15
Pata arrarrkpi iwumany parak ja Jesus tuka kangpunma
(Matthew 27:1-2,11-14; Luke 23:1-5; John 18:28-38)
1 Malany ta ngulamngulam pata arrarrkpi pata awukenang pu pata Jew awaning ngarlakarlak tuka kiki awanamin nuyu ja Jesus. Malany wenatapa pata awukenang pu ta awulangaling mulil, la pata awunpukikang ta wulatpiyi wu la muj pata wimunpimun. Malany wenatapa iwuwutiny ja Jesus la iwumany parak yarran juju warak tuka ilangaling ja arrarrkpi ja ingurlaj Pilate ja Roman yukenang pu. Wenatapa iwulakajpung Pilate pa iwanini yatjat ja Jesus.
2 Kayirrk la ja Pilate inilakajpung, “Kurlingka nuyi ta kannguken wu pata Jew arrarrkpi awk?”
Kayirrk la Jesus inilakpany, “Nungpaka ta anminyka.”
3 Pata awukenang pu ta mulil wu pata Jew arrarrkpi iwurtjung ja Jesus la aminy nuyu ja Pilate, “Nuka iminang ta nungmurrunti.” Malany ja Jesus marrik muj inginkanyi.
4 Kayirrk la ja Pilate iminy nuyu, “Anngalyunyi wu ta kiki kamin. Kunuka nuyu nuyi marrik annginkay ta nuyi wiyu nuwu?”
5 La ja Jesus marrik muj inginkanyi, malany ja Pilate iwurlkpalangkeny.
Pilate iminy pu pata anpulirri ta iwarnaken ja Jesus tuka warlk
(Matthew 27:15-26; Luke 23:13-25; John 18:39—19:16)
6 Ta angpuning jungkarra la jungkarra tuka mulil angpatpang wungurlaj Passover, ja Pilate iminang akut kunuka yirrik ta wungurlyak wu pata arrarrkpi kapa Jerusalem. Yanat inimalkpangung yarakap ja arrarrkpi tuka iwaning iwutikinang.
7-8 Malany tuka Passover angpatpang pata Jerusalem arrarrkpi tuka iwuyarruning parak ja Pilate la iwulakajpuning pa inimalkpangung yarakapju ja arrarrkpi ja iwutikinang imalkpangung la yangkung. Ta iwuyarrung parak ja Pilate malany ja Jesus wakapa akutju ilangaling. Wakapa akutju ja arrarrkpi ja awuniwuning wera pata arrarrkpi ja ingurlaj Barabbas iwaning iwutikinang. Malany yanatapa awaning awutikinang rtil pata jawirna nuyu murnin awuntuwuning pata anpulirri.
9-11 Ja Pilate wularrut aniwurruning pata awukenang ta Jew awulangaling mulil awk nakapa iwarnamangung ja Jesus malany nungpakapa iwumany parak nuyu ja Pilate. La wenat angkumiyarmangung Pilate iwaniwun. Malany arrarrkpi pata tuwuran Jerusalem iwulakajpung ja Pilate ta iwanimalkpa yarakap ja iwutikinang iwamalkpa iwana, la iminy, “Aku. Kurlingka marrik Jesus imalkpang ying, nukapa ja arrarrkpi ja kutpin ja kiwken nuwurru nuwurri ta Jew arrarrkpi awk. Malany nuwurri kiki kutpin?”
La pata wulatpiyi awukenang awunpuyurrngpukpung pata arrarrkpi, la aminy nuyu ja Pilate, “Makiny! Naka ja mungu! Ngarri kurrunmiyarma kuwamalkpa Barabbas iwamalkpa iwana tuka iwaning iwutikinang.”
12 Kayirrk la ja Pilate iminy, “Malany kiki ngarrunmiyarma nganamin nuyu nuka ja arrarrkpi ja kutpin kiwken nuwurru ta Jew arrarrkpi awk?”
13 Kayirrk la mampularraniny kirrk, “Kurriwuni! Kurryarnakena tuka warlk la kurriwanarutpa iwamaju!”
14 Kayirrk la Pilate iminy, “Kunuka nuyu? La kiki iminy ta nungmurrunti mira?”
La marrik muj awalyunyi, la wenat mampularraniny murr mira, “Kurriwuni! Kurryarnakena tuka warlk!”
15 La ja Pilate marrik muj animiyarmanyi lirri, pa nungpakapa iminy puka pata napulurrumpi angkumiyarmany. Yanat inimalkpany yuran Barabbas tuka iwaning iwutikinang la iminy pu pata Roman anpulirri ta iwanawun pilkuj Jesus. Malany ta warrwak ta angkuwularrung tuka iwuwuning pilkuj, Pilate iminy pu, “Kurryarnakena tuka warlk la kurriwanarutpa iwamaju.”
