51
1 Yave ke na kutuba:
«Mu ke sala ti mupepe ya mwangusulu kufula na Babilone,
yawu kufula na bantu yina ke zingaka na Lebe-Kamayi.
2 Mu ke fidisa na mbanza Babilone banzenza yina ke yengisa yandi mutindu ba ke yengisaka bambuma.
Bawu ke sala ti yinsi ya yandi kubikana kaka ya mpamba.
Na kilumbu yango ya mpasi,
ba ke bwidila yandi na balweka nyonso.»
3 Bika ti bayina ke sadilaka minani, kusadila yawu,
samu na kunwanisa bambeni yina ke sadilaka minani.
Bayina ke lwataka binkuti ya bisengo, kulwata yawu.
Beno zimbana ve binwani ya bantwenya.
Beno manisa na kufwa binwani ya yandi nyonso
samu na Nzambi!
4 Bayina ke lwala bamputa ya lufwa ke kutandama na yinsi ya ba-Kalede.
Bayina ke lwala ke fuluka na banzila ya Babilone.
5 Kasi bantu ya Isayeli mpe ya Yuda wilaka ve Nzambi ya bawu,
Yave Nzambi ya Binwani,
ata ti yinsi ya bawu fulukaka na masumu
yina ba salaka na ntadisi ya Nzambi ya longo ya Isayeli.
6 Beno kima Babilone!
Bika ti konso muntu sosa na kuvuuka!
Kana ve, beno ke kufwa ntangu yandi ke futa yimbi ya yandi.
Samu na Yave, yawu kele ntangu ya nkele.
Ba ke vutula yandi yina yandi salaka.
7 Babilone vwandaka mutindu
mbungu ya wolo na diboko ya Yave.
Yandi vwandaka sala ti bantu nyonso ya ntoto kukola.
Bantu ya bayinsi vwandaka kunwa vinu ya yandi
mpe vwandaka kuma mutindu bilawu.
8 Kasi na mpamukunu, Babilone me kubwa,
yandi me mwangana.
«Beno sadila yandi milolo!
Beno tudila yandi manganga na bamputa ya yandi,
kuzaba ve kana yandi ke beluka.»
9 - «Beto pesaka Babilone manganga,
kasi yandi me beluka ve.
Beto bika yandi,
bika ti konso muntu kuvutuka na yinsi ya yandi.
Samu ti kitumbu yina yandi me kuzwa,
yawu me kwenda tii na zulu,
yawu me kwenda tii na matuti.
10 Yave me lakisa beto ludedomo ya yandi.
Beno kwiza, beto zonzila na Siyone
kisalu yina Yave, Nzambi ya beto, me sala.»
11 Beno lengula madyonga,
beno baka bankutu ya beno.
Yave me vumbula mpeve ya bantinu ya Mede,
yandi me baka lukanu ya kunwanisa Babilone.
Ya kele nsembolo ya Yave,
nsembolo ya dizulu.
12 Beno telemisa kidimbu ya mvita
na zulu ya bibaka ya Babilone.
Beno bwela dyaka lukengolo,
beno tula bankebi,
beno tula binwani mutindu kikaku.
Samu ti Yave ke lungisa
mambu yina yandi kanikinaka na kusala
samu na bantu yina ke zingaka na Babilone.
13 Babilone, nge yina ke zingaka pene-pene ya maza ya nene.
Nge yina ke na bimvwama mingi, ya nge yimeni.
Nge yina labaka mingi bampangi ya nge.
14 Yave, Nzambi ya Binwani, kudyaka ndefi na Nkumbu ya yandi mosi:
«Mu ke fulusa nge na nkonga ya bantu
mutindu nkonga ya makonko
yina ke na kulooka mutindu ke lookaka
bayina ke yonzikaka bambuma.»
15 Nzambi yidikaka ntoto na lulendo ya yandi.
Yandi yidikaka yinza na ndwenga ya yandi.
Na mayela ya yandi, yandi yidikaka dizulu.
16 Ntangu yandi ke wakisaka ndinga ya yandi,
maza ke vukanaka na dizulu.
Yandi ke yulukisaka matuti kubanda na bandilu ya ntoto.
Yandi ke basisaka balusyemo samu na kunokisa mvula.
Yandi ke basisaka mupepe na bisika yina yawu ke vwandaka.
