115
Nkembo na Nzambi kaka
1 Yave, samu na beto ve, samu na beto ve,
kasi sala ti kaka Nkumbu ya nge kukemboswa,
samu na bumbote ya nge, mpe samu na kukwikama ya nge.
2 Samu na yinki bayinsi ke na kuyufula:
«Wapi sika kele Nzambi ya bawu?»
3 Nzambi ya beto kele na mazulu,
yandi ke salaka nyonso yina yandi zola.
4 Banzambi ya bawu ya biteki kele ya wolo mpe palata,
ya kele bima yina bantu me yidika.
5 Bawu kele na bayinwa kasi bawu ke zonzaka ve,
bawu kele na meso kasi bawu ke talaka ve.
6 Bawu kele na makutu kasi bawu ke kuwaka ve,
bawu kele na bambombo kasi bawu ke kuwaka ve nsunga.
7 Bawu kele na maboko kasi bawu ke simbaka ata kima ve,
bawu kele na makulu kasi bawu ke tambulaka ve,
ata makelele ke wakanaka ve na bayinwa ya bawu.
8 Bayina ke yidikaka yawu kele kaka mutindu mosi na biteki yina,
mutindu mosi mpe bantu yina ke tulaka kivuvu ya bawu na biteki yango!
9 Beno bana ya Isayeli, beno tula kivuvu ya beno na Yave!
Yandi kele lusalusu ya bawu mpe kinwanunu ya bawu ya kisengo yina ke kebaka nzutu!
10 Bana ya Aloni, beno tulaka kivuvu ya beno na Yave!
Yandi kele lusalusu ya bawu mpe kinwanunu ya bawu ya kisengo yina ke kebaka nzutu!
11 Beno yina ke zitisaka Yave, beno tula kivuvu ya beno na Yave!
Yandi kele lusalusu ya bawu mpe kinwanunu ya bawu ya kisengo yina ke kebaka nzutu!
12 Yave me bambukila beto moyo, yandi ke sakumuna:
Yandi ke sakumuna bana ya Isayeli,
yandi ke sakumuna bana ya Aloni,
13 Yave ke sakumuna bayina ke zitisaka yandi,
kubanda na bana ya fyoti tii na bakuluntu.
14 Yave ke pesa beno ntomosono,
beno na bana ya beno.
15 Bika ti Yave kusakumuna beno,
yandi yina yidikaka zulu na ntoto!
16 Mazulu kele mazulu ya Yave,
kasi ntoto, yandi pesaka yawu na bantu.
17 Bantu ya kufwa lenda kembila ve Yave,
ya vwanda bantu yina ke kwendaka na kisika yina kele swii.
18 Kasi beto, beto ke tonda Yave,
kubanda ntangu yayi tii bantangu nyonso.
Aleluya!