Pata anpulirri iwuwung namarlaja ja Jesus
(Matthew 27:27-31; John 19:2-3)
16 Malany pata anpulirri iwumany parak ja Jesus wukaj tuka mingkaga tuka Pilate nuyu ta kunak. La awulajantiny pu pata tumatpa wiwalu pata anpulirri awurlgeny parak wakapa tuka mingkaga.
17 La wenatapa iwuyarniliny ja numalal mira ja manpurrwa ja Jesus kapin ja wenat awuyarniny pata wimunpimun. La muj wenat mampayawng wikurl la mampunguliny kapin ja kangpuyarni wanji pata wimunpimun. Kayirrk la mamputpan tuka Jesus wanji nuyu
18 La iwuwung namarlaja. Kayirrk la iweny kartawarrkartawarr tuka yanat kumpil nuyu la aminy, “Arta, nuyi ta kannguken. Nuyi ta kannguken wu pata Jew!”
19 La angkat iwuwuning tuka wanji warlk, la muj iwumartparruning maralngkiny.
20 Malany ta angkuwularrung kirrk tuka iwumalanymakpangung la iwartpirrantiny nuyu ja purple manpurwa la iwuyarniliny ja yanat nuyu ja manpurrwa. Kayirrk la iwumany parak tuka nungmatpa kunak tuka iwanawun iwularr.
Pata anpulirri iwernakany Jesus tuka warlk
(Matthew 27:32-44; Luke 23:26-43; John 19:17-27)
21 Malany wakapa ja arrarrkpi ingurlaj Simon yarrangung parak kunak malany ilinganka tuka karrape. Malany ja Simon nuwuran ta kunak wungurlaj Cyrene la awunnyatpang ngarrkarrk pata awunimalkpangung, wingurlaj Alexander la Rufus. La pata anpulirri iwuyurrngpukpung ja Simon manimany kit Jesus nuyu mata warlk.
22 Awarran parak tuka kunak wungurlaj Golgotha la ta kanyu warak ta wulatpiyi Iyarrmulu Kunak.
23 Kayirrk la pata anpulirri awunmakpeny nuyu iwuni Jesus ta nuntirri la ajirrik anilanyi. Malany ta nuntirri angkuwinyjamany mejijin ingurlaj myrrh. Malany Jesus marrik anilanyi.
24-26 La pata anpulirri iwarnakeny ja Jesus tuka yurnu tuka kanimarratpi la tuka kannyarlukpa tuka warlk, kayirrk la mampumajpungkuny, la iwarutpan wakapa iwamaju. Kayirrk la mamputpan warlk mata malijap yurrng tuka wanji nuyu malany angkumirrawung wakapa tuka warlk ta kunuka nuyu ta iwuwung. Malany tuka angkumirrawung tuka kangmin Ja Kiwken wu pata Jew. Malany jita muwarn inyminy rtutrtutka ta Jesus iwarnakeny tuka warlk. Kayirrk la ta warrwak pata anpulirri awuling lintij tupulu ja yanat nuyu ja manpurra.
27 La pata anpulirri awunparnakeny ngarrkarrk pata tumurrunjut tuka warlk wanyji tuka Jesus yarnting. Malany yarakap tuka inyjaku akut nuyu Jesus la jara tuka wurulwurul akut.
29 Malany yara pata arrarrkpi pata iwuwarlkijpakpangung Jesus la iwumalanymakpangung. La wakapa awulangaling angpuyirrngukuning wanji wu nuyu innyatpa wurwiny yanat. La aminy nuyu, “Nuyi kanmin mali nuyi kapanawun kapaka warak ta God nuyu ta karrpin mira ta akurkyak kurrampalk kayirrk la kapangulakan akutju ta ngarrkarrk ta ngurrij.”
30 La awulangkarlakeny nuyu la aminy nuyu, “Mapa, kiki ja nuwu wiyu anngatpa jir! La ankatpanyiga tuka kanngarnti!”
31 Malany pata awukenang Jew awulangaling mulil la muj pata wulatpiyi awunpukikang awuntumany la wemin la iwuwuning parr Jesus. La aminy pu la wemin, “Yanat awunnyatpang jir wera pata arrarrkpi la ta nuyu wiyu marrik yatpay jir.
32 Malany kimin mali yanatapa ja God inilangakanka. Yanat kimin mali ja kiwken ngarrurru, la muj kiwken wu pata Israel arrarrkpi. La makinyju! Ngarri marrik ngatpartukpu nuyu la kapin ta ngarrayanyjing ilatpangka wumarrk tuka kiwalkarin wakapa tuka warlk!”
La wera pata arrarrkpi pata awarnting tuka warlk awuntumany la wemin la iwayanayantung Jesus.
Jesus imajungan
(Matthew 27:45-56; Luke 23:44-49; John 19:28-30)
33 Malany jita muwarn inypaning yurrng akutju, ta warntatarr wungijalk, ta wugarra yirrk kunak inimany nungmutput, angminy parak kapin wupurrk akut. Malany ta inimany nungmutput ta arukaruk inyalimpulngan ta 3 oꞌclock.
