Dibuku ya
YONASE
NKOTOLO
Dibuku yayi ke na kuzabisa mambu yina me tadila mumbikudi Yonase. Yonase mekaka na kumanga na kutumama na Musiku ya Nzambi, kasi yandi lendaka ve. Ntangu yina Nzambi fidisaka yandi samu na kwenda kulonga na Ninive, Yonase dasukaka mpe yandi vwandaka na nsatu ya kufwa nzutu.
Dibuku yayi ya mumbikudi Yonase ke na kulakisa beto na dede nyonso wapi mutindu Nzambi ke lakisaka luzolo ya yandi kaka na bantu ya Isayeli ve kasi yandi ke lakisaka yawu mpe na banzenza yina ke tumamaka na mambu ya yandi.
Nongo yayi ke na kulakisa na bayina nyonso ke sadilaka Nzambi ti bantontolo, bamfyetokoso na bampasi ke kondwaka ve na kati ya luzingu ya bawu. Yawu ke na kuzabisa beto mpe ti Nzambi ke bikaka ve bana ya yandi, samu ti konso ntangu, Nzambi ke vwandaka ya kukubama samu na kulakisa luzolo ya yandi na konso muntu.
Dibuku yayi kele ya kukabuka mutindu yayi:
- Nzambi fidisaka Yonase, kasi yandi mangaka na kutumama (Yon 1).
- Yonase tumamaka na Nzambi mpe Nzambi vuukisaka yandi (Yon 2).
- Yonase longaka mambu ya Nzambi na mbanza Ninive (Yon 3).
- Nzambi tadilaka mbanza Ninive kyadi (Yon 4).
1
Yonase ke na kusosa kukima Nzambi
1 Kilumbu mosi, Mambu ya Yave wakanaka na sika ya Yonase, mwana ya Amitayi:
2 «Telema, kwenda na Ninive, yina kele mbanza ya nene. Zabisa bantu ya mbanza yina ti kitumbu ke na kuvingila bawu, samu ti mu me tala wapi mutindu kele mavanga ya bawu ya yimbi.»
3 Yonase telamaka kasi samu na kukima na mbanza Talesise, ntama na Yave. Yandi kwendaka na mbanza Zafa, sika yandi talaka masuwa yina vwandaka kwenda na mbanza Talesise. Yandi futaka tike mpe kwendaka kota na masuwa na binati masuwa samu na kukwenda na Talesise, ntama na Yave.
4 Kasi Yave fidisaka mupepe ya ngolo na mubu, mpe Kitembo lutilaka ngolo. Na yina, masuwa vwandaka sosa na kumwangana.
5 Bisadi ya masuwa kumaka na boma mingi, mpe konso muntu vwandaka lomba lusalusu na nzambi ya yandi na ndinga ya ngolo. Bawu losaka bifunda na mubu samu na kukatula dema na masuwa. Na ntangu yina, Yonase vwandaka me kulumuka na kisika ya yisi na kati ya masuwa mpe vwandaka lala pongi ya ngolo.
6 Mfumu ya binati masuwa kwendaka pene-pene ya yandi mpe tubaka: «Samu na yinki nge ke na kulala? Telama mpe lomba lusalusu na nzambi ya nge! Yandi lenda kufwila beto kyadi mpe kusala ti beto kufwa ve.»
7 Na manima, bisadi ya masuwa vwandaka tuba bawu na bawu: «Beto bula dzeke samu na kuzaba nani me natina beto mpasi yayi.» Bawu bulaka dzeke mpe yawu lakisaka Yonase.
8 Na yina, bawu tubilaka yandi: «Zabisa beto nani me natina beto mpasi yayi. Yinki nge ke salaka? Wapi sika nge me katuka? Nge kele muntu ya wapi yinsi mpe ya wapi dikanda?»
9 Yonase vutulaka: «Mu kele mu-Ebeleyo mpe ni Yave mu ke zitisaka, Nzambi ya mazulu yina yidikaka mubu mpe ntoto.»
10 Na manima, yandi zabisaka bawu mambu ya yandi. Bisadi ya masuwa kumaka na boma mingi ntangu bawu kuwaka ti Yonase vwandaka kima Yave na yinsi ya ntama. Bawu yufulaka yandi: «Samu na yinki nge me sala mutindu yina?»
11 Na ntangu yina, bimpo ya maza vwandaka lutila na kunangukaka na ngolo. Na yina, bawu yufulaka yandi: «Yinki beto fwana kusala nge samu ti mubu dingama na beto?»
12 Yonase pesaka bawu mvutu yayi: «Beno baka munu, beno losa munu na mubu mpe mubu ke dingama na beno. Ya tsyelika, mu zaba ti kitembo ya ngolo yayi ke na kukwamisa beno samu na munu.»
13 Bisadi ya masuwa vwandaka meka na kunata masuwa na simu, kasi bawu lendaka ve samu ti bimpo ya maza vwandaka tatamana na kunanguka na ngolo nyonso.
14 Na yina, bawu lombaka lusalusu na Yave mutindu yayi: «Oo, Yave, kubika ve ti beto kufwa samu na muntu yayi. Mpe, kutula ve menga ya muntu yina me sala beto ata kima na zulu ya bayintu ya beto. Ni nge mosi, Yave, me sala mutindu nge zola.»
15 Na manima, bawu bakaka Yonase mpe ba losaka yandi na mubu, mpe mubu dingamaka.
16 Na yina, bawu kumaka na boma mingi ya Yave, bawu pesaka yandi munkayulu, mpe bawu salaka bansilulu.