83
Bidigo gedu haluasa po obaso da, teda Godigo te Israel dabego boi bidi tigidali silaibao
1 God, nago pedauwali me pania sigio.
Nage odolali me dualalugio.
God, nage odolali me bidigio.
2 Suao. Te nago boi bidi dabego te hwįbao.
Augwa te nage wei me isiąyu,
te nageba hagoma ebo dao.
3 Augwa te geme duala selama,
tama nago we bidi dabeba
te dwai sę yabo po mia salio.
Nago te we bidi dabe
augwali bugagia tonaluali,
tiali goli, te boi bidi dabego
augwali dolabo po mia sai dao.
4 Augwa te po wai, “Ae, tegobao.
Dago te Israel dabe mu silinao,
teda te we bidi dabego te augwaliba
homu kone munu me ma egobeo,” wali.
5 Augwa te deli homu elama, te sę yalio.
Tama augwa te nage elaluainu,
te hai namu dali ola sai dao.
6 Augwali te hani dabego te tiwai yainu yali,
te augwali Idom dabe me, Ismael dabe me,
tama te Moap dabe me, te Hakri dabe me dao.
7 Tama te Gebal dabe me,
te Amon dabe, tama te Amalek dabe me dao.
Te hani bage dabe, augwali te augwali
te Filistia badu, me Tair badu bidali.
8 Siria me te augwali dali sisinani.
Te bomai hani augwali te Lotgo hani tau salio.
9 Nago te tobage tiwai kolesaga te augwaliba yao,
te polobadu nago te Midian dabeba yali tiwai,
me te Sisera, me Jabin dabe,
te genuai wę Kisonde yali tiwai yao.
10 Te sogo nago augwali te Endor bulude dolama,
tama augwa tigi te tǫde munaluama,
tama damua pai dao.
11 Nago te augwa ami dabego kepten
bidi dabebolo te dwai dene mao,
te polobadu nago te Orep de Sep side
yali tiwai gilama yalio.
Nago te augwaligo tobolu bidi dabe aiyaba elaluao,
te nago te Seba de Salmuna side yali
tiwai gilama yalio.
12 Te bidi dabe augwaligo te tama po wai,
“Dago Godigo te tǫ sobaso da,
teda te dena tǫ mu naga tama pedelaibao,” wali.
13 Eno God, nago augwali te tǫ hogomu tiwai
sela sąyu, tedela palao.
Augwali sela sąyao, te waligo te wit bo sela sąyu,
tedela palubo tiwai yao.
14 Siago te kala dobaso, tama te kala elalubo bulu dude
te sia genuai dabo dao.
15 Te tiwai naga gilama,
nago te genuai tulubage tagala palama,
tama te hani bage te pobeasa pobaso,
te augwali wi paibao.
Tama nago te bomai wali mu augwaliba
tagala palubaso, te augwali wi yaibao.
16 Genuai Bidi, nago augwali aiyaba mu elalubaso,
tama augwali hale dwai mu eyu,
tama augwaligo nage wali pabo homu yaibao.
17 Eno homugo te nago augwali elalubaso,
tama augwali te sesemane wi dwai mu yaibao.
Nago augwali hale ilama, tama augwali ela muao.
18 Eno homugo nago te tiwai yao homu ebao,
teda augwa mu konemainu ebao,
nagaduba deli naga, nage te Genuai Bidi,
tama nage te Ugwade Mu Bidibo God da,
tama nago te tigidali tǫ tonalubo dao.