26
Tomtom ta iurpe itunu be ilela Urum Merere mi isuŋ
Mboe ki Dabit
1 O Yooba, nio aŋyamaana kembei aŋkam ŋoobo mbulu sa som. Aŋpa pai tio ma ambai men.
Mi aŋso nu itum tiiri yo pa mbulu tio.
Pa nio aŋpase pu. Tana ko irao aŋtop na som.
2 Yooba, nio leleŋ be tiiri mbulu tio ta boozomen. Toombo yo.
Tiiri kat ŋgar tio mi leleŋ.
3 Pa mbulu ku ta muŋaiŋai zin tomtom mi toto sua ku na, motoŋ iŋgalŋgal totomen.
Mi aŋpase pa sua ku ŋonoono, mi aŋpa pai tio ma indeŋdeeŋe men pa sua tana.
4 Nio niamŋan zin wal ta tikamam mbulu pakaamŋana na, amluplup som.
Zin wal tau tizzo sua ŋonoono som na, aŋgabgaaba zin som.
5 Pa nio aŋurur koi pizin wal sananŋan.
Tana zin wal tau tikamam ŋoobo mbulu ma tisaana kat pa nu motom na, sombe tilup zin, na aŋbotmbot molo pizin.
6 Yooba, re. Nio leŋ uunu sa isaana som. Tana iŋgi aŋguuru nomoŋ pa nu motom.
Tonabe aŋgaaba zin wal pakan, mi niamŋan ampapiliu patoronŋana ku muriini.
7 Mi leleŋ ambai pu mi aŋpakuru,
mi aŋsoyaara uraata ku bibip mi ndabokbokŋan ta ipa ndel kat.
8 Yooba, nio leleŋ ilip be aŋbot lela urum ku. Pa ina nu itum murim.
Mi mburom mi mbulu ku ndabokŋana ta zom biibi pa i, ta zzwe lela urum ku.
9 Zin wal ta tipa ŋoobo pa zaala ku na, pun yo raama zin pepe.
Kokena aŋmeete raama zin wal ta titekteege zaaba pizin tomtom na.
10 Wal tana naman sosor totomen.
Mi sombe wal pakan tikam len pat be tipasaana zin tomtom, na tiyok pa men.
11 Mi nio na, aŋpa pai tio ma ambai men.
O Yooba, muŋai yo mi kamke yo. Pa nio mbesooŋo ku tau.
12 Iŋgi kumbuŋ iparaama toono mbolŋana.
Mi sombe zin iwal biibi tilup zin pa suŋŋana, na nio ko aŋbot la mazwan, mi aŋpakur Yooba zaana ma isala kor.