9
Godigo Israel dabe dene mawaibao
1 Israel dabe, dagego te wiegi yai kolesaga
wali pisąbo te haiden bidi dabego ebo kolesaga
te dagego te genuai nai daa tuyu,
te lotu wabo sogo ebo kolesaga tagaliąo.
Magi baso meni, te dagego duga God tudiba munama,
te dagego aga wali me pabeo.
Te tigidali badu, dagego te Balba lotu weyu,
te sunumide penani ela bilibo wego
ebo kolesaga tiwai ebao.
Tama te penani ebogo te mone sabo sę tiwai ebo dao.
2 Tiali goli, pąde sogo dage te nai sǫą peyu,
te oliv wel me wain meni yaibao.
3 Tama dage Israel te Genuai Bidigo mani
tǫde me bidigobeo.
Tama dage te Isipba kalabus ma igi peyu,
te Asiria bulu tǫba me kalabus igi paibao.
Tama te bulude te Godigo dageba
te habu selali nai dabe tueibao.
4 Dage te gasa hani dabego bulu tǫ
kantride bidibo sogo da,
teda dagego Genuai Bidiba te wain me,
kibu hasa me, te ofa me magobeo.
Tama duga naigo digi te dage God gedude
meda ilaibao wali,
te bidi dabego te bidi isaide te diligide
gela weyu bidibo sogo te ulama tubo naigo,
te augwali meda pedalubo tiwai yaibao wali.
Tama te naigo te dagego haliga pągąnobo
tiwai naga yaibao.
Te dagego te nai me badu te Genuai Bidigo
tempel beba sela aselama,
te ofa yagasainu ebaso, usu me egobeo. Mu menio.
5 Tama te Godigo genuai bodolu side da,
teda dagego magi sę yaibawe?
Te moni nai daa tubo side, te dagego magi yaibawe?
Te sunumi menio.
6 Nosali te genuai sęgę yai sę,
te dage dolabo sę te pedalubaso da,
teda dage wi tedela paibao.
Tama te Isip dabego dage suyu da, te dage selasa peyu,
te Isipba kalabus iligi paibao.
Tama tede dage bidaludubadi,
te dage isibo siba usu nama,
te augwaligo dage te Mempisde pubulaibao,
te augwa genuai taun dao.
Dage te duga pesage buluba ma asogobeo. Menio.
Tama te duga be dabe, me mone silva,
me te wiegi yai doado bage te olo bulu
tomode elalubadi,
te genuai bus holama, te tigidali mesegelaibao.
7 Te Godigo dageba dwai dene maiabo sogo pedelalio.
Tama duga te yali dwai kolesagade
usu nama, te dene saibao.
Te sę pedalubo sogo da, teda Israel,
duga koneaibao, te dwai dene dao.
Dagego enabolo te po wali,
“Te profet aga te kolesaga meni yai
umuna sali da,” wali.
“Te Godigo bomo elalubo bidi,
aga te kolesaga geda mubo bidi da,” wai.
Dage we bidigo ena godolo homu me isąwani,
magi baso meni, dagego dwai sęgę
te genuai umabo yai dao.
8 Godigo digi te dage aga we bidi dabeba
te profet bidi nigilama,
te bomai po pusagasomainu tagala palali.
Tiali goli, te ena bilibo badu te tigidali badu,
dagego ena te umbengo te ba tola sabo
tiwai emainu homu yai.
Te Godigo tǫde digi dagego enaba boi bidi ebo dao.
9 Dagego te dwai kolesaga sesemane sogo ebao,
te duga wąį nǫų dabego polobadu
te bulu Gibeade yali sę tiwai yai.
Tama te Godigo dagego yali dwai sęgę
te homu kone paliyu,
te agai dageba dwai dene mu mawaibao.
Israel dabego sęgę sali, tama te sęgęgo dene sali po
10 Genuai Bidigo te po wai,
“Hasia mu eno dage Israel suali,
te dwagi yai mu elaluali,
te bidi me deligo te wain ni te wa pai tǫde pedelama,
te nai walali subo tiwai yali.
Dagego te wąį nǫų dabe augwali te podolali hani wai
te ni kaya fik te tau hasia ebo tiwai yai,
dwagi yai bidali.
Tiali goli, nosali augwali te bulu du Peorba sabolali sogo,
tama hasia sogo augwaligo te tibo god
Balba lotu wali,
augwa te tibo god godolo mu elama,
tama augwali dwai pedelali,
te Bal tiwaigo mu pedelai dao.
11 Te Israelgo bomo te ba bola pabo tiwai elama,
augwaligo bomo hagawaibao, tama silaibao.
Tama te we dabe sibigo te haliga me isąma,
te wai me ame nogobeo,” wali.
12 “Tiali goli, te mebago wai elalubaso da,
teda te wai dabe eno ela mueibao,
tama eno te me deli sula tagalama,
elalumainu me egobeo.
Eno te we bidi tagalobo sogo,
te dwai nai haniani augwaliba pedelaibao,”
Genuai Bidigo te po wai dao.
13 Tama Hoseago te po wali, “Genuai Bidi, eno suali,
hasia bolo te taun Tair te dwagi yai
madi mu te bidaluali,
tiali goli nosali te boi bidi dabego
augwali dolagasai dao.
Tama eno suali, te tobage sę te Israel
haniba me pedelaibao,
te boi bidi dabego te Israelgo hani wai dabe
pobeasa biliyu, ela muaibao, te eno sualio,” po wai.
14 “Tama tialima, eno nageba hanalu obao,
te nago magi sę te Israel dabeba yaibawe?
Nago te we dabe sibigo te wai ame nomainu me iligio.
Te dwasianu wai dabe elalubo we dabego
ame te nago ame pę wa palama,
te augwa wai dabeba te ame mabo usu
meni emainu ilao,” po walio.
15 Tama Genuai Bidigo po ma wai,
“Polobadu augwali te Gilgalde bidiyu,
tama augwa te dwai kolesaga ebo gagalali,
tama te sogo naga eno me eno
augwaliba haliga sębę ebo gagalali.
Te we bidi dabego dwai sę hauwa yai,
tama augwa polalubo tobolu
bidi dabego me eno po sela sąwani.
Tama tialima, eno tǫde te augwali eno sela sąnama,
tama eno augwali godolo homu munu ma egobeo.
16 Te Israel dabego wai ame nabo usu isąwaibao,
augwali te ni me deli te ni sele ąį wa pelama,
te nai walisąbo tiwai yaibao.
Tialima, te mebago wai ame nobaso da,
teda augwaligo te godolo homu mu
ebo wai dabe te eno ela muaibao,” te po wai dao.
Hoseago po weyu, Godigo te Israel dabeba dwai dene ilaiba wali
17 Eno aga sę ebo God,
te Godigo te aga we bidi tudiba mueibao,
magi baso meni, augwaligo agai
po wali pisąbaso tiali.
Tama augwali te bulu tǫ kantride
te tǫ meni yai bidi dabe tiwai bidaibao walio,
augwali te bulu wau bilibo bage naga bidaibao.