Itu malam, ada gambala barapa orang yang mete jaga dong pung kambing-domba di padang di luar kota.
Takuju sa, dong dapa lia Tuhan Allah pung ana bua dari sorga. Ais Tuhan pung taráng bacaya kuliling sang dong, ju dong taku mau mati. 10 Ma itu ana bua kasi tau bilang,
“Bosong jang taku dolo! Dengar bae-bae, é! Te beta ni, datang mau kasi tau satu kabar bae kasi bosong. Samua yang dengar ini kabar, pasti sanáng.
11 Ini kabar bae pung isi bagini:
Ini hari satu mama su barana sang Kristus di Betlehem, di raja Daud pung kota.
Kristus tu, Orang yang Tuhan Allah su janji memang dari dolu.
Tuhan kirim datang sang Dia ko kasi salamat orang dari dong pung sala-sala!
Dia ni, yang nanti orang dong pange, ‘Bos’, te Dia yang hak parenta samua!
12 Nanti bosong dapa kanál sang Dia bagini: bosong katumu satu Ana mea yang ada tabungkus deng kaen. Dia ada tidor dalam binatang dong pung tampa makan.”
13 Itu ana bua omong abis ju, takuju sa, Tuhan Allah pung ana bua yang laen dong dari sorga datang bam-banya ko bakumpul deng dia. Ju dong puji Tuhan Allah deng manyanyi bilang,
14 “Botong angka nae tinggi-tinggi Tuhan Allah pung nama!
Dia yang dudu parenta di langit yang paling tinggi.
Tuhan Allah mau kasi dame sang orang di bumi,
yang bekin sanáng Dia pung hati!”
15 Ais ju Tuhan pung ana bua dong pulang kambali pi sorga. Ju itu gambala dong baꞌomong bilang, “We! Mari kotong pi Betlehem ko pi lia itu Ana dolo! Te Tuhan su kirim itu kabar kasi kotong.”
16 Ais dong jalan capát-capát pi Betlehem. Ju dong katumu sang Maria deng Yusuf. Dong ju dapa lia itu Ana mea, yang ada tidor dalam binatang pung tampa makan.
17 Waktu dong dapa lia itu Ana, ju dong carita bilang, “Tadi Tuhan Allah pung ana bua dari sorga dong su kasi tau soꞌal ini Ana sang botong!” Ju dong carita samua sampe abis.
18 Samua orang taheran-heran dengar itu gambala dong pung carita. 19 Ma Maria taro dalam dia pung hati samua yang su jadi tu. Deng dia pikir diam-diam ko mau cari tau dia pung arti bilang apa. 20 Ais ju itu gambala dong bale pi dong pung kambing-domba dong. Ju dong angka nae tinggi-tinggi Tuhan Allah pung nama. Dong minta tarima kasi sang Dia, tagal yang dong dengar deng lia, sama parsís ke apa yang Tuhan pung ana bua su omong tu.
Itu Ana mea, dong kasi nama Yesus
21 Barana abis dalapan hari, ju dong sunat itu Ana mea iko baꞌi Musa pung atoran. Ju Dia pung mama-bapa kasi nama sang Dia, ‘Yesus’. Itu nama tu, nama yang ana bua dari sorga su kasi tau sang dong, waktu Dia pung mama balóm dudu parú sang Dia.
Dong bawa Ana mea Yesus pi Ruma Sambayang Pusat
22 Ada satu atoran dari baꞌi Musa yang bilang, parampuan yang su barana abis ampa pulu hari, musti pi bekin iko adat kasi barisi diri di Ruma Sambayang Pusat. Deng bagitu, dong su bisa maso di ruma sambayang sama ke biasa. Andia ko Yusuf deng Maria pi kota Yerusalem, ko mau bekin iko itu adat. Ju dong bawa dong pung Ana mea tu pi dalam Ruma Sambayang Pusat, ko sarakan sang Dia jadi Tuhan pung milik. 23 Dong iko Tuhan pung atoran yang bilang, “Tiap parampuan yang barana ana partama, kalo laki-laki, na, dia musti sarakan itu ana jadi Tuhan pung milik.” 24 Iko Tuhan pung atoran, kalo sarakan itu ana sang Tuhan, na, dia pung orang tua musti kasi korban burung takukur satu pasang, ko, burung pompa muda dua ekor. Andia ko Yusuf deng Maria ju bekin iko itu atoran.
Baꞌi Simeon bilang itu Ana mea Yesus tu, andia Kristus yang Tuhan Allah su janji
25-26 Itu waktu, ada satu baꞌi tua, nama Simeon, yang tenga di kota Yerusalem. Dia tu, orang yang hati lurus deng rindu sang Tuhan. Tuhan pung Roh yang Barisi su kasi tau sang dia bilang, dia nanti dapa lia sang Kristus dolo, baru dia mati. Kristus tu, yang nanti kasi salamat sang orang Israꞌel dong.
27 Itu waktu, Tuhan pung Roh antar bawa sang Simeon pi Ruma Sambayang Pusat. Itu pas deng Yesus pung mama-bapa ada bawa sang Dia pi situ, ko sarakan sang Dia jadi Tuhan pung milik. 28 Lia ame itu Ana, ais baꞌi Simeon koko ame sang Dia, ju dia angka puji kasi Tuhan Allah bilang,
29 “Puji Tuhan!
Tuhan su bekin iko Dia pung janji sang beta.
