1 Te sę yali nosali badu, tigidali Israelgo Devit te Hebronba suagasali. Tama augwaligo te tama po agabolo walali, “Da tigidali te deli kaneme dao. 2 Polobadu Sol king bidali, tiali goli naga digi te da Israelgo ami bidi tonalu, te augwali hwįboba odasa peyu ma odasa asu yali. Tama God, Genuai Bidigo, nageba walobaso, te aga we bidi dabe da tonalubo bidi pedelaibao, tama nage dago king pedelaibao,” wali. 3 Tama nosali te Israel tobolu bidi dabe tigidaligo te king Devit Hebronba sisinagaselama gesabi deliba yalio. Tama agai te Godigo gedude bomai po me deli dąų waliyu kontrak salio. Tama augwaligo aga toboluba te dąį ilibo wel gelama, te aga Israel king da olama dąį ilali, te Genuai Bidigo po te profet bidi Samuelgo pedauwalide wali tiwai gilama yai dao.

4 Tama king Devit dali te tigidali Israel bage te Jerusalemba pali, te taun gasa nogi Jebus da, te Jebus dabego page bulu mu dao. * 5 Tama te Jebus dabego Devitba te tama po wali, “Dage munu ma te dago taun tomoba me aselamuo,” wali. Tiali digi Devit aga ami dabe daligo te boi hwįnama, tama te masigigo nigai bomai obo elaluali taun pedai sali. Te taun pedai badu nogi da Saion. Tiali goli, nosali te we bidi dabego te taun nogi e tiwai wali, Devitgo Taun Dao, walio. 6 Devitgo te taunba boi hwįainu yali sogo, agai te tiwai po aga ami dabeba wali, “Niwai bidigo te Jebus bidi me deli te polasa ela mubo bidi yaibaso da, teda aga eno ami dabede te polalubo ofisa bidi pedelaibao,” wali. Tialima Joap, te Seruiago ogwa, te polasa pelama, te boi hwįbo gagalali. Tama tialima, Devitgo aga te amide polalubo ofisa bidi sa muanio. 7 Tama nosali Devit pelama, te Saionba bidigi pai. Tama tialima, te we bidi augwaligo te taun nogi e tama wali, Devitgo Taun Dao. 8 Tama Devitgo te po obaso, tama te sę bidi dabego te be dabe sęsę pelama, te taun tigidali badu bagua salio. Augwaligo te be dabe sę ebo gagalali te tǫ wai bulama pągąnani pesage badu te sę yai. Te Joapgo te taun dabe gasa badu me ma nigalio. 9 Tigidali Bomo Elalubo Genuai Bidi te Devit dali bidali, tama tibaso Devit te sesemane sogo bomai king pedelai dao.

10 Te nogi asęsędulai elalubo da, te Devitgo bomai ami bidi tobolu bidi dabe da. Godigo te tǫ kantri Israelde homu kone palama, te agai bomai po dąų weyu, Devit te king pedalumainu yalio. Te ami bidi dabe augwali dali te tigidali gasa Israelgo me te sę bomo eyu, Devit te king pedelama bomai bidi bidali, te tama tiali kolesagade te Genuai Bidigo aga dąų wali poba mu usu nai dao. 11 Te Devitgo bomai ami bidi dabego nogi da e tiwai, Jasobeam te Hakmoni hani, aga te polalubo ofisa bidi. Me sogo deli sogo Jasobeamgo aga hwįbo sesemone ene tolalu, te 300 boi bidi dali hwįnama, te tigidali ela silai dao.

12 Te Eleasar, te Dodogo ogwa, aga te genuai nogi elalubo sela wali ami bidide te si wali bidi aga da. Aga te Ahohi hani dao. 13 Me sogo deli aga Devit dali te bulu Pasdamimde bidali, tama te Filistia dabego boi hwįainu sisinani. Te Filistia dabe asobo si da, te Israel dabe wi palio. Te pedai badu te bali gi me deli elaluali, 14 tama Devit de Eleasar augwali si te gi tomode dolaluali, tama te Filistia dabe dali hwįbo bomo yali, augwaligo te tǫ sidali weyu yali. Tama augwali sigo te Filistia dabe ela muanio. Te kolesaga yalide Genuai Bidigo te Filistia dabe aiyaba mu elaluama, tama te Israel dabe augwali bugagia bidai dao.

