Mattup ere ki poone
Zaŋ
yi riiŋe
Eŋ urzi kʼono ɗoŋ kun tʼoone adda mattup ettiyo
Ette «Mattup ere ki poone Zaŋ yi riiŋe». Zaŋ yi riiŋe mattupiyagi paat: «Rabila Majjaanawa kʼIsa Zaŋ yi riiŋe», «Apokalipse» wo mattupiyagi ɗoŋ aɗo a biza tuddaŋ. Ti diine kane ɗoŋ aɗo geŋ, ette mattupadí ere ki poone.
Ti kaaga geŋ, i dʼede ɗoŋ oŋgo an di lohito ono, an dʼeesiyo, Isa Almasi yoŋ an yʼehe aa wedusu geŋ, yoŋ Ulo Raa ye. Wo an di rootiyo soŋ, wede tuuku toŋ yʼaase munɗa aa addí i dehu wo Raa yi ki yʼ wolle yoŋ aa wede kʼolɗiko ye. Kono kamo Zaŋ yʼan di riiŋe a ɗoŋ i ziipe addaŋ a Isa, an di suune keren̰ Isa miŋ yoŋ wee wee, wo yʼan di ruute soŋ, ki kotto lekkiyo ere ki daayum todʼte ede, wo yʼan di gize mummino kee wede kʼa ti tʼoone me. Wede tuuku yi ziipe addí a Isa geŋ, lekkiyo gette yʼa ti tʼoone. Wo a ɗuwo yʼan di ruute sey, ti Raa wo ti Ulí Isa an aa ti ketto kaŋ soo, wo Raa an di yʼ geyye ti ɗoŋ pay i ziipe addaŋ a Isa. An iza iŋkino maŋ, ki kotto an di suuna adda kʼaddaŋ an tʼoona lekkiyo ere ki daayum.
1
Wede an yi waaku Ono yi dʼeliyo lekkiyo
1 Kun ollo mattup ere ay un raaŋiya ette a tukki wede an yi waaku Ono yi dʼeliyo lekkiyo, yoŋ geŋ wede tʼume kʼeesiyo sulɗi pay yoŋ ede to. Yode geŋ ay yʼilliga ti kuudey, ay di yʼ wulle, ay yi wulle tʼedayey ŋoo, wo beezey toŋ yʼa yi butte.
2 Aame wede i dʼeliyo lekkiyo yʼiido yʼa gize tuddí geŋ, kaye ay di yʼ wulle. Kono kamo ay un di kazita rabiladí, rabila ki yode wede i dʼeliyo lekkiyo ere ki daayum, yoŋ yi likke a sirpa Meega Raa, aŋkeŋ Raa yʼin ti yʼ gize.
3 Munɗa wede ay wulle wo ay illiga ti kuudey geŋ, a kune toŋ ay un ti yʼ kaza, kono kune ti kaye in lekkiyo kettiyo kaŋ soo. Wo lekkiyadiŋ kettiyo kaŋ soo gette, todʼte ti Meega Raa wo ti Ulí Isa Almasi.
4 Geŋ kaye ay un raaŋiya iŋkino, kono kine pay addiŋ a ôona tʼuŋsuwo.
Raa yoŋ toore
5 Raa geŋ yoŋ toore, munɗa zimolo di yode umbo. En̰n̰o ono ɗoŋ ay illiga ti bize kʼIsa Almasi me, wo ay un tiʼn kaza.
6 Aame kine inʼde in lekkiyo kettiyo kaŋ soo ti Raa wo in sooru adda zimolo maŋ, geŋ kine ɗoŋ lohito kʼono, in ki sooru a urzi wede ɗerec ye.
7 Wo ɗe aame in sooru adda toore aakede yode batum adda toore geŋ, in di lekka pay kettiyo kaŋ soo, wo puuzo kʼUlí Isa tʼin diʼn isa kamilen̰ tʼolɗikadiŋ pay te.
8 Aame kine inʼde olɗiko in kʼisiyo ye maŋ, geŋ in daggiya tuddiŋ, munɗa ɗerec di kine umbo.
9 Wo aame kine in tʼooɗibe addiŋ a olɗikadiŋ maŋ, yode Raa toŋ yʼin tʼisa tambobino a olɗikadiŋ te, kono yoŋ wede ki diine, yi seeɗu zakiɗi a munɗa wede yi ruute yʼaasa: iŋkino maŋ yʼin tʼisa tambobino a olɗikadiŋ, wo yʼin diʼn isa kamilen̰ ti sulɗi ɗoŋ pay ulpi.
10 Aame kine inʼde olɗiko batum in kʼize ye maŋ, geŋ Raa in ti yʼize wede lohito kʼono, geŋ onamí adda kʼaddiŋ umbo.