3
We aga bidi dali bidibo po
1 Te da te tigidali tuni bidi dologode bidabo po tama wali peyu, tama dage we dabe sibi dage deli deli duga bidi dologode bidiyu aga po odao. Tama tiyu, te bidi meba augwaligo Godigo dwagi yai po odobo hagela yai digi, augwaligo wego wiegi yai kolesaga ebo suyu, te wego po mobo masiąwaį goli te bidi augwa homu begelaibao.
2 Tama te we dabe augwali Godide wi eyu aga dologode bidibo, te magi dwai sę isiąbo kolesaga te bidi dabe augwaligo subaso da, teda augwaligo homu tulaluama, tama Godigo po mu po dao te homu yaibao.
3 Tama dage we dabe sibi, dagego duga tigide bulu badu eda badu au ebo sę tede te moni homu egimio. Tama tiyu, duga tobolu nisi dali haniani sę eyu au egio. Te wiegi yai kapa nogi gol tego nigali tigi au yabo nai dali, te wiegi yai bobobage ugwa dabe dali, te tobage naigo duga tigi au eyu tama gasa we bidigo suyu, dage wiegi yai au yai we dao te po omainogo munamuo. Te meni.
4 Te tobage au yabo nai te osogo naga elalubo nai dao. Dagego au yabo nai te gasagi yai mu dao. Te dagego homu kolesaga tomode geme dualali au yabo gasagi yai nai mu tedali elalubo dao. Tama dage nagamea pai homu eyu, dua bidabo kolesaga elalubaso, teda te gamonabo au yabo nai mu dao, tama Godigo gedude te wiegi yai dila pai nai mu dao.
5 Te polobadu bidai we dabe sibi augwali te tama tiwai bidai dao. Augwali dwagi yai homu eyu, God agai augwali dali dwagi yai sę ebo sogo bugagia tonaluali. Tama tiyu, augwali nagamea pai homu eyu dua bidabo kolesaga ebadi, augwali deli deli augwa bidi dologode bidai dao.
6 Te polobadu mu bidai we nogi Sara agai tama tiyu, tama aga bidi Abraham dali te nage da eno genuai bidi dao weyu, agai wali po bugagia wali pai dao. Tama dage me, dage Sara tiwai dwagi yai sę eyu da, tama te homu wi ilabo naide wi esiąyu da, teda dage me te Sara aga wegi hani mu dao.
7 Te dage we sai bidi dabe me, dage Godigo we bidi hani dali dwagi yai homu eyu, tama dage deli deli duga we dali tau sabo homu eyu, abagi homu eyu, bugagia bidao. Tama dagego koneani, te bidi me aga we me augwali sibolo God agai te bidada peyu, bidada pabo bomo olo mawaibao. Tama dagego augwali bomo genuai meni homu ebadi, te bidi agai aga wego nogi ugwaba sao. Bidigo tama tiyu bidibaso da, teda Godigo augwali sigo aga hanalu wabo po odaibao.
Dwagi yai sę yai goli dene sabo po
8 Te eno po silagasu po obao. Dage tigidali deli homu naga eyu bidiąo. Tama teyu, hobede eyu, te dage Godigo hani we bidi bidiyu, duga hasi dwagi yai homu eyu godolo mu yao. Tigidali we bidi dali homu dene eyu, tama nagamea pai homu ebadi bidao.
9 Bidi mego dage dali dwai sę ebo si, tama dagego dwai sę eyu ma wei ponogio. Ma, bidi mego dage dali dwai dwai po wabo si, dagego te dwai po me weyu wei ponogio. Te menio. Dagego God hanalu wabo po wao, agai augwali dali dwagi yai sę emainogo yao. Te God agai dagego te tobage sę emainogo dage i wali dao, tama nosali agai dagebolo dwagi yai kolesaga mu yaibao.
10 Magi baso meni. Te polobadu mu bidi mego e po asęani,
“Niwai bidi agai homu ‘Ena dwagi yai homu eyu,
tigidali sogo bugagia bidaio,’ te homu agai eyu da,
teda agai dwai po olamuo, te we bidi dene maiabo
tibo po wagio.
11 Me ma, agai dwai sę tudiba muao,
te dwagi yai sę naga yao. Tama agai bomo eyu, te
gasa we bidi dali bugagia bidabo sunumi gegegi pao,
tama sulama aga te sunumi wali bugagia pao.
