4
Mbulu pakan ta Anutu leleene pa
1 Ayo, niom toŋmatiziŋ tiam, iŋgi be aŋposop sua tio. Mbulu ta Anutu leleene pa be kakam, ina niam ampaute yom pa ma kuute kek. Mi mbulu tana ta kakamam, mi iseeŋge iseeŋge ma imarmar i. Mi iŋgi amso ampombol yom mini pa Merere Yesu zaana be kakam ma kam kat, mi iseeŋge iseeŋge ma ila.
2 Tutu ta amur piom pa Merere Yesu zaana, ina niom kuute kek.
3 Anutu, ni leleene be kewe potomŋoyom. Tana mbulu ki urŋanol na, kombot molo pa.
4 Niom tomtom tataŋa, motoyom iŋgal be koto zaala ki Anutu pa mbulu ki ula, mi kagabiizi ituyom. Naso kakam mbulu potomŋana ta ambai pa Anutu mi tomtom matan.
5 Kokena kakam kembei wal matan munŋan ta tiute Anutu som i. Pa zin na, nin zze pa mbulu soroksorok boozomen ki kulin, mi tikamam.
6 Tana kere yom. Kokena kakam mbulu ki urŋanol, to kapasaana toŋmatiziŋ tiom mi kakam ŋoobo zin. Pa mbulu boozomen ta kembei na, Merere kola ipokot. Ka sua ta niam amso ma keleŋ kek. Pa muŋgu amkam sua mbolŋana piom pa mbulu ta ti.
7 Anutu, ni iboobo iti be takam mbulu sananŋana som. Ni iboboobo iti be tewe ni lene kat, mibe tewe potomŋanda.
8 Tana sombe tomtom sa izooro sua ti, na ni izooro yam tomtom som. Ina ni izooro Anutu ta ikamam Bubuŋana Potomŋana piti i.
Tuur lelende pizin tomtom
9-10 Mi mbulu ki tuur lelende pizin toŋmatiziŋ ta ki Krisi i, na niam leyam sua sa be ambeede piom som. Pa Anutu itunu ipaute yom pa mbulu tana ma karao pa kek. Mi iŋgi ku'urur leleyom pa toŋmatiziŋ ta boozomen ki Krisi ta timbot irao lele pakaana biibi ki Masedonia na. Tamen amso ampombol yom mini be kakam kat mbulu tana, mibe kikiskis mi iseeŋge iseeŋge ma ila.
Takam uraata. Kokena tombot se kizin wal pakan
11-12 Niam leleyam be kombot se kizin wal pakan pepe. Tana kuur niyom, mi mbuleyom tuŋ su kat, mi kakam uraata pa ituyom nomoyom, kembei ta muŋgu amso piom na. Naso mbulu tiom ambai pizin wal ta tiurla som na matan. Kokena motoyom iŋgal uraata tiom som, mi kawwa leyom sorok.
Miiliŋana ki Yesu
13 Niom toŋmatiziŋ tiam, niam leleyam be kakam kat ŋgar pizin wal meeteŋan. Ŋonoono, zin wal ta tiurla som na, lelen ipata kat pizin meeteŋan. Paso, zin tiurur matan pa maŋgaŋana kizin meeteŋan som. Mi niom na, leleyom ipata kat kembei ta zin pepe. Kakam ŋgar pizin meeteŋan kembei zin tikenne men.
14 Pa iti tuurla ta kembei: Yesu, ni imeete mi imaŋga mini kek. Tana zin wal ta tiwe ni lene mi timeete na, Anutu kola ipei zin ma timaŋga mini, mi ikam zin ma ziŋan Yesu tila kini.
15 Iŋgi Merere itunu kalŋaana ta amso piom: Ni isombe imiili ma imar mini, na iti ta tombotmbot matanda yaryaara i ko tumuuŋgu pizin wal meeteŋan som.
16 Pa Merere isombe izem saamba mi isu, na ni ko iur sua raama kalŋaana biibi, mi aŋela kini mataana kana iboobo, mi twiiri ki Anutu itaŋ. To zin wal ta tiwe Krisi lene mi timeete kek na, ko timaŋga muŋgu,
17 mana tiyogeege iti pakan ta tombotmbot matanda yaryaara i, mi tilup ti raama zin meeteŋan, mi karau men mi tikam ti ma tasala miiri tieene ta imbot la maŋaanaŋana na. Mi itiŋan Merere ko tasala kar saamba be tombotmbot raami ma alok.
18 Tana motoyom iŋgalŋgal sua ti, mi kaparpombolmbol yom pa.