2
Lumoni ya zole: Mampoka mpe bisadi-bisengo
1 Na lumoni mu talaka mampoka yiya.
2 Mu yufulaka na mbazi yina vwandaka solola na munu: «Mampoka yayi zola kutuba yinki?» Mbazi vutulaka: «Yawu kele mampoka yina mwangisaka bantu ya Yuda, ya Isayeli mpe ya Yelusalemi.»
3 Na manima, Yave lakisaka munu bisadi-bisengo yiya.
4 Mu yufulaka mbazi: «Bantu yayi me kwiza samu na yinki?» Yandi vutulaka: «Yawu kele ni mampoka yina mwangisaka bantu ya Yuda mpe salaka ti, ata muntu lenda dyaka na kuvumbula yintu na mantwala ya bawu. Kasi bisadi-bisengo yayi me kwiza samu na kutalisa bawu boma mpe na kuzenga mampoka ya bayinsi yina telemisaka mampoka ya bawu na yinsi ya Yuda samu na kumwangisa bantu.»
Lumoni ya tatu: Singa ya kutezila
5 Mu talaka dyaka na lumoni, muntu mosi vwandaka na singa ya kutezila na maboko ya yandi.
6 Mu yufulaka yandi: «Wapi kisika nge ke na kukwenda?» Yandi vutulaka, mu ke na kukwenda, samu na kuteza Yelusalemi, samu na kuzaba yinda mpe nene ya yawu.
7 Mpe ntangu mbazi yina vwandaka zonza na munu vwandaka kwenda, mbazi ya nkaka vwandaka kwiza, samu na kubwabana yandi.
8 Mbazi yina vwandaka kwiza, zabisaka na mbazi yina vwandaka kwenda: «Kwenda mbangu na sika ya ntwenya yina me simba singa ya kutezila mpe zabisa yandi mutindu yayi: Mbanza Yelusalemi ke vwanda kaka mwasi, samu ti lutangu ya bantu na ya bibulu yina ke zinga kuna ke vwanda mingi.
9 “Mpe munu, mu ke vwanda kibaka ya tiya yina ke zunga mbanza. Nkembo ya munu ke vwanda na kati-kati ya yawu” ni Yave me tuba yawu.»
Mambu ya Yave samu na Yelusalemi
10 Yave ke na kutuba:
«Ee, beno bayina mu mwangisaka
na bisika nyonso,
beno basika na bayinsi ya node.
Ni Yave me tuba yawu.
11 Ee, beno bantu ya Siyone,
beno bayina ke na kuzinga na yinsi
ya Babilone, beno basika kuna.»
12 Samu na bantu ya bayinsi yina botolaka bima ya beno,
Yave Nzambi ya Binwani, yina me fidisa munu na lutumu ya yandi, ke na kutuba:
«Konso muntu yina ke simba beno,
yandi ke simba yingo ya disu ya munu.
13 Ya tsyelika, kitumbu yina mu ke
pesa na bantu ya bayinsi yina ni yayi:
Bayina vwandaka bisadi ya bawu ke
botola bawu bima.»
Ntangu mambu yayi ke salama,
beno ke ndima ti ni
Yave, Nzambi ya Binwani tumisaka munu.
14 Yave ke na kutuba dyaka:
«Nge ndumba ya Siyone, sala milolo
ya nsayi mpe yangalala.
Mu ke na kwiza samu na kuzinga na kati-kati ya nge.
15 Na kilumbu yina, bantu ya bayinsi
mingi ke kwiza na sika ya munu Yave.
Bawu ke kuma bantu ya munu,
mpe mu ke vwanda na kati-kati ya nge.»
Ntangu yawu ke salama,
nge ke ndima ti
ni Yave, Nzambi ya binwani tumisaka munu na sika ya nge.
16 Na yina, Yave ke baka Yuda,
mutindu kimvwama ya yandi na yinsi ya longo,
mpe yandi ke soola dyaka Yelusalemi.
17 Bika ti konso muntu kudingama na ntadisi ya Yave,
samu ti yandi ke na kubasika na Yinzo ya yandi ya longo.