64
1 Mutindu tiya ke yokaka matiti,
mpe ke tokisaka maza
ni mutindu yina nge ke zabisa Nkumbu ya nge na mitantu ya nge,
mpe makanda nyonso
ke tekita na mantwala ya nge.
2 Kana nge yidikaka mavanga ya ngitukulu
yina beto vwandaka vingila ve,
ya tsyelika, kana nge kulumuka,
na mantwala ya nge myongo ke tekita.
3 Katuka bantangu ya ntama,
muntu mosi ve me kuwaka,
to me talaka,
nzambi mutindu nge,
yina ke salaka mambu ya mbote na bayina ke tulaka kivuvu na yandi.
4 Nge ke kwiza bwabana
muntu yina ke sadilaka ludedomo na kilengi nyonso,
mpe ke tulaka kivuvu na nge
na kulanda banzila yina nge tezaka,
kasi nge kumaka na nkele samu ti beto sumukaka,
kana beto landa banzila yina ya bantangu nyonso, beto ke kuzwa mpulusu.
5 Beto nyonso kele mutindu misumuki,
ludedomo ya beto kele mutindu bilele ya kuvedila ve.
Beto nyonso me lemba mutindu makasa ya kuyuma,
yimbi yina beto ke salaka, me nata beto mutindu mupepe.
6 Ata muntu ke na kubokila Nkumbu ya nge,
ata muntu ke na kusadila ngolo samu na kukangama na nge.
Ni yawu yina nge me pesa beto mukongo mpe nge me sala ti beto kuvwanda na yisi ya lutumu ya masumu ya beto.
7 Kasi nge Yave nge kele tata ya beto,
beto, beto kele ntoto ya kulamba,
mpe nge kele kisadi-mbinda yina yidikaka beto:
beto nyonso kele mavanga yina maboko ya nge yidikaka.
8 Mfumu, ku vwanda ve na nkele ya kulutila.
Kubambuka ve moyo ntangu nyonso na yimbi ya beto!
Tala mulemvo ya nge, beno nyonso kele bantu ya nge!
9 Tala, bambanza ya nge ya longo kele dyaka na bantu ve,
Siyone me kuma yinsi ya kuyuma,
Yelusalemi mbanza yina me mwangana.
10 Yinzo ya beto ya longo yina vwandaka kitoko,
kisika yina bankooko ya beto vwanda zitisa,
nge me nyenga na tiya,
mpe nyonso ya beto ya ntalu me beba.
11 Yave, na mantwala ya bampasi nyonso yayi,
nge ke sala ata dyambu ve?
Nge ke fwisa dyaka beto nsoni ya kulutila?