14
Kilumbu Yave ke na kukwiza
1 Yelusalemi, Kilumbu ya Yave ke na
kukwiza mpe ba ke kabula bimvwama
ya nge na meso ya nge.
2 Mu ke vukisa bantu ya bayinsi nyonso
samu na kunwanisa Yelusalemi.
Bawu ke baka mbanza,
ke mwangisa bayinzo,
mpe ke baka bakento na ngolo.
Ndambu ya bantu ke kwenda
na bayinsi ya nzenza,
kasi ndambu ya nkaka ya bantu
ke bikana na kati ya mbanza.
3 Yave ke talana mpe yandi
ke nwanisa bantu ya bayinsi yina,
mutindu yandi ke nwanaka
na kilumbu ya mvita.
4 Na kilumbu yina, yandi ke
kwenda telama na zulu
ya mongo ya ba-Olive,
ntama ve na mbanza Yelusalemi,
na lweka ya esete ya mbanza.
Mongo ya ba-Olive ke pasuka
na kati-kati, dibenga
ya nene ke talana kubanda
na esete tii na wesete.
Ndambu ya mongo ke kwenda
na node, ndambu ya
nkaka ke kwenda na sude.
5 Beno ke kima na kati ya dibenga
ya myongo ya munu, samu ti
dibenga ya myongo ke
kwenda tii na yinsi ya Asale.
Beno ke kima mutindu bankooko
ya beno kimaka ntangu ntoto
ninganaka na ntangu yina
Ozyase vwandaka ntinu ya Yuda.
Yave ke kwiza kintwadi
na balongo ya yandi.
6 Na kilumbu yina, nsemo ke vwanda ve,
madidi mpe madidi ya kulutila ke vwanda.
7 Yawu ke vwanda kilumbu
ya mutindu ya nkaka,
kaka ni Yave zaba yawu.
Mpimpa na ntangu
ke vwanda dyaka ve
kasi na nkokila, nsemo ke lezima.
8 Na kilumbu yina, mukelo ya maza
ke basika na Yelusalemi.
Ndambu ya maza
ke kwenda na mubu yina kele
na esete, ndambu ya nkaka
ke kwenda na mubu yina kele na wesete.
Yawu ke vwandila mutindu
yina na kisiwu mpe na bamvula.
9 Na kilumbu yina, Yave ke kuma
ntinu ya ntoto nyonso.
Ni Yave Nzambi mosi kaka
mpe kaka ni Nkumbu ya yandi
ke kemboswa.
10 Yinsi nyonso ke kituka mutindu
ntoto ya mudimba ya Yolodani yina ata kima ke menaka ve kubanda
na Ngeba tii na Limone na sude ya
Yelusalemi. Yelusalemi ke vwanda
kaka na zulu ya mongo na kisika
yina yawu kele, Kubanda na mwelo
ya Bezame tii na kisika yina kele
mwelo ya ntete, kubanda na yinzo
ya mutela ya yinda ya Ananeele
tii na kisika yina ba ke
kamunaka vinu ya ntinu.
11 Bantu ke zinga na kati ya mbanza,
ba ke mwangisa dyaka yawu ve,
Yelusalemi ke vwanda na kizunu.
12 Na yina me tadila bantu
yina nwanisaka Yelusalemi,
Yave ke pesa bawu kitumbu yayi:
Tekila bawu kufwa, banzutu,
baludimi mpe meso ya bawu ke bola.
13 Na kilumbu yina, Yave ke kotisa
mvwanzi na kati ya bawu
mpe ba ke nwana bawu na bawu.
14 Bantu ya Yuda mpe ke
nwana na kati ya Yelusalemi.
Bawu ke baka bimvwama
ya bayinsi nyonso yina kele
pene-pene na Yelusalemi mutindu
wolo, palata mpe lutangu mingi ya binkuti.
15 Nsembolo ke kubwa na bibulu nyonso,
ya vwanda bampunda,
bampunda ya ntela ya mwa nkufi,
basamo, bambuluku mpe bibulu nyonso
yina kele na kisika yina,
yawu ke tala mpasi mutindu mpasi ya ntete.
16 Na yina, bantu ya bayinsi
yina kwizaka nwanisa Yelusalemi
mpe ke ntete moyo, ke kwenda
konso mvula kuna na Yelusalemi
samu na kusambila Ntinu,
Yave, Nzambi ya Binwani
mpe samu na kusala
mukembo ya mileba.
17 Kasi samu na makanda yina
ke kwenda ve na Yelusalemi samu
na kuyinama na mantwala ya Ntinu,
Yave, Nzambi ya Binwani,
mvula ke noka ve na ntoto ya bawu.
18 Kana dikanda ya Ngipiti
kwenda ve kuna na Yelusalemi
samu na mukembo ya mileba,
Yave ke sala ti yawu mpe kutala
mpasi mutindu bayinsi ya nkaka
yina ke manga na kukwenda
na mukembo yango.
19 Yayi kele mpasi yina ke tala Ngipiti
mpe bayinsi ya nkaka,
bayina ke manga na kukwenda
na mukembo yina.
20 Na kilumbu yina, na zulu
ya mwa bangunga yina
ba ke lwatisaka bampunda,
ba ke sonika mutindu yayi:
«Ya kele ya kubyekwa samu na Yave.»
Banzungu ya Yinzo ya Yave
mpe ke vwanda ya kuvedila mutindu
bambungu yina ba ke sadilaka na
kiyokolo ya minkayulu.
21 Banzungu nyonso yina kele
na Yelusalemi mpe na Yuda,
ba ke byeka yawu samu na Yave,
Nzambi ya binwani. Bayina nyonso
ke kwiza samu na kuyoka minkayulu,
ke sadila na banzungu yina samu
na kulambila na yawu.
Na kilumbu yina, muntu
ya mumbungu ke vwanda dyaka ve
na kati ya Yinzo ya
Yave, Nzambi ya Binwani.