3
Mpulusu ke katukaka na Yave
Mukunga yina Davidi yimbilaka na ntangu yina yandi vwandaka kima Abesalome, mwana ya yandi+.
Yave, mitantu ya munu kele mingi!
Bayina ke na kunwanisa munu, bawu kele mingi!
Na yina me tadila munu, mingi ke na kutuba:
«Nzambi ke vuukisa ve yandi!»
Kupema
Kasi nge Yave, nge kele kinwanunu ya munu yina ke kebaka nzutu ya munu.
Nge kele nkembo ya munu, nge ke pesaka munu lunungu.
 
Ntangu mu ke lookaka na sika ya Yave,
yandi ke pesaka munu mvutu, katuka kuna na mongo ya yandi ya longo.
Kupema
Ntangu mu ke lalaka, mu ke kuzwaka mpongi,
mu ke vumbukaka, samu ti Yave kele kiyekamanu ya munu.
Mu kele ve na boma ya bantu ya mingi-mingi yayi,
yina me zunga munu samu na kunwanisa munu.
 
Yave, telama!
Nzambi ya munu, vuukisa munu!
Ya tsyelika, nge ke bulaka bambeni ya munu nyonso na ditama,
nge ke mwangisaka meno ya bantu ya yimbi.
Yave, mpulusu ke katukaka na sika ya nge.
Bika ti lusakumunu ya nge kuvwanda na bantu ya nge!
Kupema
 
+ 3:1 2Sa 15–17