7
1 “Eno te Israel dabe usu ma ilama,
te augwa sę tigidali te wiegi yai
pedalumainu ebo sogo, tegoba,
eno te augwaligo dwai kolesaga naga suali,
tama te Samaria bage augwaligo yali
dwai sę dabete pebeli dilide elalubo suali.
Augwaligo te abagi dabe tibo po ola mayu,
tama augwaligo te be aluama,
te doado bage wi siyu yai.
Tama augwaligo te bidi dabego doado bage
te taun sunumide anoma eyu, kekelama siyu yai.
2 Eno augwaligo ebo kolesagade
homu kone me gegeda palogobeo. Menio.
Tiali goli, augwaligo te sę yali homu kone palisąwai.
Te augwa ebo dwai sęgęgo te augwali mesegelali,
tama sesemane sogo eno te sęgę naga
sudu gebo dao.”
Genuai Bidigo te po wai.
Augwaligo te dwai sę yabo po miani
3 Genuai Bidigo te po wali,
“Te meba we bidigo te haniani
dwai kolesaga yabo po minama,
tama augwaligo te king,
me aga ofisa dabe dali homu bega sabo po weyu,
tama augwali tibo po ola mabo dao.
4 Augwali te tibo po wabo bidi dabe,
tama augwaligo haliga te kingba mu mubeo.
Tama augwaligo haliga sębę ebo te geme dualama,
te sia ula dwasianu idubo tiwai iduali.
Te bret ulubo bidigo te sia ula ilama,
te bret bo domainu elalueibao.
Bret bo dabo si da, teda agai te sia ponama,
tama te sia ula genuai yaibao.
Augwaligo haliga sębę te tiwai elalubo dao.
5 Te kingo nai daa tubo side,
augwaligo te king aga ofisa dabe dali
te bomai wę hauwa tumainu yaibao.
Tama king me, aga ofisa dabe dali,
te gęǫ page elama, te tobolu kolesaga meni yaibao.
6 Te u bidi dabe augwa dwai sę yabo homu kolesaga
te sia posolo ebo tiwai ebao.
Te hulide augwaligo haliga sębę ebo te sia
dwasianu dabo tiwai ebao,
tama te hano naga pedalu dali.
Tiali goli, te kigamu te bogoli ula genuai
elama, ebo dao.”
7 “Augwaligo te wado po olama,
te deli deli pedalubo king ela muyu iduali,
te augwa tobolu bidi dabe dali te tama tiai.
Te dwai kolesaga augwa bulu kantri tǫde elaluali,
tama te bidi me deligo enaba
gedu haluasa po weyu me ebeo,”
Genuai Bidi Godigo te po wai.
Te Israel dabego homugo te gasa kantri tǫ bagego augwali tau saibao homu yai
8 Genuai Bidigo te po wai,
“Te Israel dabe gasa hani dali kęą pelama,
te augwa kolesaga wali pali.
Te augwaligo kolesaga te usu ebo meni,
te bret bugagia disąbo tiwai yai.
9 Te Israel dabe augwa te kolesagago
te augwa digi bomo tamunani,
tiali goli augwaligo te konesiąwai.
Awe, augwali te monu dabe bomo meni yai tiwai yali,
tiali goli augwaligo te me konebeo.
10 Te Israel dabe augwa hagoma ebo
kolesagago digi augwa po tų ilali,
tiali goli te augwa homu begelama,
te augwa Genuai Bidi, God enaba ma asobeo.
Mu tama, augwaligo ena kegasa asobeo.
11 Israel te kolesaga meni yai umunaluai ba hi
subigila bola bilibo tiwai ebo dao,” wai.
“Hasia bolo augwali pelama,
te Isip dabego augwali tau sogowe weyu,
hanalugi pali,
tama nosali augwali pelama,
te Asiria dabeba me hanalugi pai dao.
12 Tama augwali te bola pabo sogo,
teda eno ba sabo wa te ugwaba sąwaibao,
augwali tola somainu yaibao.
Te augwaligo dwai sę emainu deliba sisinibo si,
te eno augwaliba te augwa yali
kolesagade dene ilaibao,” wali,
“te augwaliba eno polobadu wali po
gilama tiwai yaibao,” wai.
13 “Odiąo. Te augwali dolomainu yaibao.
Augwaligo ena tagalama, te enaba hagoma yali.
Tama tibaso, eno augwali dolaibao,” wali.
“Hasia bolo eno augwali tau sainu yali,
tiali goli augwaligo tibo kolesaga enaba yalio.
14 Augwaligo tibo gedu haluasa po enaba wabo dao.
Tama augwali te tǫba degasa dulama,
tama te dwai gela te Genuai Bidigo
po odisąbo bidi haiden dabego wabo tiwai ebo dao.
Te augwaligo nai me wain ąį sainu
gedu haluasa po wabo sogo,
te augwa digi augwa tigi dabe ge hwągo togobo,
te haiden eno po wali pisąbo
bidi dabego ebo tiwai ebo dao.
Augwaligo ena dali hagoma mu ebo dao.
15 Mu tama, ena digi eno augwali tau sali,
te augwali genuai elama te dili emainu ilali,
tiali goli augwaligo te enaba dwai sę
wei ponabo po mia salio.
16 Ena da te Ugwadu Mu Bidibo God mu dao.
Te sęgę pedalubo sogo te augwali enaba aselama,
te eno augwali tau somainu ebeo. Menio.
Augwa te bomo meni yai nai dabeba naga pali.
Augwali te dwai enego te nai enani
geda mubo tiwai yali.
Te augwa polalubo tobolu bidi dabego
te augwa bomogo digi te boi bidi
aiyaba elalueibao tiwai po wai.
Tiali goli, te menio.
Te hwįbo side augwali isibaso,
te Isip dabego augwali dwai gisugu mawaibao,”
Genuai Bidigo te po wai dao.