34 Kayirrk la Jesus ilajantiny murr mira la yanat wiyu nuyu ta ngaralk iminy, “Eloi Eloi lema sabachthani?” Nungpakapa ta iminy, “Ngapi ngartu ja God, ngapi ngartu ja God, kunuka nuyu nganung kirrwara la nganarutpan ngapi palat?”
35 Malany yara pata arrarrkpi awulangaling wakapa awalyungan nuyu Jesus ta kiki iminy. La wenat aminy mali kilaja nuyu Elijah nuyu iwalatpaga.
36 La yarakap arrarrkpi ingurriny manimany mata kapin manjarrpin la mannyakan jaw tuka nuntirri. Kayirrk la maniwutiny tuka warlk la manimajpungkuny tuka Jesus ilakpirij nuyu iwanamin yurlk anyak. La nakapa ja arrarrkpi iminy, “Aku. La arriwanarutpa. La arriwamirlajun Elijah arriwayan iwanaga iwannyutpa wumarrk.”
37 Kayirrk la Jesus ilajantiny akutju, la imajungan.
38 Malany tuka God nuyu ta karrpin mira ta akurlyak kurrampalk kapa Jerusalem atangaling wakapa ja karrpin ja manpurrwa iling ayay aniwuning rtal tuka nyunyuk ta kunak. Malany angunminy ta Jesus imajungan, la nakapa ja manpurrwa iling ayay yarlangkeny kapawi la kapawi ngarrkarrk apa iling ayay, malany tuka yarlangkeny yurrng yarran parak wumarrk ora.
39 Malany tuka warlk, ja yukenang pu pata Roman anpulirri ilarrajpany tuka wanyji Jesus, la innyayawng ta imajungan, la nakapa ja nulirri iminy, “Aralpa mira nuka ja arrarrkpi inimalkpany God!”
Pata warramumpik angpayawng tuka kiki angminy parak
40-41 Ta wiyinirrk wigarra yirrk pata warramumpik awarrangung rtil ja Jesus wugarra yirrk kunak kapa Galilee. La iwayatayantung wakapa, kayirrk la awuran rtil kapa Jerusalem. Malany wenatapa awularrajpany warak la mata warlk malangalingka warak la angpayawng kirrk tuka kiki angminy parak nuyu ja Jesus. Jita Mary Magdalene algaj ngaw awulangaling la Salome la jita ninymatpa Mary jita inyalkpangung pu pata warrawarrwak James la Joses, pata awarrangung rtil wenatapa.
Joseph innyutpan Jesus tuka yurk
(Matthew 27:57-61; Luke 23:50-56; John 19:38-42)
42 Malany ja Jesus imajungan ta nungpakapa ta warntatarr la pata Jew arrarrkpi angpungulinnguliny angkat wu nuyu ta angkanatpi ta wungurlyak ta warntatarr wungurlaj Sabbath, malany wenatapa marrik awuyamanyi ta nungpakapa ta warntatarr. Malany ta inyuriliny parak
43 ja arrarrkpi yuran tuka Pilate. Malany ingurlaj Joseph la yanat ilinganka ta kunak wungurlaj Arimathea. La wigarra yirrk aminy nuka ja numalal ja arrarrkpi ja Joseph. La yanat animirlajuning tuka God iwanuki nuyu wiyu ta yanat ja kiwken mira ngarrurru amparrkamparrk. Malany yanatapa ja Joseph ilij nuyu kawungurrin tuka Jew Wulatpiyi. La marrik muj imurtpina ta yuran imalkpany nuyu ja Pilate. La inilakajpung iminy, “Nungmalal ta ngiwanama warak ja Jesus la ngiwangulanngula tuka ngarri warak?”
44-45 Malany ja Pilate iwurlkpalangkeny. La iminy, “Kurlingka nakapa ja arrarrkpi wularrut imajungan?” Kayirrk la inilangakan yarakap yuran inimany ja yukenang pu pata anpulirri wakapa la inilakajpung, “Kurlingka aralpa wularrut imajungan ja arrarrkpi?”
La nakapa ja yukenang pu pata anpulirri iminy nuyu Pilate, “Ee, aralpa.” Kayirrk la ja Pilate iminy nuyu ja Joseph, “Kumanyi warak ja Jesus ingijalk.”
46 Kayirrk la Joseph inimany parak ja kiwarlkparran ja manpurrwa. La inimany ja Jesus ingijalk innyakan tirip la innyutpan wumarrk tuka yarnting mata warlk la iniwutikiny nakapa ja manpurrwa. (Malany yanatapa ja Joseph yurakan aniyawung ta yurk tuka murrgu.) Kayirrk la inimany parak ja Jesus ingijalk la innyutpan wakapa tuka yurk. Kayirrk la animalanmanmany waryat ta karrkpin la animajput ta yurk.
47 Malany wenatapa pata warramumpik, Mary Magdalene la ninymatapa Mary jita inyalkpany nuyu Joses, malany wenat iwayawng ja Joseph ta innyutpan ja Jesus ingijalk.