5
1 Dage Jerusalem dabe, hodaluao,
te tigidali ami selama, sisinagasao.
Te boi bidi dabego da bagua salio.
Augwaligo te Israel tuni bidi nabogede te donogo eliyu,
aga te genuai hale ebo ilaibao.
Godigo te tobolu bidi me deli te Betlehemde pedalumainu yaibao
2 Genuai Bidigo te tiwai po wali,
“Betlehem Efrata, te tigidali Juda taun tomode
nage te dwasianu taun mu elalubao.
Tiali goli, nagede te genuai tuni bidi me deli pedelama,
tama agai te Israel hani tonaluabo bidi dao.
Te polobadu mu aga hasia wąį monu nǫų
me deli pedelali,
tama aga hani bidi me bidibao,” te po wai.
3 Tialima, Genuai Bidigo aga we bidi dabe digi
te boi bidi dabego nogode bidimainu ilama,
te Godigo we me deli sa mubo sogoba usu niyu,
te ogwa me deli ame naibao.
Tialima, te sogo te bidigo abagi dabe augwali te gasa
bulu tǫ kantride kalabus sę igi pali bidi dabe,
te augwali ma aselama,
te augwa hani dali deliba ma sisinagasaibao.
4 Te tobolu bidi pedalubo si da,
te aga we bidi dabe aga tonalueibao,
te God, aga Genuai Bidigo bomode
me genuai nogide te tama tiaibao.
Tama te we bidi dabe bugagia bidaibao, magi baso meni,
te tigidali bulu tǫ kantri dabede bidalubo bidi hani
dabego te agai bomo koneaibao.
5 Tama aga digi te nagame yai haliga ebo
homu te tigidali we bidiba mayu,
tama te boi bidi homu ebo kolesaga
te munu ma me pedalugobeo.
Godigo te aga we bidi dabe tau siyu, te boi bidi dabeba dwai dene mawaibao
Te Asiria dabe dago tǫba asobo sogo,
te dago taun bagulali masigi obo dabe aluama,
dago te ami dabe tonaluabo bomai
polalubo bidi dabe hauwa tagala palama,
augwaligo te boi bidi dabe dali hwįmainu yaibao.
6 Te augwaligo Asiria dabe dali hwįbo bomo mu elama,
te moni bobobage bainat hwągo
te augwali aiyaba elaluama,
te augwa bulu tǫ kantri nogi Nimrot te saibao.
Tama tebogo te Betlehemde pedelali genuai tuni bidigo
da te Asiria bagego nogode ma dobola saibao.
Te Asiria bage dago tǫ dąį bolama,
hwįagasobo sogo, agai tama tiaibao.
7 Tama te Israel hani meba te boi bidi dabego me
dolisąwai bage,
augwali te gasa hani hauwa tau sabo
bidi pedelaibao,
te Genuai Bidigo te hulide tulubage segeni wę te
nosaiba tulumainu tagala palobo tiwai eyu,
te olo tulubagego te ni dabe
wiegi yai pedalumainu ebo tiwai yaibao.
Tama augwaligo te sę te Genuai Bidigo
bomode naga yaibao,
te augwaduba bomogo digi te tegobeo.
8 Te Israel hani te gasa hani tomode bidiyu,
te laiongo buside te hasa sibi
ela tueinu gegebo sę tiwai eyu,
ma te sipsip obode ela tueinu ebo tiwai yaibao.
Aga te sipsip dabe tomoba pelama,
te augwali daiba samonama,
te augwali gąųgo subigila tologa sąsąbo tiwai eyu,
tama te sipsip dabe tau sabo bidi
me deli meni ebo ąǫ yaibao.
9 Te tiwai naga dage Israel dabego
te dagego boi bidi tigidali aiyaba elaluama,
te augwali mu silaibao.
Tama augwali posoyu,
dagego duga wele si ugwaba saibao.
10 Genuai Bidigo te Israel dabeba te po wali,
“Te sogo eno te hwįbo doado bage dolaibao,” wali.
“Te boi hwįabo hos dabe eno sela sąnama,
te karis dabe dolaibao,” wai dao.
11 “Te eno dagego taun dabe dali,
te taun bagulali masigi obo dabe tigidali dolama,
tama dage tede geme duala sainu ebo
usu me egobeo,” wai dao.
12 “Te eno dagego tibo pobi wabo nai me,
sisi tomage tigidali sela sąyu,
tama eno dagego te sogo nigibo bidi,
te dabe te munu ma me elalumainu,
me egobeo,” wali.
13 “Te eno te tigidali kapago nigai tibo god,
me te lotu wabo masigi pos tigidali sela sąwaibao.
Tama te duga digi nigali nai dabeba
munu ma lotu omainu me egobeo,” wali.
14 “Te eno te god we Aserago noma elalubo pos dabe
guda sąnama,
te duga bidali pesagede sela sąnama,
te dagego taun dabe eno dolaibao,” wai dao.
15 “Te eno haliga sębę mu elama,
tama te eno po sela sąbo haniani we bidi hanigo
te hagoma ebo kolesaga eno wei ponaibao,” po wai dao.