10
Dago te tibo god dabe wali pelamuo
1 Ama dedeo, dage ede gegeda pelamuo: dago wąį dabe tigidali te bidi meni yai dwai bulude bilibadi augwali te dagalu pǫ dologode bugagia bidali. Tama augwali tigidali te sągągo naga pelama, tama te tamu ąį nogeyu sana pai dao.
2 Tama tigidali augwali te pǫde tamu ąį side baptais sali tiwai yali, tama te baptais saligo augwali te Moses wali pomainogo sa muani.
3 Tama augwali tigidaligo te Godigo Tedali Mobo Bidigo augwali mani te nai nogi mana augwaligo tuai dao.
4 Tama augwali tigidaligo te Godigo Tedali Mobo Bidigo augwali mani ąį te augwaligo tuali. Awe, augwaligo te Tedali Mobogo te genuai sau pado masigidu asobo ąį tuali, te masigi augwali dali hodobo pai. Te masigi te Krais aga digi dao.
5 Te Godigo te tobage tau sabo sę tigidali augwali dali yali goli, agai te we bidi dago wąį dabe hauwa tomode augwaligo kolesaga te Godigo godolo me isiąwani. Mu menio. Magi baso meni. Dago koneai, augwali umabo te bidi meni yai bulude isilama, tama augwaligo tigi tede besela palama, wilalua pali, te bidi si sela naga bugagia sana pali.
6 Tama te augwalide pedalali sę tigidali te noma tiwai pedalali, te dago sulama tama dago wąį dabe augwaligo te pesą yali tiwai te dago me te dwai sęde pesą idali weyu dago sumainogo yali.
7 Tama suyu, tama dagego te tibo god dabebolo lotu po munu me wagimio, te augwali tomode mebago yali sę tiwai me egio. Te bukude te augwaligo te tibo god dali yali sęde e po wai dao: “Te we bidi augwali dualama te nai tuyu wę tuyu elama, tama augwali hogodama tama augwaligo tęąbi yali.”
8 Tama dago me te penani ebo kolesaga me egimio, te augwali tomode mebago te yali kolesaga tiwai me egio, tama deli sogo naga te bidi sese umabo te 23,000 bidi te augwali isai dao.
9 Tama dago me dwai sę eyu te Genuai Bidi usu me selamuo. Te augwali tomode mebago dwai sę eyu aga usu sobaso, tama te dwai hasamani dabego augwali gąų kelama tama augwali isai dao.
10 Tama dagego dwai homu eyu Godibolo wado po me olamuo. Te dago wąį dabe augwali tomode mebago te God dali dwai homu eyu wado po obaso, tama te bidi ela mubo ensel mobo bidigo te augwali ela munama tama augwali dolai dao.
11 Te sę dabe tigidali augwaliba pedalali, te gasa we bidigo sumainogo ebo sę noma tiwai pedalali. Tama dago me te tobage dwai sę idali weyu gasa bidi dabego te po te Godigo po bukude asęani. Magi baso meni. Te da megi bidibo sogo te tigidali nai silabo sogo pąba yagasai dao.
12 Tama tibaso, dagego duga digi bomogo bugagia dolalubo usu da homu eyu da, teda dage tulaluyu dolidali weyu dage bugagia suao.
13 Te dwai sę ilibo usu sabo sę dagebolo pedalobo, augwali tigidali te gasagi yai me egobeo. Menio. Te tigidali we bidibolo pedalobo usu sabo deli tigi poai sę pedalubao. Tama Godigo aga dage dali homugo kęą pai bidi bidiyu tama aga dąų wali po wali peyu, te usu sabo sę ebogo dagego bomo aiyaba elaluainogo ebo gogolama me sula tagalogobeo. Menio. Te dwai sę tomoba kegebo usu sabo sę dageba pedalubaso da, teda Godigo dage sana pabo tų nigilaibao. Te tų e dao: te agai dage dąų walama, tama dage te usu sabo sęde bomo elama dolalubo usu yaibao.
14 Tama tibaso, eno abagi dede dabe muo, dagego te tibo god lotu beba nai tugi pabo kolesaga wi eyu tagalama, tama te kolesaga tudiba muao.
15 Dagego kolesaga elalubaso, tama eno dagebolo te po obao. Duga digi eno pusubo po dagaliąo. Eno po e dao.
16 Te dago komunion tubaso da, dago te kapde gedu haluasa po olama tama Godibolo puba hwi po wabo dao. Te kapde elalubo wain ąį da tigidali deli deligo tubo si da, tebogo dago te bidi Kraisgo tigi kaneme dobayu tubo dao. Tama dago komunion tubadi, dago te dwasianu pebedama dobaba pabo bret, dago te bret tubo si da, tebogo dago te bidi Kraisgo tigi mi dobayu tubo tiwai ebo dao.
17 Te komunion tubo bret te deli naga elalubao, tama da we bidi hauwa elaluali goli, te tigi delide naga wadolali elalubao. Magi baso meni, da tigidaligo te bret deli naga tubo dao.
18 Dagego te Israel dabe augwaligo yali kolesagade homugo kone palao. Godigo augwaligo yali dwai sę sela sąwainogo eyu, tama augwaligo te sipsip dali meme dali selama, tama te pris bidi dabego nogoba mawai. Tama menama, tama te pris bidi dabego te nai dabe ela munama, tama te mi te alta sai ugwadu daiba muyu, tama siago uluyu, tama Godibolo ofa tama mawai dao. Tama tiyu te nai sesali bage dali, te pris bidi dabe dali, augwali tigidaligo te altade ofa mani nai tuyu deli hani naga bidiyu tama bidali.
