19
Orang Farisi cari jalan ko hiki sang Tuhan Yesus deng soꞌal kawin-cere
(Markus 10:1-12)
1 Yesus ajar abis itu samua, ju Dia jalan kasi tenga Galilea ko pi propinsi Yudea di kali Yarden pung sablá sana.
2 Orang banya iko sang Dia, ju Dia bekin bae orang saki di sana.
3 Ada ju barapa orang Farisi yang datang ko mau hiki kasi jato sang Dia. Dong tanya bilang, “Bapa! Iko kotong pung atoran agama, kalo laki-laki su kawin, dia bole cere buang dia pung bini deng alasan apa sa, ko karmana?”
4 Ma Dia manyao bilang, “Bosong ni, orang yang pintar agama. Ma akurang ko bosong sonde tau Tuhan Allah pung Tulisan Barisi pung isi? Te di carita mula-mula ada tulis bilang, ‘Tuhan Allah bekin manusia, laki-laki deng parampuan.’
5 Deng ada tatulis lai bilang,
‘Tagal itu, laki-laki musti kasi tenga dia pung mama-bapa,
ko pi idop satu hati deng dia pung bini,
te dong dua su jadi satu.’
6 Tagal itu, kalo Tuhan Allah sandiri yang bekin dong dua jadi satu, na, manusia jang kasi cere lai!”
7 Dengar Yesus omong bagitu, ju itu orang Farisi dong tanya lai bilang, “Kalo bagitu, na, akurang ko baꞌi Musa bilang, orang bole bacere, asal dia kasi surat cere sang dia pung bini dolo?”
8 Ju Yesus manyao lai bilang, “Baꞌi Musa kasi biar bosong pung nene-moyang bacere deng dong pung bini, tagal dong tu, kapala batu sama ke bosong! Ma waktu Tuhan Allah bekin ini dunya, Dia pung maksud bukan bagitu.
9 Andia ko Beta kasi tau, é! Kalo bini ada maen serong lebe dolo, na, laki-laki bole bacere. Ma kalo bini sonde maen serong, laki-laki yang cere buang sang dia, ais kawin lai deng parampuan laen, na, dia su barsina tu!”
10 Dengar Dia omong bagitu, ju Dia pung ana bua dong omong bilang, “Kalo bagitu, na, lebe bae jang kawin sa.”
11 Ju Yesus manyao bilang, “Sonde samua orang yang bisa tarima Beta pung omong ni. Cuma orang yang Tuhan Allah tunju sa.
12 Te ada orang yang sonde kawin, tagal dari lahir su bagitu. Ada ju yang sonde kawin, tagal orang bekin bagitu sang dia. Deng ada ju, yang pili ko sonde kawin, tagal dia cuma mau kasi jalan Tuhan Allah pung karjá sa. Orang yang bisa mangarti ini ajaran, na, biar dia tarima sa.”
Tuhan Yesus omong kasi berkat sang ana kici dong
(Markus 10:13-16; Lukas 18:15-17)
13 Itu waktu, orang dong koko bawa dong pung ana-ana pi Yesus, ko biar Dia mua tangan deng omong kasi berkat sang dong. Ma Dia pung ana bua dong togor sang itu orang dong.
14 Ju Dia mara sang Dia pung ana bua dong bilang, “Kasi tenga itu ana dong datang sang Beta! Sonde usa larang! Te orang yang sama ke dong ni, andia Tuhan Allah pung orang.”
15 Ais Dia mua tangan pi di itu ana kici dong, deng minta ko Tuhan Allah kasi berkat sang dong. Ais itu, ju Dia jalan kasi tenga itu tampa.
Orang kaya cari jalan ko idop tarús deng Tuhan Allah
(Markus 10:17-31; Lukas 18:18-30)
16 Ais satu kali, ada orang datang tanya sang Yesus bilang, “Bapa Guru! Beta musti bekin hal bae yang karmana, ko biar beta tau parsís bilang, beta bisa maso sorga? Te beta mau idop tarús sama-sama deng Tuhan Allah.”
17 Ju Yesus manyao bilang, “Akurang ko lu tanya sang Beta soꞌal apa yang bae? Cuma Tuhan Allah sa yang bae. Kalo lu mau idop deng Dia, na, idop iko Dia pung parenta.”
18 Itu orang tanya lai bilang, “Parenta yang mana tu?”
Ju Yesus manyao bilang,
“Jang bunu orang;
jang maen serong;
jang mancuri;
jang jadi saksi putar-balek;
19 kasi hormat sang lu pung mama-bapa;
deng sayang lu pung sodara sama ke lu sayang lu pung diri sandiri.”
20 Itu orang manyao bilang, “Naa, itu parenta samua tu, beta su bekin. Apa yang masi kurang lai?”
21 Dengar bagitu, ju Yesus bilang, “Naa! Kalo lu mau iko Tuhan pung mau samua, na, pulang ko jual lu pung harta samua. Ais pi bagi-bagi itu doi kasi orang miskin dong. Ais itu, baru lu datang ko iko sang Beta. Te nanti Tuhan Allah balas kasi lu harta bam-banya di sorga.”
22 Dengar bagitu, ju itu orang pulang deng hati susa, te dia kaya mau mati.
23 Ais ju Yesus omong deng Dia pung ana bua dong bilang, “Parcaya sang Beta, te orang kaya paling susa maso sorga.
24 Dia pung susa tu, sama ke binatang onta yang bésar, maso pi dia pung kandang lewat jarom pung lobang.”
25 Dengar bagitu ju, Dia pung ana bua dong jadi taheran-heran. Ju dong manyao bilang, “Kalo bagitu, na, sapa yang bisa maso sorga?”
26 Dia lia bae-bae sang dong, ju Dia omong bilang, “Kalo manusia yang karjá, memang sonde bisa. Ma kalo Tuhan Allah yang karjá, samua bisa jadi!”
27 Ju Petrus kasi inga bilang, “Bapa! Botong su jalan kasi tenga botong pung harta samua, ko iko sang Bapa. Ma botong dapa apa?”
28 Dia manyao bilang, “Parcaya sang Beta! Nanti kalo Tuhan Allah su bekin samua jadi baru, Beta, Manusia Tulen ni, dudu dalam hebat di korsi parenta bésar. Itu waktu, bosong yang iko sang Beta, ju iko dudu di atas 12 korsi parenta, ko jadi hakim kasi kotong pung 12 suku Israꞌel!
29 Orang yang jalan kasi tenga dia pung ruma, adi-kaka, mama-bapa, ana-ana, deng dia pung kabón, ko iko sang Beta, nanti dia tarima bale sampe 100 kali lipat. Ais kalo ini dunya kiamat, dia ju dapa idop deng Tuhan tarús-tarús.
30 Jadi inga, é! Iko Tuhan Allah pung pikiran, banya orang yang bekin-bekin diri bésar, dong tu, andia orang yang paling kici. Ma orang yang anggap diri kici, dong tu, andia orang yang bésar, iko Tuhan pung pikiran.”