12 Magi basowe? Te Genuai Bidi God aga gedugo te
doloba pai we bidi dabe augwali bugagia tonaluyu,
augwali dali dwagi yai homu ebadi, tama agai
augwaligo hanalu wabo po odoyu, wei ponobo dao.
Tialima, te dwai sę ebo bage dali agai te boi bidi
homu ebo dao.”
13 Te dage bomo eyu, tama te dwagi yai sę yabo homu dąų weyu da, teda tego dagebolo dene mawaibawe? Woo, te tobage sę ebo bidi hauwa meni.
14 Tialima dagego te doloba pai sę yai goli te gasa bidi dabe augwaligo dage dene me sogo mayu da, teda God agai dage dali dwagi yai homu eyu dwagi yai kolesaga dage dali yaibao. Tama tibaso, dage augwalide wi egio, te augwaligo dage dali ebo sęde me dage moni homu egimio.
15 Te meni. Dage duga homugo “Krais aga da, dago Genuai Bidi mu dao” homu eyu, aga dologode mu bidao. Tama teyu, dagego duga homu hasia bugagia dodolama, tama me sogo bidi mego dagego Kraisde konealubo po page hanalu obaso da, dagego agabolo te konealubo po page bugagia ola mao.
16 Tialima, te po page agabolo ola mobadi dagego wado po wagio. Te meni. Dage te nagamea pai homu kolesaga elama, tama aga dologode bidiyu, te konealubo po page agabolo ola mao. Tama timainogo dage te doloba pai kolesaga naga yao. Tama dagego tama tiyu da, te bidi meba augwaligo dage dali nogi posobo po weyu, tama dage Krais aga hani we bidigo ebo dwagi yai sęde augwaligo ‘Te dwai sę dao’ po wabo bage, nosali augwaligo koneaibao, te pode augwaligo mu geda muani. Tama te koneama tama augwali ge neyu hale mu yaibao.
17 Tama dago dwagi yai sę naga yai goli, tama God agai “Awe” weyu, te bidi dabe augwaligo dabolo dene mayu da, te usu dao. Tialima dago dwai sę elama tama augwaligo da dene mayu da, teda te dwali dao.
18 Magi baso meni. Te Krais aga digi agai dago yali dwai sę sęgę sela sąmainogo aga deli sogo naga isali. Tama aga te doloba pai bidi mu bidai goli, tama agai da doloba pisiąwai bage te God pageba sesimainogo agai da tobade dene sali. Bidi dabe augwaligo aga tigi isilali. Me ma Godigo Mobo Bidigo Krais bidimainogo ma hodolali.
19 Tama te sogo Krais aga mobo bidigo te isali bagego noma bidi dabe kalabuside bidalubo madiba aga teba pelama, tama agai aga po augwalibolo pusali.
20 Tama polobadu mu te bage augwali e tǫde bidibadi augwaligo Godigo po odobo hagela yai dao. Tama te sogo polobadu mu te bidi nogi Noa aga e tǫde bidiyu, tama Noa agai te moni geba nigibadi te sogo Godigo te dwai sę yali we bidi dali sębę polo isiąbadi tonaluali. Tama te moni geba nigibo sę silama, tama te we bidi isilabo moni ąį asali sogo, te we bidi hauwa te geba tomoba pelama bugagia bidibeo. Woo, te we bidi a naga olama me nogo sela naga augwali te sipde bidibadi te ąįdu sela bilama tama bugagia bidaligo sana pali. Tama tebogo Godigo augwali te ąįgo tau siyu ma dobola sali.
21 Tama te ąį te augwaligo dage baptais mani ąį tiwai dao. Tama Jisas Krais aga te gų pagede ma hodalobaso, Godigo te baptais mani ąįgo dage tau siyu ma dobola sali. Te ąįgo te dagego tigide elalubo meda sela sąyu, tama dage tau siyu ma dobola sabo menio. Te meni. Te dagego te doloba pisiąwai sę idali weyu, tama dagego Godibolo te da tau sao po weyu, tama augwaligo dage baptais mawai dao. Tama te tiwai ebogo dage tau siyu ma dobola sabo dao.
22 Tama te Jisas Krais aga te gų pagede ma hodolama, tama Godigo dagalude bidibo madiba sabolama tama genuai nogi sobaso, aga te Godigo dolo nogo badu megi bidibao. Tama aga tede bidiyu, tama ensel mobo bidi dabe tigidali dali, te noma bidi tuni bidi dabe dali, te bomo yai noma bidi dabe dali, augwali tigidali Krais aga dologode bidibo dao.