5
Suŋŋana mankwoono kana: Tusuŋ Anutu be iuulu iti
Mboe ki Dabit
1 O Yooba, ŋgun talŋom pa sua tio.
Leŋ tiŋiizi tio ti.
2 Nu ta king tio mi Anutu tio.
Tana suŋŋana tio imama ku men.
Leŋ bobi tio, mi uulu yo.
3 Yooba, aigule ta boozomen, zoŋ isombe ise na, suŋŋana tio imama ku.
Nio aŋurpewe ŋgar tio, mi aŋzuŋzuŋ, mi aŋzza pa pekelŋana ku.
4 Pa Anutu, nu lelem pa mbulu sananŋana risa som kat.
Tana zin wal sananŋan tirao be timbotmbot raamu na som.
5 Mi zin wal ta tipakurkur zitun na, irao timbot su kerem uunu na som.
Pa nu urur koi pa wal sananŋan ta boozomen.
6 Yooba, nu pasansaana wal pakamkaamŋan ma tila len.
Mi wal ta titekteege siŋ pizin tomtom, mi zin ta timburmbuuru pizin tomtom na, nu lelem pizin risa som.
7 Mi nio na, nu urur lelem pio, mi muŋaiŋai yo, mi kampewe yo biibi kat.
Tana aŋrao be aŋlema urum ku.
Nio ko aŋmoto u, mi aŋlek kumbuŋ pu lela urum ku potomŋana mi aŋsuŋu.
8 Yooba, koŋ koi bizin tizaŋzaaŋa yo.
Tana kam peeze pio, mi so yo pa mbulu ku ndeeŋeŋana.
Pazal yo mi uulu yo be aŋto kat zaala ku.
9 Koŋ koi bizin na, sua ŋonoono sa iwedet pa kwon som.
Mi lelen na, bok pa ŋgar sananŋana be tipasaana yo.
Sua kizin sananŋana kat. Pa ipasansaana zin tomtom.
Mi tipakamkaam zin tomtom pa sua kizin mbuyeeneŋana.
10 Anutu, ŋgal matan mi ur kadoono pizin.
Patalli ŋgar kizin, mi kam kiizi kizin ma imiili mi ipasaana zitun.
Pa tizorzooru mi timbel sanaana kamŋana kek.
Tana ser zin ma tila timbot molo pa motom.
11 Mi wal ta so tipase pu be we ur pizin mi menderkaala zin na, zin ta boozomen ko lelen ambai kat,
mi timbombo mboe pakurŋana pu totomen.
Kuubukaala zin wal ta tiur kat lelen pu.
Naso kam zin ma menmeen zin biibi kat.
12 Yooba, nu pombolmbol zin wal ndeeŋeŋan mi kampewe zin.
Kampeŋana ku ko iwe siŋgiao pizin, mi iporoukalkaala zin.