2
Bantu ya yinsi ya Mowabe
1 Yave ke na kutuba:
«Mu me tala yimbi ya mingi na sika ya bantu ya yinsi ya Mowabe,
kasi yimbi ya kulutila yina bawu salaka,
bawu yokaka mikwa ya ntinu ya yinsi ya Edome,
bawu kumisaka yawu fundu-fundu ya mpembe.
Ni yawu yina, mu ke bika ve na kusadila nzengolo yina mu me baka.
2 Mu ke fidisa tiya na yinsi ya Mowabe,
tiya yango ke nyengisa kuna na mbanza Keliyote bayinzo ya bamfumu.
Mowabe ke kufwa na kati ya makelele,
na kati ya kulooka ya binwani
mpe na kati ya makelele ya kulumenta.
3 Mu ke kufwa mfumu ya Mowabe,
mpe mu ke manisa na kufwa bamfumu yina ke salaka na yandi.»
Ni Yave me tuba yawu.
Bantu ya yinsi ya Yuda
4 Yave ke na kutuba:
«Mu me tala yimbi ya mingi na sika ya bantu ya Yuda,
kasi yimbi ya kulutila yina bawu salaka,
bawu safulaka bandongosolo ya Yave,
bawu tumamaka ve na bantumunu ya munu.
Bawu me zimbana nzila
mpe bawu ke na kulandaka banzambi ya luvunu yina bankooko ya bawu landaka.
Ni yawu yina, mu ke bika ve na kusadila nzengolo yina mu me baka.
5 Mu ke fidisa tiya na yinsi ya Yuda.
Tiya yango ke nyengisa kuna na Yelusalemi bayinzo ya bamfumu.»
Bantu ya Isayeli
6 Yave ke na kutuba:
«Mu me tala yimbi ya mingi na sika ya bantu ya Isayeli,
kasi yimbi ya kulutila yina bawu salaka,
bawu tekisaka muntu ya kudedama samu na mbongo,
bawu tekisaka mputu samu na dipapa.
Ni yawu yina, mu ke bika ve na kusadila nzengolo yina mu me baka.
7 Bawu ke na kunyokolaka bamputu,
bawu ke na kusadila ve lufundusu ya kulunga samu na bantu ya kukuluka.
Tata na mwana ke kwendaka vukisa mfulu na ndumba mosi.
Ni mutindu yina bawu ke na kuvweza nkumbu ya munu ya longo.
8 Pene-pene ya konso kiyokolo ya minkayulu,
bawu ke na kulala na zulu ya binkuti yina bamputu simbisaka bawu na mfuka.
Vinu yina bawu botolaka na bantu,
bawu ke na kunwa yawu na yinzo ya banzambi ya bawu.
9 Ba zaba kwandi ti munu, mu kufwaka ba-Amoli na mantwala ya bawu,
bayina vwandaka yinda mutindu yinti yina ba ke bokilaka sedele,
mpe ngolo mutindu yinti ya nene ya mfinda.
Mu mwangisaka bawu mutindu yinti, kubanda na bambuma ya yawu tii na myanzi ya yawu.
10 Na ntangu ya ntama,
munu, mu basisaka beno na yinsi ya Ngipiti.
Mu twadisaka beno bamvula makumi yiya na yinsi ya kuyuma,
samu ti beno kubotola yinsi ya ba-Amoli.
11 Na manima, mu salaka ti bana ya beno ya nkaka ya babakala kuvwanda mimbikudi,
mpe ba ya nkaka kuvwanda ba-Nazile.
Beno bantu ya Isayeli, ni mutindu yina ve?
Ni Yave me tuba yawu.
12 Kasi beno me nwikisa ba-Nazile vinu.
Beno pesaka ntumunu yayi na mimbikudi: “Beno kubikula ve!”
13 «Ni yawu yina, munu, mu ke nika beno kaka kisika yina beno kele,
mutindu ke nikaka kipusu-pusu yina ke ya kufuluka na matiti ya bambuma ya faline.
14 Muntu yina me lutila mbangu ke lenda ve na kwenda bumbama.
Muntu yina kele na kibakala ke lenda ve na kulakisa ngolo ya yandi.
Kinwani ya kibakala ke lembana na kukivuukisa yandi mosi.
15 Muntu yina ke sadilaka munani ke lenda ve na kuvibidila.
Muntu yina me lutila mbangu ke vuuka ve.
Muntu yina ke nataka mpunda ke kukivuukisa ve yandi mosi.
16 Na kilumbu yina, kinwani yina me lutila kibakala na binwani nyonso ke kima kondwa binkuti na nzutu.»
Ni Yave me tuba yawu.