19 Eno magi homu elama tama te po waliwe? ‘Te tibo god me aga mu bidibao, te agabolo ofa mabo tubo nai me te sęgę nai mu dao,’ eno te tiwai homu elama te Israel dabego Godibolo ofa mabo kolesagade po waliwe?
20 Mu menio. Eno wali po page e dao: te Godigo po odisąwai bagego augwa alta saide ofa ebo nai, te augwaligo dwai haubo noma bidi dabebolo te ofa mabo dao. Augwaligo te Godibolo ofa me mabeo. Tama dage te dwai haubo noma bage dali deliba sisinibo te eno godolo me egobeo, ena mu hagelabo.
21 Dagego te dago Genuai Bidi Kraisgo kap wain wę tuyu, te dwai haubo noma bagede lotu wainogo eyu augwaligo kapde dali si wę tuyu ebo usu me egobeo. Te dagego dena Genuai Bidigo ni nami tebol saide nai tuyu, te dwai haubo noma dabego lotu bede tebol saide nai dali si tuyu ebo te usu me egobeo.
22 Dago augwaligo te tibo god bagebolo ofa mani nai tuyu da, teda dago te Godigo da dali dwai homu ebo sę ilaibao. Dago bomogo agai bomo aiyaba elalubo da, agawe? Te dago bomo usu menio.
Tigidali sę ebogo dago Godigo nogi ugwaba sao
23 Dage tomode bidi mebago e po obao, “Te mi tubo kolesagade te da olo bidibo dao, tede habu selebo po meni. Dago te mi tuyu da, tebogo dago Godigo bomo yai po me bologobeo,” augwaligo te po wabo dao. Awe, mu tama. Tiali goli te tigidali sę ebogo da tau me sogobeo. “Te haniani sę hauwa dago yabo te usu dao,” augwaligo te po me wabo dao. Tiali goli te tigidali sę ebogo da God wali pabo bomo mabo meni.
24 Bidi me deligo aga digi naga bugagia bidabo homu me elamuo. Menio. Tigidali we bidi deli deligo te gasa bidi bugagia bidimainogo homu eyu tama augwali tau sabo kolesaga yao.
25 Tigidali haniani mi augwaligo te maketde elalubo, te dagego abela tuyu da, te usu da. Po meni. Dagego homu hauwa elama tama ‘E mi augwaligo te tibo god me delibolo ofa maniwe, ma meniwe?’ te po hanalu wagio.
26 Magi baso meni. Dago koneani, te bukude elalubo po me deli e tiwai dao, “Te e tǫde, pągąnalubo tigidali nai dabe dali, te Genuai Bidigo naga dao.”
27 Tama te Kraisba aga homu tigidali musiąwani bidi me deli agai te dage meba i olama dage dali nai tuainogo ebaso da, tama dage pabo homu ebaso da, te usu da. Augwaligo dagebolo mabo te nai tigidali dagego tuiąo. Tama dagego homu hauwa elama ‘E mi augwaligo te tibo god me delibolo ofa maniwe, ma meniwe?’ te po wagio.
28 Tiali goli, te bidi me deligo te po dagebolo weyu, “Te mi da, te ofa yai mi da” po obaso da, teda te bidigo dagebolo wali po te dagego homugo koneama, tama aga tobade dagego te nai me tulamu dao. Dwai sę dwagi yai sę dagalabo homu dolidali weyu te nai tugio.
29 Eno dagebolo te po te dagego dwai sę dwagi yai sę dagalabo homu tobade te po wabeo. Meni. Eno te dagebolo te mi tubode po wali bidi agai te dwai sę dwagi yai sę dagalabo homu tobade te po dagebolo obao. Magi baso meni, te agai homu si eyu bidibao.
Dage tomode bidi me deligo te po hanalu waibao, “Ena digi ena haniani nai tubo usu yabo digi, tama gasa bidigo te ebo kolesaga dagalabo homugo digi eno ebo kolesaga magi baso te dagalaibawe?
30 Te eno te tubo naide Godibolo puba hwi po olama te nai tuali goli, te gasa bidigo eno te puba hwi wali tubo naide te magi baso ena dali dwai po waibawe?”
31 Te dage tomode bidi me deligo te po obaso, eno e po agabolo wei ponaibao, te dagego te nai tuyu me wę tuyu ebode, ma dage gasa sę ebo si da, dagego gasa we bidide homugo koneao, augwaligo Godigo nogi ugwaba somainogo eyu dagego duga kolesaga tigidali tama bugagia tiao.
32 Tama tiyu, dagego te Juda dabe me, te Grik dabe me homugo koneao, tama Godigo po odobo we bidi hani dabe me, tama dagego ebo sęde augwaligo God dali agai po dali si dali dwai homu idali weyu, dagego duga ebo kolesaga bugagia tonaluao.
33 Ena me eno te tiwai kolesaga ebo dao. Eno homugo te eno ebo kolesaga tigidalide te we bidi tigidali augwaligo dwagi yai homu naga emainao. Tama te homu ebaso, eno ena digi naga bugagia bidabo homu me egobeo. Meni. Eno homugo te eno tigidali we bidi augwali tau siyu, tama Godigo augwali ma dobola somainogo eyu, tama eno ena ebo kolesaga tigidali tama dodolobo dao.