Jadi sakarang Tuhan su bisa kasi lapás sang beta,
ko biar beta bisa mati deng tanáng,
30 te beta su lia ame Orang yang Tuhan kirim datang,
ko kasi salamat sang botong dari botong pung sala-sala dong!
31 Tuhan mau pake ini Ana
ko kasi salamat samua suku-bangsa.
32 Dia nanti sama ke cahaya,
yang bawa hormat kasi Tuhan pung bangsa Israꞌel dong.
Dia ju sama ke taráng,
yang kasi tunju Tuhan pung jalan
kasi samua suku-bangsa laen dong.”
33 Dengar bagitu, ju Yusuf deng Maria taheran-heran deng apa yang baꞌi Simeon omong soꞌal dong pung Ana. 34 Ais itu, Simeon omong kasi berkat sang dong. Tarús dia kasi tau sang Maria bilang, “Yesus pung mama, é! Nanti banya orang di Israꞌel tola buang mama pung Ana ni. Ma dong pung bekin-bekin sang Dia tu, nanti kasi jato bale sang dong. Mama pung Ana ni, ju bekin banya orang dong hati babunga. 35 Deng bagitu, nanti Tuhan buka talanjang orang dong pung isi hati. Ma lu, Maria, nanti lu dapa sangsara barát, sama ke kalewang tikam maso di lu pung ulu hati.”
Nene Hana minta tarima kasi sang Tuhan, tagal Yesus
36-37 Di Ruma Sambayang Pusat ju ada satu nene, nama Hana. Dia pung umur su 84 taon. Dia pung bapa, nama Fanuel, dari suku Aser. Dia kawin tuju taon, ju dia pung laki mati kasi tenga sang dia. Nene Hana tu, Tuhan Allah pung jubir. Dia pung karjá, andia sambayang deng puasa di Ruma Sambayang Pusat, ko sémba sang Tuhan Allah siang-malam.
38 Waktu Simeon ada baꞌomong deng Yusuf deng Maria, itu nene datang deka-deka. Ju dia dengar sang dong, ais dia angka puji-puji sang Tuhan Allah. Tarús dia omong soꞌal Yesus kasi samua orang yang ada tunggu-tunggu Raja yang Tuhan su janji mau kirim datang ko kasi bebas bangsa Israꞌel.
Mama-bapa deng Ana kambali pi kampong Nasaret
39 Waktu Yusuf deng Maria su bekin iko baꞌi Musa pung atoran samua di kota Yerusalem, ju dong pulang pi propinsi Galilea, di dong pung kampong Nasaret. 40 Ju Yesus bésar datang. Ais Dia tamba kuat, tamba pintar, deng mangarti banya hal. Tuhan Allah ju kasi tunju hati bae sang Dia.
Nyong Yesus di Ruma Sambayang Pusat
41 Tiap taon, Yusuf deng Maria jalan pi kota Yerusalem, ko makan pesta Paska di situ. 42 Satu kali, waktu Yesus pung umur dua blas taon, ju dong jalan sama-sama pi Yerusalem ko iko itu pesta sama ke biasa. 43-44 Waktu hari-hari Paska su abis, ju Yusuf deng Maria mulai jalan pulang pi Nasaret sama-sama deng banya orang yang mau pulang pi Galilea. Ma dong sonde tau, Yesus ada tatenga di Yerusalem. Dong sangka Dia ada jalan sama-sama deng Dia pung tamán dong. Ma sampe sore, dong sonde dapa lia sang Dia. Ais dong mulai pal pi-datang cari sang Dia di dong pung kelu deng tamán dong. 45 Tagal sonde tau-tau dapa katumu sang Dia, ju dong jalan kambali pi Yerusalem, ko mau cari sang Dia di sana.
46 Sampe di sana, dong cari-cari sang Dia sampe tiga hari, baru dapa katumu sang Dia dalam Ruma Sambayang Pusat. Dia ada dudu basoꞌal-jawab deng guru agama Yahudi dong. 47 Orang dong samua yang ada dengar sang dong taheran-heran, tagal Dia batúl-batúl mangarti isi dari Tuhan Allah pung Tulisan Barisi, deng Dia bisa jawab dong pung soꞌal-soꞌal deng bae. 48 Lia bagitu, ju Dia pung mama-bapa dong heran. Ais Dia pung mama bilang, “Yesus! Akurang ko Lu bekin botong susa bagini? Lu pung bapa deng beta su tabingung-bingung bataputar pi-datang cari sang Lu!”
49 Ma Yesus manyao bilang, “Akurang ko mama-bapa susa-susa cari sang Beta? Tau sa, to? Beta ada urusan di Beta pung Bapa pung Ruma.” 50 Ma dong sonde mangarti batúl Dia pung maksud.
51 Ais ju dong samua pulang pi Nasaret. Yesus iko Dia pung mama deng bapa pung parenta dong. Ju Dia pung mama taro itu hal dong samua dalam dia pung hati. 52 Bagitu su, Yesus tamba dewasa, deng tamba pintar bawa diri. Tuhan Allah deng manusia ju ada sayang sang Dia.
2:21 Lukas 1:31; Kapala Agama dong pung Atoran 12:3 2:22 Kapala Agama dong pung Atoran 12:1-8 2:23 Kaluar dari Masir 13:2, 12 2:24 Kapala Agama dong pung Atoran 12:6-8 2:32 Yesaya 42:6, 49:6, 52:10 2:39 Mateos 2:23 2:41 Kaluar dari Masir 12:1-27; Carita Ulang soꞌal Jalan Idop 16:1-8 2:52 1 Samuel 2:26; Kata-kata Mutiara 3:4