81
Merere leleene be zin Israel tiur kat lelen pini
Mboe ki Asap
1 Leleyom ambai pa Anutu mi kombo mboe pini. Pa ni ta ipombolmbol ti.
Menmeen yom pa Anutu ki Yakop, mi kalŋoyom isala ma kapakuri.
2 Kamaŋga mi kombo.
Mi keyelyel kakaaba,
mi kupun koroŋ matakiŋa bekena kepeŋgeeze mboe.
3 Sombe puulu popoŋana ka suŋŋana, som puulu ilup ma iwe munŋaana na,
kiwi twiiri ma kalŋaana biibi.
4 Pa mbulu ta kembei, ina ito tutu ta Anutu iur piti Israel pataaŋa kek na.
Anutu ki Yakop, ta ikam tutu tiŋgi piti be toto.
5 Indeeŋe ta ni imaŋga pizin Aikuptu kan na,
ni iswe tutu tiŋgi piti Israel.
Nio aŋleŋ kalŋaana ta imar. Mi muŋgu mbulu sa ta kembei ipet pio som. Tabe ikam yo ma aŋkankaana. Iso ta kembei:
6 “Nio ta aŋtatke mburu tiom pataŋana pa regeyom,
mi aŋkam yom ma keteyom su pa uraata ta kakamam na.
7 Indeeŋe ta kombotmbot lela pataŋana biibi leleene mi kataŋroro yo be aŋuulu yom na, nio aŋmar mi aŋkamke yom.
Mi aŋbotmbot lela miiri tieene, mi lele ikuruŋruŋ ma aŋpekelkel kwoyom.
Mi aŋtoombo yom su yok bukbukŋana Meriba bekena aŋute: Ko keleŋ la kalŋoŋ, som som?
8 O niom wal tio, keleŋ sua tabe aŋpazal yom pa i.
Niom Israel, sombe kuŋgun talŋoyom pa sua tio, so ndabok!
9 Kozo kembeeze pa merere toro sa pepe.
Tana kelek kumbuyom pa wal pakan merere kizin pepe.
10 Pa nio Yooba ta Anutu tiom.
Nio ta aŋkam yom ma kezem Aikuptu.
Tana kwoyom ikaaga. Naso aŋparaurau kwoyom be kapakur kat nio zoŋ.”
11 Tamen wal tio Israel tileŋ la kalŋoŋ som.
Mi lelen be timbot la kopoŋ mbarmaana som.
12 Tanata aŋzem zin ma tikam zooroŋana irao zitun lelen mi ŋgar kizin.
13 Mibe tileŋ la kalŋoŋ
mi tito zaala tio, so ndabok!
14 To loŋa men mi aŋkoto kan koi bizin,
mi aŋpun zin pa ituŋ mburoŋ ma timap.
15 To zin wal ta tiurur koi pio na, tilek kumbun pio raama motoŋana biibi,
mi tikam kadoono kizin sananŋana tabe imbotmbot se kizin ma alok.
16 Tamen zin Israel na, nio ko aŋkam kan kini ambaimbaiŋan be tikan ma kopon bok.
Mi aŋkam bigil suruunu ma ireere pa pat be tiwin ma tirao.