10
Danielgo na te wę Taigris sesegede suali
1 Te sela wabo kibu bede te Sairus te Persia king bidali side, Godigo po me deli te Danielba mawai, agai gasa nogi te Beltesasar dao. Tama te genuai dwai sogo mu pedelaibao wali, te mu po dao. Te po te na ebo tiwai agaba pedelali, tama agai te na suali sogo, agai te po page koneai.
2 Te sela wabo kibu bede Sairus te king bidali side, ena Daniel, eno te haliga sęgę dwai mu elama, tama eno te gela naga wabo sę idu, te Sarere selaba usu nani.
3 Te Sarere selade, eno te wiegi yai nai me tusiąyu, ma te wiegi yai nai hasa me deli te me tubeo. Eno te wain wę tusiąma, tama eno tobolu nisi dwasianu me dodolobeo.
4 Tialima, te namba wan polua te deli polua te dei 24de, te kibu be, ena te genuai wę Taigris sesegede dolaluai.
5 Eno te ugwaba tonobadi, tama eno te bidi me deli te nami ugwa wiegi yai beali bidi suali, tama augwaligo te wiegi yai golgo nigali kukulu muai.
6 Aga tigi te ula mu yali, te wiegi yai sawi yai masigi me deli te ula mu yai tiwai. Aga gesabidi te dagalude elalubo be sele ula tiwai eyu, tama agai gedu te sole ula tiwai yali. Agai nogo me sągą te ula mu yali, te augwaligo te brasgo nigali nai bugagia penai ula ebo tiwai yai. Tama eno odali, agai wabo po te genuai mu, te genuai we bidi hani dabego po wabo tiwai yalio.
7 Ena deligo naga eno te nai te nade subo tiwai yai. Te ena dali bidali bidi dabe augwaligo te magi nai deli me subeo, tiali goli augwali wi dwai mu elama, tama augwali wi pelama, duala sigi pai.
8 Tama ena duba deli naga bidiyu, tama eno te nai suali te gasagi yai sę tedali mu yai. Eno te nai te nade subo tiwai elama, tama eno bomo tigidali te sia selama, te eno gesabi te mu gasa me hasegelai.
9 Tialima, eno te bidigo po wabo odali, tama eno agai dogonide po wabo odobo sogo, eno gedu gęǫ page elama, tama ena te tǫba degasa dulama, te ena isai bidi tiwai elama, tama ena gesabi tǫba ponama, pila muai.
10 Tama eno odobadi, te bidi me deligo nogogo ena nogo tulama, te ena ugwaba hodolali, tama eno nogo me sągą si te tǫde poąluyu, dolaluali. Tiali goli, ena wi edubadi, tama ena didibili idualio.
11 Tialima, te bidigo enabolo te tama po wali, “Daniel, Godigo nage godolo mu ebao,” wali. “Nage hodaluama, te eno nageba wainu ebo poba te nago olo bugagia muao. Godigo digi ena tagala palobaso, tama ena nageba asali,” te po wai. Agai po ola simanobo si, tama ena dolugulali, tiali goli ena didibili me idualio.
12 Tama agai po ma weyu, te tama po wai, “Daniel, nage wi igio. Te nago gagalu, te naga digi naga aiyaba elaluama, te Godigo nageba yabo sę koneainu tiali sogo, Godigo nago te gedu haluasa po wabo odama, tama ena tagala palai dao.
13 Ena polo asainu homu yai, tiali goli te bulu tǫ kantri Persia tonalubo dwai enselgo te ena geąlubadi, te dei tolaluai. Agai te tama tiali, tama te polalubo ensel me deli, Maikel, te ena tau sagasu asainu yali, magi baso meni, agai te enaduba deli naga te bulu tǫ kantri Persia king dabe dali bidibo suali, tama ena tau sabo bidi me meni yai.
14 Ena nageba te po wagasiyu asali, te nago we bidiba te tigidali nai sibi sia sabo sogo te pąde te sę pedelaiba po wagasalio. Nago suali, meba nai te sogo pedelali, tiali goli megi eno nageba te gasa sę nosali pedelabo po ola magasali,” agai te po wai.
15 Agai te po wabo sogo, eno te tǫba tonono elama, tama eno pedauwali pania sai dao.
16 Tialima, te bidi te da tǫde bidi tiwai da, agai te aga nogo te eno pedauwaliba muai. Tama eno pedauwali dagayu, tama eno agaba te tiwai po wali, “Genuai bidi, eno te na sulama, tama ena wi dwai mu elama, tama eno bomo tigidali silalio.
17 Tama tiyu, eno magi po nageba waibawe? Ena te sę bidi me deli te genuai bidigo gedude dolalubo tiwai ebao. Eno bomo meni baso, tama eno po wabo mobo meni yai,” eno te po wai.
18 Tialima, te bidigo ena ma tola selama, te ena bomo pedelali.
19 Tama agai enabolo te tiwai po wai, “Godigo nage godolo mu ebaso, tama nago haliga nagame igulama bidao, tama nage wi me igio. Nage bomo elama, dolaluao,” wali.
Agai po ola siminama, tama eno bomo genuaiba mu eyu, te agabolo te po wali, “Genuai bidi, megi nago enaba te nai dabede po wao, magi baso meni, nago ena bomo ilali dao.”
20-21 Tama agai te po wali, “Nago koneani, magi baso ena nageba asaliwe? Ena asali, eno te Mu Po Wabo Bukude Asęani Po meba pusagasu ula tegelagasalio. Tiali goli, eno sesabi elama me bidigobeo. Te ena polo ma pelama, tama te bulu tǫ kantri Persia tonalubo dwai ensel dali hwįgi paibao. Tama te hwįbo silibo si da, te bulu tǫ kantri Grik tonalubo dwai ensel sabolaibao. Te de me deligo ena tau me sabe, Maikel, te dage Israel dabe tonalubo ensel, te agai deligo naga ena tau sabo dao,” te po wai.