Te Hani Si Dan Dali Benjamin Side Po
17
(Dąį 17–21)
Te Maikago tibo god dabe
1 Bidi me deli te Efraimgo hani bidali bulu du bagede bidali, te bidi aga nogi Maika dao.
2 Agai te aga idabolo po wali, “Te bidi dabego nago mone silva te 1,100 mone te wi sali sogo, nago po weyu, te nai wi sali bidi dolomainao wali. Tama eno te po odai. Suao, te mone enade munalubao. Ena digi eno wi sali!”
Tama idago te po wai, “Genuai Bidigo nage mobo momainu yao, te eno ogwa dao.”
3 Tama Maikago te mone te aga idabolo ma mawai. Tama idago te po wali, “Ena digi eno te mone te Genuai Bidiba mawaibao, tama te wiegi yai mu yali. Tama augwaligo te ni dulama tama te tibo god me deli nigilama, tama te silvago tigidali haluaibao,” wali. “Tiali goli, hasia bolo eno te mone nagebolo ma mawaibao.”
4 Nosali Maikago te mone aga idabolo ma mawai. Tialima, Maikago idago te mone 200 silva selama, tama agai te silva sę ebo bidiba mawai. Tama agai te tibo god me deli te nigo nigilama, tama te tigidali silvago haluali. Tama te Maikago bede te tibo god muai elaluali.
5 Te bidi Maika, agai dwasianu lotu be elaluali. Tama agai te pris bidi gudubo ugwa me te tibo god te lotu beba muani. Tialima, augwaligo teba lotu weyu, te aga ogwa digi me deli te pris bidi pedalumainu ilali.
6 Te sogo te Israelde te polalubo bidi me deli te bidisiąwai. Tigidali bidigo te augwa homu naga wali pali.
7 Te sogo te Livai hanigo te gesi ogwa bidi me deli elaluali, aga te Betlehem te Juda tǫde bidali.
8 Agai te aga bulu taga peyu, tama aga te gasaba bidigi painu homu yali. Tialima, aga pelama, tama te Maikago beba sabolali, te Efraimgo bulu du bage buluba pai.
9 Tama Maikago agabolo hanalu wai, “Nage menadu asaliwe?”
Agai po wei ponoyu, te tama po wai, “Ena te Livai hani me deli te Betlehem te Juda bidi dao. Ena te bidainu ebo bulu me deli gege asai dao,” wali.
10 Tialima, Maikago agabolo te po wai, “Nage ede ena dali bidao. Te enabolo te homu kolesaga mabo bidi bididu tama nage eno pris me bidagameo,” wali. “Tama tigidali kibu bede te eno nagebolo te silva mone te nogo si mayu yaibao, tama te gudabo ugwa dabe me te tuabo nai dali mawaibao.”
11 Tama tibaso, te Livai gesi ogwa bidigo te po usu da olama, tama aga te Maika dali bidai. Tama aga te aga ogwa tiwai mu pedelali.
12 Tialima, Maikago te gesi ogwa bidi te agai pris bidi nigilali. Tama aga te aga bede bidali.
13 Tama Maikago te po wali, “Megi da, eno koneani, te Genuai Bidigo ena bidibo tomode te wiegi yai sę pedelaibao, magi baso meni, eno te Livai hani te eno pris bidi nigilai elalubao.” Te po wali.