44
Juujapju-jananya wajarnu, “Nganakunyurra ngulyulu manu kaapu?”
Julyjujanu 44:1-34
Mayangkaya yawujayiti nyinapayi, ka Juujapjura wajarnu palumilingka warrkamupurlukangka, “Payikiparaku-janampa jurra! Kujungkalun junku ngayumili kaapu kunyjunyu, Pinjaminmilingka, payikingka. Manikajan marlaku junku palumilikajangka payikingka.” Palunyangka warrkamupurlukalu yanu mirrka junu. Payikikaja pilamapurnu, manilurrju. Yungunpa Juujapmili kurtararranpakamu Pinjaminpaya tatira yanu tangkikajangka, parna Kayinankarti.
Juujapmili warrkamupurlukalu wanarnu-jananya kutungka marrkurnu, “Ngayuku maajalu-nyurranya ngampurrmankupayi. Nyaakuranyurra ngulyurnu kaapu kunyjunyu, maajakurnu? Nyuntunpanyurra kurntaparni.” Kaya palunyajanu kulirnuya ngurlurringu. Wajarnuluya, “Mirtalajura ngulyulu manu, ngurrpalaju. Kurlu majala!, parralajura nyaku. Yiipi palunyamilingka payikingka ngarrini, palunyangalaju palu mitu pungku. Ka karlki kujupalajura warrkamupurluka wulu nyinaku, nyuntumili maajaku.”
Warrkamupurlukalu-jananya wajarnu, “Kurlurna-ngkuya wajalkura. Ngulyupurlukawiyajura warrkamurriku maajaku, karlkinpanyurra marlaku ngurrakarti yanku.” Juujapmili warrkamupurlukalu yarlirnu-janampa kurtakajaku payikiparakungka. Purtu-janampalura nyangu. Kayilapara yanu nyangu nyirti Pinjaminmilingka payikingka. Yarlirnu nyangu ngarripayi payikingka kaapu palunya. Nyangukaluraya jukururringu kaapu paluku.
Kaya palunyajanu marlaku yanu parna Yijipikarti, Juujapkurnu ngurrakarti. Ka pakarnu-jananyaya nyangu, Juujapjukamu palumili warrkamupurlukakajalu. Kurtararranpaluya yanu ka Juujapja maaja majungka pupatingu. Juujapjulu wajarnu warrkamupurlukangka. Palunyajanu-jananya wajarnu wirrilyilu Juujapmili warrkamupurlukalu, “Pakalaya ngara! Nganakunyurra ngulyulu manu kaapu ngayukurnu maajakurnu?” Juujapmili warrkamupurlukalu-jananya wajarnu, “Ngaarna-ngkuya marlangu ngalulku, karlkinpanyurra yanku marlaku!”
Ka kurtararranjuluya wajarnu, “Manku-lanyajun kujungkalku, palunyajanu-lajungku warrkamurriku.” Juujapmililu-janampa wajarnu, “Paki, kujuwiyajulaju ngalulku, jumajilura ngurrajanu ngulyurnu kaapu.” Juutalura Juujapku wajarnu jilanya, “Maaja! Kulilarni! Nyuntun maaja maju nyininpa ngaakuran parnaku. Kulilarni wirrilyiparnilu! Julyju-lanyajun wajarnu katikura-lajungku ngayurtinmili marlangu. Nyurilulajura japilpayi mama Pinjaminpa yiyalkura, maaja yankura nyakura. Yiipilaju Pinjaminpa junku yanku, palunyajanu mamalu kulilku ka miturriku, jumaji ngurra kujupangka nyininpa Pinjaminpa. Ngayurnangku warrkamurriku, kan yiyalku Pinjaminpa. Palunyangka mama palya nyinaku. Ngayurnangku wulu warrkamurriku ngaangka, Yijipingka.”