15
Te tigide te tobage meda meba pedalubo bomai po
1 Te Genuai Bidigo Moses de Aron sibolo te tiwai po walali,
2 “Nago te Israel bidi dabebolo walao, te bidi me deligo gasade keni dį pedalubaso, te keni dįgo aga eno gedude meda ilibao.
3 Te keni dį ebogo te ąį bole tiwai gasade pedalubaso, ma te naigo bomogo te poi tabo sunumi pania sobaso da, teda te bidi eno gedude meda elalubao.
4 E tiwai elalubao. Te dugulalubo bet sai me pibo bet sai me tigidali te meda pedelaibao. Te aga dugabo sia sai tigidali me te meda ela silaibao.
5-6 Mena bidigo te bidigo pibo betba nogo mubaso, ma te bidi dugabo sia saiba dugabaso da, teda aga ugwa digi wę telayu, te aga me ąį paugi pao, tiali goli te agade meda elaludubadi te be pio mu igi paibao.
7 Te mena bidi me wego te tobage gasi elalubo bidigo tigiba nogo mubaso, te aga ugwa digi ąį telayu, te aga wę me paugi pao, te meda agade elaludubadi te giliga iba dega sigulaibao.
8 Te gasi elalubo bidi agai te eno gedude wiegi yai elalubo bidi me deliba pesą sąbaso da, teda te gasa bidi me te meda pedalubao, te agai ugwa me ąį telayu, ąį me paugi pao, te meda agade elalubadi te giliga iba dega sigulaibao,” te po wai dao.
9 “Te tobage gasi elalubo bidi te hosde dugabo nai satelba dugabaso da, teda te nai meda pedalubao.
10 Te bidi me deligo te bidi dugayali nai satelba nogo muani da, aga me meda ilama, te tiwai me bididubadi te giliga iba dega sigulaibao. Te nai bidi me deligo sela pobaso me, nosali bidi teba dugabaso da, teda aga ugwa ąį tedelama, te ąį paugi pao, te meda agade elaludubadi te sia ge iba dega sigulaibao.
11 Te gasi elalubo bidi, te agai nogo ąį bolo telasiąma, te agai nogo gasa bidiba mubaso da, teda te gasa bidi agai ugwa ąį tedelama, te ąį paugi pao, te aga meda elaludubadi te sia ge iba dega sigulaibao,” wai dao.
12 “Te gasi elalubo bidigo agai nogo te tǫgo nigai sospenba mubaso da, teda augwaligo te sospen aluao. Te agai augwaligo te nigo nigai pou disba nogo mubaso da, teda augwaligo te pou dis bugagia ąį telayao,” wali.
13 “Te bidigo gasi usu ma ebaso da, teda aga te a naga me si sogo bolo bidilama, te aga wiegi yai ma pedelaibao. Te Sarere silibaso da, teda aga ugwa ąį telayao, te pelama, ąį me deliba paugi pao, te aga eno gedude wiegi yai pedelaibao,” wali.
14 “Te 8 wabo side agai te tobage ba hi si seselama, te ena Genuai Bidi geduba dolagasao, te eno sel Ugwa Be sunumiba aselama, te ba hi si prisba magasao.
15 Tama prisgo te ba hi me deligo te sęgę sela sąbo ofa tiwai eyu, te gasa ba mego te isiba tigidali ulama dela silibo ofa yaibao. Te tebo kolesagade agai te gasi silai bidi tau selama, te bidi eno gedude wiegi yai pedelaibao,” wali.
16 “Te bidi me deli piali madi aga gasade olo dali gawa gealueibaso da, teda aga meda pedelali, te aga tigi tigidali ąį pauwao, te aga meda elalubadi te giliga dega sigulaibao.
17 Te bidigo tigide ąį te ugwade tulalueibaso, ma nami ugwade, ma te bulmakau waligo nigali nai dabede tulalueibaso da, teda te nai dabe meda yaibaso te ąį telawaibao, te nai dabe meda elalubadi te giliga dega sigulaibao,” wali.
18 “Te bidigo we dali pagela pibaso da, te augwali side meda pedelaibao. Te augwali si gagali ela silama da, te augwa si ąį paugi pao, te augwali side meda elalubadi te giliga dega sigulaibao,” te po wai.
19 “Te we me deli poluago elibo gasi sabo side, te aga meda pedelama elalubadi, te Sarere deliba usu naibao. Bidi ma wego te weba nogo mubaso da, teda augwaliba te meda dagana selama elalubadi, te sia ge iba dega sigulaibao,” wali.
20 “Te we pibo bet sai me tigidali te aga dugabo sai me tigidali, te tigidali meda ela silaibao,” wai dao.
21-22 “Mena bidi ma wego te betba nogo muani, ma aga duabo naiba me nogo mubaso da, te meda agade pedelaibao. Te aga ugwa digi ąį telagi pelama, ąį me paugi pao, te meda agade elalubadi sia ge iba dega sigulaibao.
23 Te pibo ugwa sitbet, ma mena nai te we dulaluali te tagalao, te bidigo ma wego teba nogo mubaso da, te meda agade elalubadi, te be pio mu igi paibao.
24 Te bidi me deligo te we poluago elai gasi elalubo sogo te we dali pagela pibaso da, teda bidigo te wego meda selama, te bidi meda elalubadi Sarere deli bidaibao. Te mena bet te bidi pibo madi me meda elalueibao,” wali.
25 “Te we aga tigide kaneme elalu, te meba sogoba usu niyu, te poluago elibo gasi agade isąbadi, ma te poluago elibo gasiba wadolama, te kaneme idubadi, te meba sogoba usu nubaso da, teda agade te meda elalubadi te silibo sogoba usu naibao. Te wego bulu be gasigo kolesagade te tama tebo dao.
26 Te aga mena betde piali ma mena sia saide dulaluali me, te tagalao, te bet doado bage meda pedalubo dao,” te po wai.
27 “Te bidi ma we me deligo te naiba nogo mubaso da, te meda agade pedelali. Te aga ugwa ąį tedelama, te ąį paugi pao. Te meda agade elalubadi te sia ge dega sigulaibao.
28 Te wego tigide pedelali kaneme wa pabo si da, te aga Sarere deli bidilama, te aga eno gedude meda meniama, wiegi yai pedalubo dao.
29 Te a naga me sela wabo side agai te tobage ba hi si selama, te eno sel Ugwa Be sunumiba sela pelama, te prisba mao.
30 Tama prisgo te ba higo te sęgę sela sąbo ofa tiwai me eyu, te gasa me bago te isiba tigidali ulama, dela silibo ofa emainao. Te kolesagade agai te we eno gedude wiegi yai pedalumainu usu ilibo dao,” wai dao.
31 “Dage sigo bomai po te Israel dabeba menama, te augwali eno gedude meda elalubo sogo dua dao, bugagia koneao. Eno sel Ugwa Be augwali tomode elalubao, te augwali meda elalubaso da, teda te be tomoba augwali me pelamuo. Tiyu, augwaligo te sel Ugwa Be meda ilidalio. Te sel Ugwa Be augwaligo meda ilibaso da, teda eno augwali ela mueibao,” wali.
32 Te bomai pode te tama po wali, te bidigo gasade tedela yai kaneme pedalubo, me odolali gasade ąį gealubo, me te naigo aga meda ilibao.
33 Tama te we tigide poluago elibo gasi ebo po me, te bidi ma we tigide te aga naide tedela kaneme pedalubaso, te bidigo aga we dali pibo po te me te meda elalubao po wai dao.