Job
38
1 Ja Yahweh ilangaling wukaj tuka warriwawan la iminy nuyu Job,
2 “Job, nuyi yunyi kuntakajpun tuka ngapi kiki nganamin.
Nuyi ta kannginka kapin ja kalajarr ja arrarrkpi.
3 Kayirrkapa, anpangulinngulin angkat kapin ja nulatparlangkat ja arrarrkpi
murnin ngapi kunpalakajpun la nuyi nganpalakpa!
4 Ngapi ngunguliny wukarrayirrk kunak.
Ta nungpakapa nuyi marrik ankangalinga ta waka la nuyi marrik kungpurruni tuka ngunguliny.
5 Ngapi ngungunmakpan ta wukarrayirrk kunak, kinymalkpa muwarn la kinyuryi muwarn, la muj wungijalk akut la mantanti akut.
Malany yurnu ngungunmakpa.
Nuyi marrik kunuka kungpurru!
6 Ngapi ngawarlkung ta kunak ngungarnakatinkiny,
tuka ngurakan ngungutpan ta waryat la ngimajrtal ngunguliny.
Nuyi marrik kunuka kungpurru!
7 La pata wirlamurrk warak kiyirtpirrakenka kamajpungkinka amirawning,
la muj pata wingurlyak angels pata God nuyu wenet aminang marrmarr la awulajantung.
Nuyi marrik kunuka kungpurru!
8 Malany ta kurrula angmalkpanyka tuka kunak,
la ngapi ngiwirtatiny ja kurrula tuka angminy rlulka tuka kunak.
9 La muj ja inmik anilakpuyantiny animajput kirrk wurlmutpurlmut.
10 Kayirrk la ngungutpan tuka kiniwuta aril ja kurrula la ngungmajput.
11 Kayirrk la nganginka ngaminy nuyu ja kurrula,
“Nuyi anpanaga kani ora la marrik kungparlkijpay ta kani!
Ja nuyi nuwu ja nulatparlangkat ja marrngarla iwalakujpin kanipa!”
Job, nuyi marrik kunuka kungpurru!”