17 Bawu nyonso kele bizoba, ba lenda kubakula ve.
Konso kisadi-bisengo me kuma na nsoni,
samu na kiteki yina yandi yidikaka,
bifwiti ya yandi kele kaka luvunu,
yawu ke na luzingu ve.
18 Ya kele kaka bima ya mpamba,
ya kele mfunu ve.
Na kilumbu ya nsembolo,
yawu ke mwangana.
19 Kasi Nzambi yina kele kikunku ya bantu ya Yakobi kele ve mutindu biteki yina.
Ni yandi yidikaka bima nyonso.
Isayeli ni kifumba yina kele mvwilu ya yandi.
Nkumbu ya yandi, Yave, Mfumu ya Binwani!
Nsuka ya Babilone
20 Samu na munu, nge Babilone,
nge vwandaka mutindu munduki,
kinwanunu ya munu ya mvita.
Kintwadi na nge, mu mwangisaka bayinsi,
mu mwangisaka bayinsi ya bintinu.
21 Kintwadi na nge:
Mu kufwaka bampunda, mu kufwaka bayina ke nataka yawu.
Mu mwangisaka bipusu-pusu ya mvita, mu kufwaka bayina ke nataka yawu.
22 Kintwadi na nge:
Mu kufwaka bakento mpe babakala.
Mu kufwaka bantwenya mpe biboka.
Mu kufwaka matoko mpe bandumba.
23 Kintwadi na nge:
Mu kufwaka mivungi mpe bibulu ya bawu.
Mu kufwaka bayina ke balulaka ntoto na bisalulu ya bawu.
Mu kufwaka bamfumu ya luyalu mpe bamfumu ya nkaka.
24 «Mu futisaka bantu ya Babilone
mpe bantu yina ke zingaka na Kalede,
yimbi nyonso yina bawu salaka na Siyone,
yimbi yina bawu salaka na meso ya beno.
Ni Yave me tuba yawu.
25 Nge mongo ya mwangusulu, mu ke nwanisa nge.
Nge kimwangisi ya ntoto nyonso,
Mu ke pesa nge kitumbu, mu ke bwisa nge.
Mu ke katula nge na zulu ya matadi ya nene tii na yisi,
nge kuma mongo yina me kuya tiya.
Ni Yave me tuba yawu.
26 Na sika ya nge, ba ke kuzwa ata ditadi mosi ve,
ya vwanda yina bitungi-bayinzo ke tulaka na bansongi ya bayinzo,
ditadi yina ba ke tungilaka balufulu.
Nge ke kuma kisika ya kumwangana ya bantangu nyonso.»
Ni Yave me tuba yawu.
27 Beno telemisa kidimbu na yinsi na kati ya yinsi!
Beno wakisa muningu ya kulumenta na kati ya bayinsi.
Beno bokila bayinsi samu na kwiza kunwanisa yandi.
Beno bokila bayinsi ya bintinu ya Alalate, ya Mini mpe ya Asekenaze,
samu na kunwanisa yandi.
Beno tula bamfumu ya binwani,
samu na kunwanisa yandi.
Beno fidisa bampunda mutindu nkonga ya makonko,
samu na kunwanisa yandi.
28 Beno bokila bantu ya bayinsi, samu na kunwanisa yandi.
Beno fidisa yandi bantinu ya Mede,
bamfumu ya bawu, bantwadisi ya bawu nyonso,
mpe bayinsi nyonso yina kele na yisi ya lutumu ya bawu.
29 Mambu yina Yave kubikaka samu na Babilone me salama.
Ntoto me ningana, yawu me tekita.
Yinsi ya Babilone me kuma kisika ya kyadi ya kulutila,
yawu kele dyaka na bantu ve.
30 Binwani ya Babilone me bika na kunwana,
bawu me bumbama na bisika ya kutungama na bibaka ya lukengolo.
Kibakala ya bawu me manisa,
bawu me kuma mutindu bakento.
Ba me tula tiya na bayinzo ya bawu,
bikangulu ya bayinzo ya bawu me mwangana.
31 Muntu mosi ke na kukima na manima ya mpangi muntu.
Ntumwa mosi ke na kukima na manima ya ntumwa ya nkaka,
samu na kwenda zabisa na ntinu ya Babilone ti
ba me botola mbanza ya yandi nyonso,
kubanda na ndilu mosi tii na ndilu ya nkaka.
32 Banzila me kangama,
bibaka ya lukengolo me nyenga,
binwani me lemba.
