31
Sua ki King Lemuel
1 Iŋgi sua ki King Lemuel. Ŋgar taiŋgi, Anutu iswe la ki Lemuel naana, mi naana kadoono ikam la kini.
2 O lutuŋ, nom ŋonoono ta nio i. Indeeŋe ta nu mbotmbot men lela kopoŋ leleene na, aŋbuk sua pa Anutu be aŋuru ma we ni lene.
Tana kozo ŋgun talŋom pa sua tio ti.
3 Re: Kokena pasaana koroŋ ku pizin moori mi zem mburom pizin.
Pa ina zaala ta ipasansaana king boozomen ma tizanzaana pa i.
4 O Lemuel, motom iŋgal. Zin wal ta tikamam peeze na, yok mbolŋana irao ipasiksik ŋguren na pepe.
5 Kokena tiwin, to matan mbeleele tutu ta imbot pataaŋa kek na,
mi tiurpe kat pataŋana kizin wal sorrokŋan som.
6 Yok mbolŋana mi baen, ina king koroŋ kizin som.
Ina koroŋ kizin wal ta tikamam be timeete i, mi zin wal ta lelen ipata kat ma timbotmbot.
7 Pa zin wal ta len koroŋ som ma timbot ŋoobo, mi zin wal ta lelen ipata kat na, tiwinin bekena matan mbeleele pataŋana kizin.
8 Zin wal ta tirao be tiporoukaala zitun som na, sombe tomtom tikam ŋoobo zin, na nu maane pepe. Maŋga mi so sua bekena uulu zin.
Zin wal ta timbotmbot raama pataŋana na, mender pizin mi urpe pataŋana kizin ma indeeŋe men.
9 Tana sombe tomtom timbotmbot raama pataŋana mi tiru zalan na, nu maane pepe. Maŋga mi so sua bekena uulu zin.
Mender pizin, mi urpe pataŋana kizin ma indeeŋe men.
Mbulu ki moori ambaiŋana
10 Sombe tomooto sa leleene be iwoolo, mi indeeŋe moori ŋonoono ta ikamam kat mbulu, na ni ikam le koroŋ ambaiŋana kat.
Zin moori ta kembei tilip pa pat milmilŋan ta kan kadon bibip i. Tamen zin boozo som. Ko tendeeŋe zin la ki parei?
11 Moori ta kembei na, kusiini ko irao ipase pini kat.
Mi ni ko iuulu kusiini be ikam koroŋ ndabokbokŋan boozo.
12 Mazwaana ta imbotmbot su toono, na ikamam mbulu ambaiŋana men pa kusiini.
Irao ikam mbulu sananŋana sa pini na som.
13 Ni moori nama mosŋana. Irao iurpe sipsip rumuunu mi koroŋ pakan ma iwe mburu be tomtom tizeebe zin pa.
Mi ni mata seŋana, mi ikamam uraata raama menmeeni.
14 Ni kembei wooŋgo ta ilala lele molo mi ikamam koroŋ popoŋan ma timar.
Pa ilala irru kini matakiŋa bekena ikam pa wal kini.
15 Mbeŋbeŋŋana mi ni imaŋgaŋga be iteege you pa wal kini,
mi iurur zin mbesooŋo moori kini pa uraata.
16 Ni irru toono ambaimbaiŋan be iŋgiimi ma iwe lene.
Mi iŋgiimi toono tana pa pat ta ikamam pa uraata kini na, mi ipaaza ke baen isula.
17 Ni maolŋana som.
Ni moori uraataŋana.
18 Mburooŋo ta ni ikamam na, isipirpir som. Ire kembei iurur ŋonoono.
Mi lam kini na, imetmeete som. Pa ni ikamam uraata pa mbeŋ tomini.
19 Ni iurpewe koroŋ pakan be isese ma iwe mburu.
20 Mi iwelweele namaana mi irairai koroŋ pakan pizin wal sorrokŋan.
Mi zin wal ta timbotmbot raama pataŋana na tomini, ni iuluulu zin.
21 Sombe lele isaana, na ni irao ikam ŋgar boozo pa na som. Pa iparaŋraŋ wal kini len mburu pataaŋa kek.
Wal kini tizebzeebe zin pa mburu ambaimbaiŋan men.
22 Tana irao nin tekteege pa mbeŋ som. Pa ni iurpewe len mburu be tikototo zin pa.
Mi ni itunu na, izebzeebi pa mburu ndabokbokŋan ta kan mos ambaimbaiŋan na.
23 Tomooto ta so iwoolo moori ta kembei, isombe ila ma ziŋan zin kolman tilup zin pa sua, nako tomtom len ŋger pini, mi tire i kembei tomtom ŋonoono.
24 Moori ta kembei, ni isese mburu ambaimbaiŋan mi ikamam ŋgomo pa.
Mi iurpewe pus bekena tomtom tiŋgiimi mi tila tikam ŋgomo pa.
25 Mbulu kini ŋgeezeŋana ta iwe aigau pini, mi ikam ma tomtom tipakuri ma tiso ni moori ŋonoono.
Mi mbulu tabe ipet pa kaimer i, na ni imototo som. Pa mbulu pareiŋana ta so ipet, na ni ko imender mbolŋana.
26 Ni izzo sua raama ŋgar.
Mi ipaute wal kini be tiurur kat lelen pa Anutu mi zin tomtom.
27 Ni imborro kat ruumu kini.
Irao imbomboorene mi ikam mbulu kembei ta wal maolŋan na som. Ikamam kat uraata.
28 Moori ŋonoono ta kembei na, lutuunu bizin ko lelen ambai pini mi tipakurkuri.
Mi kusiini tomini ko iwidit uruunu ma iso ta kembei:
29 “Moori boozomen tirao pa mbulu.
Mi nu na, lip kat pizin.”
30 Tana moori ruŋgun, som mbulu kizin pakan ta ikamam zin tomooto lelen, na takam ŋgar pa pepe. Pa ina koroŋ ŋonoono som. Imbot rimen mi imap.
Mi moori ta so imototo Yooba mi ileŋleŋ la kalŋaana, to tapakuri.
31 Pa ni ikamam kat mbulu. Tana iti tapakuri pa uraata ta ni ikamam na,
mi tiwit uruunu ila iwal biibi matan, to indeeŋe.