63
Suŋŋana ki tomtom ta leleene ilip be imbot kolouŋana pa Anutu
Mboe ki Dabit Indeeŋe ni imbot lele bilimŋana ki Yudea na, itooro mboe ti
1 O Anutu, nu Anutu tio.
Nio leleŋ pu ilip kat.
Tana zoŋ ise na, suŋŋana tio imama ku be kam yo ma aŋbot kolouŋana pu.
Pa iŋgi aŋbot molo pu.
Tana nio kembei tomtom ta iwwa pa lele ta ka yok somŋana i, mi ŋgureene ikerekere ma mburaana imap kat i.
2 Pa motoŋ imilmiili pa mazwaana ta aŋlema urum ku potomŋana,
mi aŋkilaala kat mburom biibi raama mbulu ku ndabokŋana ta zom biibi pa i.
3 Pa mbulu ku ta toto sua ku mbukŋana mi urur lelem pa wal ku, ina nio aŋre kembei ilip kat pa mboti tio ta ki toono ti.
Tana ko aŋwe kwom mi aŋpakuru.
4 Nio ko aŋwidit urum pa kampeŋana ku ma ila irao aŋmeete mi aŋzem toono ti.
Ko aŋwit nomoŋ ru sama mi aŋsuŋ pu.
5 Pa mbulu ta kamam pio i, ina kembei aŋbot kini biibi uunu, mi aŋkan kini ta ambaiŋana kat ma kopoŋ isaana.
Tana leleŋ ambai kat, mi aŋbo mboe mi kwoŋ ipakuru.
6 Nio sombe aŋkenne se muriŋ na, motoŋ iŋgalŋgalu.
Mbeŋ ma ila berek na, aŋkamam ŋgar pu.
7 Pa nu ta ulaaŋa tio ŋonoono.
Nu kuubukaala yo kembei ta man ikuubukaala lutuunu bizin,
mi kalŋoŋ isala mi aŋbombo raama menmeen yo.
8 Nio aŋsekap kat ima ku,
mi nomom woono mbolkeŋkeŋŋana ta ipalot yo.
9 Mi zin wal tau tipaata koŋ be tipasaana yo na, zitun ko tisaana
ma tisula len ta wal meeteŋan murin a.
10 Ko tikas zin pa buza ma timetmeete,
mi me saŋsaŋŋan tikan zin ma timap.
11 Tana king ko menmeeni biibi pa ulaaŋa tabe Anutu ikam pini i.
Mi wal boozomen ta so timbuk sua mbolŋana mi tipombol pa Anutu zaana, mi tito sua kizin tana, na zin tomini ko tipakur Anutu zaana.
Tamen wal pakamkaamŋan na, Anutu ko ipumun kwon.