90
Merere imbotmbot ma alok. Mi iti tomtom na, tombot ma molo som
Suŋŋana ki Mose, ta Anutu tomtom kini na
1 O Merere, ta muŋgu muŋgu mi imar na,
nu we ur piam mi menderkalkaala yam.
2 Muŋgu kat, indeeŋe zin abal tipet zen mi nu kam toono ma ipet zen na, nu mbotmbot.
Mi koozi ma kaimer tomini, nu ko mbotmbot.
Pa nu Anutu ta mbotmbot ma alok.
3 Mi niam tomtom na, musmuuzu ki toono men.
Tanata nu zzo piam be amilmiili ma amsula mini toono.
4 Pa ndaama munŋaana (1,000) ta ila kek na, nu re kembei ta aigule tamen.
Ina kembei neeri ŋonoono pa nu motom.
Ina mazwaana katŋana kat, irao kembei ta amsu ma amkeene mi ampol pa mbeŋ lukutuunu.
5-6 Nu yembutmbut swoyam ma imapmap karau men,
kembei ta miuŋana i.
Niam kembei ta manman pwoono.
Sombe zoŋ ise, na ipeele.
Beso rou mi zoŋ isula na, itoptop su lene.
7 Tana ketem malmalŋana ku, ta ikanan yam totomen.
Mi kadoono ta urur pa sanaana tiam na, isalakalkaala yam.
Tabe amoto koyam ma ambotmbot.
8 Pa mbulu tiam ta ampaŋobŋoobo pa zaala ku na, nu wwo se ndomom.
Mi sanaana tiam turkeŋan na, nu reke ma imap. Sa ike pu som. Pa mat ku izzwe koroŋ ta boozomen.
9 Tana aigule boozomen ta ambotmbot su toono na, nu ketem malmal piam.
Tanata ametmeete ma amla leyam karau men.
Swoyam na, katŋana men. Niam kembei tomtom ta iyak pa tamen mi ipas.
10 Koyam ndaama irao tomto tel laamuru men, mi ametmeete.
Mi sombe mburoyam biibi, inako amsala tomto paŋ ma iŋgi.
Mi ndaama ta boozomen tana na, amkamam uraata biibi mi ambadbaada pataŋana.
Ta kembei kembei men ma irao swoyam imap.
11 Asiŋ ikilaala kat ketem malmalŋana ku mburaana?
Mi asiŋ ikam kat ŋgar pa lelem bayouŋana, tana imototo u mi ileŋleŋ la kalŋom? Som.
12 Tana paute yam be amkilaala kat ta kembei: Mboti tiam isu toono ti na, molo som.
Naso amkam ŋgar ku ma imbol la leleyam.
13 O Yooba, ŋiizi na tooro ŋgar ku mi motom miili piam?
Pa niam mbesooŋo ku tau. Tana lelem isaana piam.
14 Zoŋ isombe ise na, zeebe yam pa kampeŋana ku. Naso leleyam ndabok.
Swe mbulu ku ta toto sua ku mbukŋana mi urur lelem pa wal ku.
Naso ambombo mboe raama menmeen yam ikot aigule ta boozomen.
15 Muŋgu nu urur pataŋana bibip ise tiam. Mi buri na, amsuŋu be potor leleyam, mi kam ma leleyam ambai.
Naso pokot ndaama ndaama tau ambot ŋoobo na.
16 Kam uraata bibip be amre mini.
Mi swe mburom ramaki mbulu ku ndabokŋana pa lutuyam bizin ma tire tomini.
17 Merere Anutu tiam, niam leleyam be kampeŋana ku imbotmbot se tiam.
Uulu yam be uraata tiam ta amkamam pa nomoyam na iloondo ambai.
Pombol uraata tiam. Naso iur ŋonoono.