DIBUKU YA ZOLE
42
Mga 42–72
Mutindu nkabi ke vwandaka na mpwila
1 Mukunga ya bana ya Kole. Mukunga yina ba twadisaka na mfumu ya miyimbidi.
2 Mutindu nkabi yina ke na mpwila ke sosaka maza na mwila,
munu mpe mu ke na mpwila ya nge, Nzambi ya munu!
3 Mu ke na mpwila ya Nzambi, Nzambi ya moyo.
Wapi ntangu mu ke kwenda talana na ntadisi ya Nzambi?
4 Madya ya munu ya mpimpa na ntangu,
ni mansangasa ya munu.
Ntangu nyonso ba ke na kutuba na munu:
«Wapi Nzambi ya nge?»
5 Mu zola kubambuka moyo
na mambu yina me simba ntima ya munu.
Mu vwandaka tambula ya kuzungama na nkonga ya bantu.
Mu vwandaka na mantwala ya nkonga
mpe beto vwandaka kwenda na Yinzo ya Nzambi ya munu.
Ya vwandaka mukembo ya nene
na kati ya milolo ya nsayi
mpe na mikunga ya nzitusu na nkonga ya bantu mingi.
6 Samu na yinki mu ke lemba,
samu na yinki mu ke looka?
Tula kivuvu ya nge na Nzambi!
Mu ke kembila dyaka yandi,
samu ti yandi kele Muvuukisi ya munu, Nzambi ya munu!
7 Nzambi ya munu mu me lemba,
ni yawu yina, mu me bambuka moyo na nge,
katuka kuna na yinsi ya nzadi ya Yolodani,
pene-pene na yinsi ya Elemone,
katuka kuna na mongo ya Miseyale.
8 Bimpo ke na kubokila bimpo na kati ya makelele ya maza.
Maza ya nge nyonso,
bimpo ya nge nyonso lutaka na zulu ya munu.
9 Kilumbu yina Yave ke lakisa munu luzolo ya yandi,
na mpimpa, mu ke yimbila yandi mikunga ya nzitusu,
mu ke sambila Nzambi yina me sala ti mu kuzinga.
10 Mu ke tuba na Nzambi, nge kele ditadi ya munu ya nene,
samu na yinki nge me zimbana munu?
Samu na yinki mu ke na kwendaka tambula na kati ya kyadi,
na kati ya bankwamusu ya mbeni?
11 Mikwa ya munu ke na kubukana,
bambeni ya munu ke na kukwamisa munu na kutuba ntangu nyonso:
«Wapi Nzambi ya nge?»
12 Samu na yinki mu ke lemba,
samu na yinki mu ke looka?
Tula kivuvu ya nge na Nzambi!
Mu ke kembila dyaka yandi
samu ti yandi kele Muvuukisi ya munu, Nzambi ya munu!