33 Yave, Nzambi ya Binwani, Nzambi ya Isayeli, ke na kutuba:
«Babilone, kento ya kitoko,
yandi kele mutindu kisika yina ba ke dyataka matiti
samu na kukabula yawu na bambuma ya yawu.
Ntangu ya kuyonzika bambuma samu na yandi,
kele dyaka ntama ve.»
Yave me baka lukanu ya kunwanina bantu ya yandi
Yelusalemi
34 Nebukadenesale ntinu ya Babilone
me kudya munu nyonso,
yandi me mina munu nyonso.
Yandi me bika munu mutindu kiteko ya mpamba.
Yandi me mina munu mutindu ke salaka
kibulu ya nene ya nsisi ya mubu.
Yandi me fulusa kivumu ya yandi na bantu ya munu
mpe na bimvwama ya munu.
Yandi me losa munu.
35 Bantu ya Siyone ke na kutuba:
«Bika ti Babilone kutala mpasi,
samu na yimbi yina yandi salaka beto!»
Bantu ya Yelusalemi ke na kutuba:
«Bika ti ba-Kalede kutala mpasi,
samu na menga ya beto yina bawu tangisaka!»
*
36 Na yina me tadila Yelusalemi, Yave ke na kutuba:
«Mu ke nwanina nge:
bayina ke sala nge yimbi,
mu ke futisa bawu yimbi ya bawu.
Mu ke yumisa nzadi ya Babilone.
Mu ke yumisa yinto ya yandi ya maza.
37 Babilone ke kuma mutindu kinkunku ya matadi,
kisika yina bambulu ke banda na kubwabanaka.
Yawu ke vwanda kisika ya kumwangana.
Mbanza yayi ke kuma kisika ya kyadi,
kisika ya kufuluka na makelele ya kyadi.
Ata muntu ke zinga dyaka kuna.
38 Bantu ya Babilone ke na kulooka mutindu bankosi ya ntwenya.
Bawu ke na kuduma mutindu bana ya bankosi.
39 Mu ke kubikaka madya ya bawu,
ntangu bawu ke kumaka na nsatu ya kulutila,
Mu ke pesaka bawu malafu tii bawu ke kola.
Bawu ke lala pongi ya mankululu
mpe ba ke vumbuka dyaka ve.
Ni Yave me tuba yawu.
40 Mu ke nata bawu
mutindu ba ke nataka bana ya mameme ya mbakala, mpe bankombo ya mbakala,
mu ke nata bawu na kisika yina ba ke kufwaka bibulu.»
Manyongo samu na Babilone
41 Mbanza Sesake yina vwandaka nsangu na yinza ya muvimba,
ba me botola yawu.
Wapi mutindu yawu lenda kusalama?
Na bayinsi nyonso ya yinza,
Babilone me kuma yinsi ya kumwangana!
Wapi mutindu yawu lenda kusalama?
42 Mubu me dasukila Babilone,
bimpo ya yandi ya ngolo me dyamisa yinsi nyonso.
43 Bambanza ya yandi me mwangana,
yawu me kuma yinsi ya kuyuma,
mudimba ya kukawuka.
Ya kele yinsi, kisika ata muntu ke na kuzinga kuna,
mpe ata muntu ke na kuluta kuna.
44 Mu ke pesa kitumbu na Bele kuna na Babilone,
mu ke katula na yinwa ya yandi yina yandi me kudya,
Bantu ya bayinsi ke kwenda dyaka ve na sika ya yandi.
Bibaka ya Babilone me kubwa!
45 Beno bantu ya munu,
beno basika na kati-kati ya bawu.
Bika ti konso muntu kuvuukisa luzingu ya yandi
na mantwala ya nkele ya kulutila ya Yave!
46 «Beno kuvwanda ve yeko-yeko mpe beno kuwa ve mambu yina ke na kuwakana na yinsi. Mvula yayi mambu ya luvunu ke wakana, mvula yina ke kwiza mpe mambu kaka ya luvunu ke wakana. Mvwanzi ke na kuyala na ntoto, mfumu mosi ya luyalu me bingisa mfumu ya nkaka!»
47 «Na yina, na bilumbu yina ke kwiza,
mu ke mwangisa biteki ya Babilone.
Yinsi nyonso ke fuluka na nsoni.
Na kati ya bambanza, bamvumbi ke vwanda ya kutandama na ntoto.
