83
Lusambulu samu na kununga bambeni
1 Mukunga ya Asafe.
2 Oo, Nzambi, kuvwanda ve swii!
Nzambi, kuvwanda ve kaka mutindu yina kondwa kusala ata dyambu.
3 Samu ti bambeni ya nge ke na kutomboka,
bayina ke yinaka nge ke na kubasisa yintu.
4 Na mayela ya bawu ya yimbi,
bawu me sadila bantu ya nge bamfundu ya yimbi.
Bawu me sala lukutakanu,
samu na kusala yimbi na bantu yina nge ke kebaka.
5 Bawu me tuba: «Beno kwiza, beto zimbisa bawu na bayinsi,
samu ti ba kubambukila dyaka ve moyo na nkumbu ya Isayeli!»
6 Bawu me vukana mpe me wisana na ntima mosi,
bawu me sala ngwisani samu na kutelemina nge.
7 Ba-Edome, ba-Isemayele,
ba-Mowabe, ba-Angale,
8 ba-Ngebale, ba-Amone, ba-Amaleke,
ba-Filiseti na bantu yina ke zingaka na Tile.
9 Bantu ya Asili mpe me vukana na bawu
yandi me kwiza sadisa bana ya Loti.
Kupema
10 Sala bawu mutindu nge salaka bantu ya Midyane,
mutindu nge salaka na Sisela, mpe Yabine kuna na mudimba ya Kisone!
11 Ba kufwaka bawu kuna na Ene-Dole,
bawu kumaka mutindu mboloso samu na ntoto.
12 Bantu ya bawu ya mfunu,
sala bawu mutindu nge salaka na Olebe mpe Zebe.
Bamfumu ya bawu nyonso, sala bawu mutindu nge salaka na Zeba mpe Salemuna.
13 Ni bawu vwandaka tuba:
«Beto baka bantoto ya Nzambi,
samu ti yawu kukuma mvwilu ya beto!»
14 Nzambi ya munu, zungisa bawu na kimbongila,
mutindu bampusu ya bambuma yina mupepe ke nataka.
15 Mutindu tiya ke yokaka mfinda,
mutindu milaka ya tiya ke yokaka myongo,
16 Na yina, landa bawu na kimbongila,
talisa bawu boma na mupepe ya ngolo!
17 Talisa bawu nsoni ya kulutila,
samu ti, bawu sosa lusalusu na Nkumbu ya nge Yave.
18 Bika ti bawu kufwa nsoni mpe bawu kuvwanda na boma mingi bantangu nyonso!
Bika ti bawu kuzimbana na kati ya nsoni ya kulutila!
19 Sala ti bantu kuzaba ti kaka ni nge ba ke bokilaka na Nkumbu ya Yave,
nge kele Nzambi ya Kulutila Kuzangama na ntoto nyonso.