10
Suŋŋana ki tomtom ta ka koi bizin tikamam pataŋana pini
1 O Yooba, iŋgi pataŋana biibi ikam yo.
Parei ta nu piŋgis motom pio, mi mbotmbot molo pio?
2 Re. Zin wal sananŋan tipakurkur zitun mi tirru zin wal ta len mburan biibi som na, be tiseeze matan.
Yooba, mbulu sananŋana ta lelen iur pa be tikam pizin wal pakan na, pimiili mini pa zitun.
3 Wal tana lelen pa mbulu sananŋan boozo, mi nin izze pa.
Mi matan koroŋŋan mi kuumbuŋan.
Mi tirepilpiili Yooba mi tigibgiibi sua sananŋana pini.
4 Zin wal sananŋan tipakurkur zitun mi tizzo ta kembei:
“Anutu ko ipokot mbulu tiam som. Pa Anutu sa som.”
Tana tikam ŋgar pa Anutu risa som.
5 Tamen tere kembei mboti kizin iloondo ambai men.
Mbulu kizin sananŋana, nu urur kadoono pa som.
Mi timoto kan koi bizin som. Tirepilpiili zin mi kwon pasom zin.
6 Tana tikam ŋgar pa zitun ta kembei: “Nio ti ko aŋbotmbot ambai men, ambai men.
Irao aŋdeeŋe pataŋana sa na som. Som ma som kat.”
7 Kwon na, bok pa sua sananŋana, mi sua pakaamŋana, mi sua pamotoŋana.
Sua sananŋana tabe ipasaana zin tomtom i, na lelen pa ilip, kembei ta kini namutŋana.
8-9 Zin tikewe la kar zilŋaana, mi tizaŋzaaŋa zin wal ambaimbaiŋan be tipun zin ma timetmeete.
Zin kembei laion ta imbotmbot mi mataana ilala. Beso tomtom sa imar, to loŋa men mi imaŋga pini.
Tana tikewe mi tizaŋzaaŋa zin wal ta len ulaaŋa sa som na, be tikam zin mi tipasaana zin.
Mi tiraraara pu kizin be tisou zin wal ta len mburan biibi som na.
10 To timaŋga mi tipun zin ma mburan imap kat,
mi timeete su ma timbotmbot.
Paso mburan ilip kat pizin.
11 Mi tikam ŋgar la lelen ta kembei: “Anutu ikam ŋgar pa mbulu tiam som.
Pa mataana ipis kek. Irao ire yam som.”
12 Yooba, maŋga mi swe mburom pa zin wal sananŋan mi koto zin.
Motom iŋgal zin wal ta kan koi bizin tikamam pataŋana pizin na, mi uulu zin.
13 Parei ta zem zin wal sananŋan ma matan pasomu?
Pa iŋgi tirepilpiilu ma tizzo ta kembei: “Anutu ko ipokot mbulu tiam som.”
14 Tamen nu rre mbulu ta boozomen kizin wal sananŋan.
Ŋonoono kat. Pataŋana ta tikamam pizin tomtom na, sa ike pa motom som.
Mi itum nomom ko ipokot mbulu kizin tana.
Tana zin wal ta timbot pataŋana leleene na, tipase pu mi tizem zitun ima nomom.
Pa nu uluulu zin moondo mi zin wal ta len ulaaŋa sa som na.
15 Tana punmeete wal sananŋan mburan, mi ur kadoono pizin.
Pokot mbulu kizin. Naso tizem ma imborene kat.
16 Yooba, ni ta king biibi ŋonoono. Mi ko imbotmbot se muriini peeze kana ma alok.
Tana zin karkari ta so tilek kumbun pini som, na ni ko iziiri zin pa lele kini ma tila len.
17 Yooba, zin wal ta so timbotmbot raama pataŋana na, nu ute lelen ma imap.
Mi nu ko ŋgun talŋom pizin, mi pombol zin. Pa zin wal ta kembei na, nu leŋleŋ tiŋiizi kizin.
18 Tana zin wal ta kan koi bizin tikototo zin mi tiurur pataŋana pizin na, mi zin moondo na, nu ko uulu zin ma timbot ambai, mi ur kadoono ndeeŋeŋana pa kan koi bizin.
Naso zin tomtom toono kan tipamoto zin mini som.