48 Zulu na ntoto mpe bayina nyonso ke zingaka na yawu,
ke sala milolo ya nsayi samu na Babilone,
samu ti ni na node ke katuka bimwangisi.»
Ni Yave me tuba yawu.
Mumbikudi
49 Babilone mpe ke kubwa
samu na bantu ya Isayeli yina yandi kufwaka,
samu ti yandi kufwaka bantu mingi na yinza.
50 Beno bayina me vuuka na mbele ya mvita,
beno kwenda, beno telama ve kisika mosi.
Kisika yina beno kele, beno bambuka moyo na Yave,
na bantima ya beno, beno zimbana ve Yelusalemi.
Bantu ya Nzambi
51 «Beto vwandaka na nsoni,
ntangu beto vwandaka kuwa bifingu.
Bizizi ya beto fulukaka na nsoni,
ntangu banzenza kotaka na bivinga ya longo ya Yinzo ya Yave.»
Yave
52 «Ni yawu yina, Yave ke na kutuba:
Bilumbu yina ke kwiza,
mu ke mwangisa biteki ya Babilone.
Bidilu ya bayina nyonso ke lwala
ke wakana na yinsi ya yandi nyonso.
53 Ata ti Babilone kukuma tii na dizulu,
ata ti yandi tula bibaka ya lukengolo samu ti bantu kukota ve,
mu ke tumisa ba kwiza mwangisa yawu.»
Ni Yave me tuba yawu.
Mumbikudi
54 Makelele ya ndombolo ya lusalusu ke na kuwakana na Babilone,
makelele ya mvwanzi ya nene ke na kuwakana na yinsi ya ba-Kalede.
55 Samu ti, Yave ke mwangisa Babilone,
yandi ke dingimisa makelele ya yawu.
Makelele ya bimpo ya yawu ke na kuwakana
mutindu makelele ya maza ya mubu,
yina ke na kuwakisa makelele ya yawu.
56 Ya tsyelika, kimwangisi me mwangisa Babilone.
Ba me bwila binwani ya yandi ya ngolo,
ba me zenga minani ya bawu ya mvita.
Samu ti Yave kele Nzambi yina ke sembaka,
yandi ke futisaka yimbi.
57 «Mu ke sala ti bamfumu mpe bantu ya yandi ya ndwenga, bantwadisi, mpe binwani ya yandi, bawu nyonso ke kola malafu. Bawu ke lala pongi ya mankululu, bawu ke vumbuka dyaka ve. Yayi ni mambu yina me tuba ntinu yina ba ke bokilaka Yave, Nzambi ya Binwani.»
58 Yave, Nzambi ya Binwani, ke na kutuba:
«bibaka ya nene ya Babilone nyonso me mwangana,
myelo ya yawu ya kuzangama me nyenga na tiya.
Bantu ke na kutala mpasi ya mpamba,
bantu ya bayinsi ke na kulemba ya mpamba samu na tiya!»
Dibuku yina ba losaka na nzadi ya Efalate
59 Yayi ni ntumunu yina mumbikudi Yelemya pesaka na Selaya, mwana ya Neliya, mutekolo ya Maseya, ntangu yandi vwandaka kwenda na Babilone kintwadi na Sedekyawu, ntinu ya Yuda, na mvula yiya ya kintinu ya yandi. Selaya vwandaka mfumu ya kivwandu.
60 Yelemya sonikaka na dibuku na yina me tadila mpasi nyonso yina ke kumina yinsi ya Babilone, mambu nyonso yayi yina kele na kusonama samu na Babilone.
61 Yelemya tubaka na Selaya mutindu yayi: Ntangu nge ke kuma na Babilone, nge fwana kutanga mambu nyonso yayi.
62 Mpe nge ke tuba: «Yave, ni nge mosi tubaka ti mbanza yayi ke mwangana mpe muntu ve ke zinga dyaka kuna, ya vwanda bantu to bibulu, yawu ke kuma kisika ya kuyuma bantangu nyonso.»
63 Na manima ya kutanga dibuku yayi, nge ke kanga yawu ditadi, nge ke losa yawu na maza ya Efalate,
64 mpe nge ke tuba: «Ni mutindu mosi Babilone ke zimbana mpe yandi ke telama dyaka ve na manima ya mpasi yina mu ke talisa yandi, bantu ke lemba.» Ni mutindu yayi me suka mambu ya mumbikudi Yelemya.
Ni yayi mambu ya Yelemya.