18
Bidi me we augwa deli kanemede we sabo kolesaga ebo habu selali
1 Genuai Bidigo Mosesbolo walama,
2 te agai po Israel dabebolo omainogo yali. Agai te tiwai po wali, “Ena Genuai Bidi, ena dagego God dao.
3 Te mu tama, dage Isipde bidaluyu, tialima dagego te Isip dabego kolesaga wali pigio. Te megi eno dage Kenan tǫba odasa painogo ebao, tialima dagego te Kenan dabego kolesaga wali pelamuo. Dagego te augwaligo tama tiao wabo po dabe wali me pelamo dao.
4 Odao, dagego eno bomai po deli naga wali pao, tama eno dagebolo yao po wabo sę deli naga tigidali yao. Ena Genuai Bidi, ena duga Godgo eno te po dagebolo mobao.
5 Dagego te tigidali kolesaga me tigidali bomai po eno godolo yabo sę me eno dagebolo mobao. Te dagego tama sę eyu da, te dagego bidibo ula elalueibao. Ena Genuai Bidi, ena duga God, eno te po obao,” wali.
6 “Ena Genuai Bidi, eno te po obao. Nago te naga deli hanide we me deli sabo homu elama, nago aga gedu eyu, aga dali gagali me igio. Te tobage kolesaga habu mu selibao.
7 Nago naga ida mu dali gagali ebo sę igio. Nago te tiwai sę ebaso da, te nago naga aya hale ilibo sę mu ebao. Te naga ame nani ida mu dali gagali ebo sę habu mu selibao,” te po wali.
8 “Nago naga ayago gasa we dabe, te nago paba dabe, te dali gagali ebo sę me elamuo. Te nago tama tibaso da, teda nago naga ayabolo dwai hale mu ilibo sę ebo dao.
9 Nago naga abe mu dali dobo sę ebo gagali eyu, ma gasa ayago wegi me ida dali te dobo sę ebo gagali me igio. Te idago ayago bede ame naibaso, ma gasa bede ame naibaso, tagalao, te naga abe dao, te nago aga dali dobo gagali ebo sę me elamo dao.
10 Nago naga wegigo wegi, ma naga ogwago wegi dali te dobo sę ebo gagali me igio. Te kolesagade nage hale dwai mu ilaibao.
11 Nago naga pabago wegi dali te penani sę ebo gagali igio. Te naga ayago wai dao, tibaso te nago abe elalubao. Te aga nago we da olama sabo sę te habu mu dao.
12 Nago te naga ayago abe dali penani igio, magi baso meni, te ayago deli kaneme dao.
13 Nago te naga idago ama dali dwai penani sę ebo kolesaga igio, magi baso meni, te naga idago deli kaneme elalubao.
14 Nago te naga aya sabi bidigo we dali penani sę me elamuo, magi baso meni, te we te nago ida sabi we elalubao. Te naga aga dali pibaso da, teda nago te nago aya sabi bidi hale dwai mu ilibo sę ebo dao.
15 Nago te naga ogwago we dali penani sę igio. Magi baso meni, te nago we menio, teyu te nago aga dali penani ebo sę habu mu dao.
16 Nago naga amago we dali penani igio. Te nago aga dali pibaso da, teda nago ama hale dwai mu ilibo sę ebo dao.
17 Te nago we me deli sali, te wego gasa bidide wegi ame naibaso da, teda nago te wai ma sigio, ma agai wegi me sigio. Te nago wego ogwago wegi me, te nago me somainu elamo dao,” wali.
“Magi baso meni, te we dabe te nago wego deli kaneme elalubao. Te nago augwaliba dwai sę ebaso da, teda nago te hale genuai ebo kolesaga ebao.
18 Nago naga wego ama nago sigio, te nago we bidibadi sigio. Tiyu, nago augwa si wado yabo sę ilabuo. Te kolesaga dolo ebeo,” te po wai dao.
19 “Nago te we poluago elai gasi sai elalubadi te penani igio, magi baso meni, te sogo aga wiegi yai me elalubeo.
20 Nago naga abagigo we dali penani me igio. Nago tama tibaso da, teda nage eno gedude meda pedelaibao,” wali.
21 “Odao, ena duga Genuai Bidi eno dagebolo te duga wai dabe elama, te isiba ulama, te tibo god Molekba ofa ebo habu selama, te po eno dageba bomai po obao. Tiyu, dagego eno nogi aiyaba elaluidalio, te dagego God dao,” wali.
22 “Te bidi duga hasigo te gasa bidi tągio. Te dwai kolesaga mu ebao, te eno homude godolo me egobeo.
23 Bidi dagego te so hasa kibu sibi me te tągio, te we dagego te hasa sibigo dage tąmainogo sula tagaligio. Te kolesagade dage eno gedude meda pedelaibao. Te tebo kolesaga dwai nai mu dao,” wai dao.
24 “Dagego te dwai kolesaga dabe me elamuo. Te sę dagego eyu da, teda dage eno gedude meda pedelaibao. Te ena Genuai Bidigo po odisąwai hani bidi dabe te Kenan tǫde bidaluyu, augwaligo te tobage dwai kolesaga dabe elama, te augwali meda mu pedelalio. Te megi eno augwali ela gudulubo sę ebao, te dagego augwaligo tǫ somainogo ebo dao.
25 Te augwali dwai kolesagade te tǫ digi meda pedelali. Te augwaligo tǫba eno dwai dene mabo sę elama, tama te tǫgo te Genuai Bidigo po odisąwai hani bage te bugubo tiwai eyu, te augwali Kenan tǫde munu ma bidalugobeo.
26 Tialima, dage da, dagego eno dagebolo te mani bomai po tigidali wali pao. Dage te Israel we bidi dali, te gasa hani dage dali bidalubo hanigo dali, te Genuai Bidigo po odisąbo bidi dabego ebo kolesaga tiwai igio, magi baso meni, te kolesaga dwai kugumini mu ebaso, te eno godolo homu menio.
27 Dagego koneani, te Godigo po odisąwai hani dabe te tǫde polasa bidali, augwaligo te kugumini yai kolesaga yali. Tibaso, te tǫ eno gedude meda yai dao.
28 Tiyu, dagego me tama tidalio. Te tama sę dagego eyu da, teda te tǫgo digi dage sela sąwaibao, te ena Genuai Bidigo po odisąwai hani dabe polasa bidali bage sela sąwani tiwai gilama dage me tiabuo.
29 Te dage Israel mena bidi ma wego te tobage dwai sę ebaso da, teda eno aga te eno hani we bidi tomode bidali sela sąwaibao,” te po wali.
30 Genuai Bidigo te tama po wai, “Te eno dagebolo mabo po te dagego wali pao. Dagego te tǫde polasa bidali hani bidi dabego yali dwai kugumini yai kolesaga wali me pelamuo. Te dagego tama tibaso da, tiyu dage eno gedude meda pedelabuo. Odao, ena Genuai Bidi, ena duga God, eno te po wai dao,” wali.