73
Mboti ambaiŋana kizin wal sananŋan itoombo urlaŋana ki tomtom ta
Mboe ki Asap
1 Ŋonoono kat, Anutu, ni ikamam mbulu ambaiŋana pizin Israel.
Zin wal ta lelen ŋgeezeŋan na, ni ikampewe zin biibi kat.
2 Nio ti, muŋgu kumbuŋ ikam ŋgiris, ma rimen mi aŋmel.
Rimen ŋonoono mi aŋtop pa urlaŋana tio.
3 Pa aŋre mboti kizin wal sananŋan ta nin izze mi tipakurkur zitun na, ambai komboono.
Tabe ikam ma motoŋ mburmbur pizin.
4 Pa zin na, titum ma kulin iŋgeeze, mi timbot ambai men ma irao meeteŋana kizin.
Mi meeteŋana kizin tomini, tire yoyouŋana pa som.
5 Pataŋana ki toono ta ikamam iti tomtom na, indeŋdeeŋe zin som.
Zin len pataŋana sa som.
6 Mbulu kizin ta tipakurkur zitun ma nin izze sorok, ina tipamaala pizin tomtom kembei ta natabu i.
Mi mbulu kizin ta tikamam sorok malmal pizin tomtom mi tipasansaana zin, ina tiswe ma imbot kat mat, kembei ta mburu kizin mat kana.
7 Tere zin na, keren indu. Pa tikam len mboti ambaiŋana kat. Tabe titum len ma tau!
Mi ŋgar ki pakurŋana ta imbotmbot la lelen na, biibi ma ilip.
8 Zin tirepilpiili zin tomtom, mi tiwirri sua sananŋana pizin.
Mi tipakurkur zitun, mi tikototo zin tomtom pa sua kizin pamotoŋana.
9 Wal tana tipakurkur zitun. Pa Anutu ta imbot saamba na, tipasansaana sua pini.
Mi tiwirri sua sananŋana pizin tomtom ta timbotmbot toono na tomini.
10 Tabe tikamam ma Anutu wal kini tomini, titoto zin,
mi tikanan la kalŋan.
11 Mi tizzo ta kembei: “Aa, mbulu ta amkamam i, Anutu iute?
Anutu kor kana, ni le ŋgar sa?”
12 Kere kat kek? Wal sananŋan, mbulu kizin ta kembei.
Len pataŋana sa som, mi tindoundou len koroŋ boozo.
13 Muŋgu nio aŋkam ŋgar ŋoobo ta kembei, tana aŋso pa ituŋ ma aŋso: “Ŋonoono kat. Mbulu tio ambaiŋana, ina aŋkamam sorok.
Parei ta motoŋ iŋgalŋgal ituŋ bekena leleŋ iŋgeeze, mi leŋ uunu sa isaana som?
14 Mi iŋgi Anutu ikam yo ma aŋrre yoyouŋana pa mbeŋ ma aigule.
Aigule ta boozomen, zoŋ ise na, ni iballis yo men.”
15 Anutu, ŋgar tio sananŋana tana, sombe aŋswe ma ipet mat,
so aŋpasaana zin wal ku, mi aŋpakankaana ŋgar kizin.
16 Tana nio aŋkam ŋgar boozo kat pa mbulu ta iwedet pizin wal sananŋan, mi aŋrru ka ŋgar. Tamen aŋrao som.
Pa ike pio. Tabe ikam ma leleŋ ipata kat.
17 Kaimer aŋlela urum ki Anutu mi aŋsuŋ.
To ŋgar tio ipet, mi aŋkilaala mbulu tabe ipet pizin wal sananŋan pa kaimer i.
18 Ŋonoono kat, nu ko ur zin la zaala sipirpirŋana,
bekena kam zin ma timelmel mi tipun kat zin.
19 Ko karau men mi pambiriizi zin.
Ko yaŋgwiiri zin ma tila len. Tana tomtom ko tire mi timoto.
20 Merere, nu sombe maŋga mi pambiriizi zin, nako timap kat.
Zin ko kembei koroŋ ta tere la miuŋana na.
Sombe tamaŋga pa mankwoono na, imbiriizi ma ila ne kek.
21-22 Indeeŋe ta motoŋ mburmbur, mi leleŋ iŋgis na,
aŋkam kat ŋgar som.
Nio aŋtalli pu kembei mbili ta le ŋgar somŋana i.
23 Tamen nu zem yo som. Nu mbotmbot raama yo totomen,
mi teege nomoŋ woono mi kiskis yo.
24 Nu pazalzal yo be aŋto ŋgar ku.
Mi kaimer, nako pakur yo, mi kam yo ma aŋbotmbot raamu ma alok.
25 Nio aŋkam ŋgar pa koroŋ toro sa ki kar saamba som. Nu itum tamen!
Mi iŋgi nu mbotmbot raama yo, tana aŋru leŋ koroŋ toro sa ki toono paso?
Pa nu itum tamen, ina rao pio.
26 Sombe ŋgar tio ikamam be isaana mi mburoŋ izzu,
na Anutu ko ipombol yo mi ikis yo.
Tana nio aŋre Anutu kembei koroŋ tio ŋonoono kat.
27 Zin wal ta so lelen imbot molo pu, nako tisaana ma tila len lup.
Mi zin wal ta so tipizil ndemen pa sua ta timbuk ima ku, na nu ko pasaana zin.
28 Mi nio, sombe aŋbot kolouŋana pa Anutu, na leleŋ ambai kat ma ilip.
Pa aŋpase pa Yooba Anutu be iwe ur pio mi imenderkaala yo.
Tana ko aŋzzoyaryaara uraata kini boozomen ta ni ikamam na.