15 Te Devitgo ami dabede te ami tobolu bidi dabe elaluali, te hani dabe nogi augwaligo te tiwai nogi yalio, te Bidi Sese Deli Olama Nogo Si 30 Ami Tobolu Bidi Da, wali. Me sogo deli Devit te bulu Adulam genuai masigi ola bede bidibadi, tama Bidi Sese Deli Olama Nogo Si wali ami bidi dabe tomode te ami tobolu bidi selago Devit aga suagasali. Te tama tebo sogode me te ami dabe te bulu Refaimba dulama bidabo pesage nigilama bidai dao. 16 Te sogo Devit te boma pai geme dulalubo bulude bididubadi, tama te Filistia ami dabe mebago te Betlehem taun sai yalio. 17 Tama Devitgo te Betlehem wiegi yai ąįba homu kone paligi solama, tama agai te tama po walio, “Homu dene mu ebao, eno te taun Betlehem obo sunumi pąde elalubo wę meba tugi sogo da, teda ena wiegi yai homu pemene mu igi dao.” Devitgo te po wali.

18 Te bomai ami bidi selago te po odama, te augwali hogodama palio. Te Filistia dabego te Betlehem taun tomoba pabo sunumi tonalubadi goli, tagalao, te ami selago augwali sela sąnama peyu, Devitgo te po wali ulu ąį tugi palio. Tama augwaligo sela asama, Devit magasali. Tiali goli, aga te wę tuainu yali te aga hagela ebaso tubeo. Menio. Agai te selama, te Genuai Bidiba ofa tiwai eyu gelalio. 19 Tama agai te tiwai po wali, “Te Godigo nogide, eno mu po obao, eno te ąį me tugobeo. Te wę eno tubaso da, eno te bidi dabe augwaligo kaneme tubo tiwai yaibao, magi baso meni, augwali te wę sigi painu pali sogo te augwali isabo sę tiwai mu yalio.” Tama tibaso, Devitgo te ąį tubeo. Te bomai ami bidi selago yali sę me deli te dao.

20 Abisai, Joapgo ama, aga te 30 wali bomai ami augwalide * te polalubo bidi da. Me sogo deli Abisai aga hwįbo sesemone tolasa te 300 boi bidi dali hwįnama, te tigidali ela silalio. Tama aga nogi ugwanu ma igulama, te sela ami bidigo genuai nogi elalubo tiwai si me elaluai dao. 21 Agai namba genuai ugwanu mu sigiluama, te sela ami bidi dabego genuai nogi elaluali edelali, te augwa polalubo bidi pedelali. Tiali goli aga digi te sela ami bidi dabe tiwai me elalubeo.

22 Tama Benaia, te Jehoiadago ogwa te Kapsel taun bidi, aga me te bomai ami bidi me deli da. Te hauwa sogo agai te boi bidi dabe dali hwįbo bomo yalio. Me sogo deli agai te Moap moni bomai ami bidi si ela muai. Te me sogo deli, te talua ge tulubage te tǫba tulalubo sogo, Benaia te genuai tǫ dedage me deliba dulama, te bidi elebo bomai hasa laion me deli ela muai dao. 23 Te gasa me sogo agai te moni dobo dwai Isip bidi me deli ela muani. Te Isip bidigo tigi bobobage usu nama te 2 mita, te bobage bidi mu da. Te Isip bidigo sesemone te genuai mu da. Te sesemone sigi te genuai, te ugwa hobolobo masin lum dili tiwai da. Tiali digi Benaiago te ni tigi dage selama, te Isip bidi pąba pelama, aga dali hwįani. Tama Benaiago te bidigo sesemone dobola selama, tama aga te aga sesemonego digi aga ma ela muai dao. 24 Benaiago te bomai sę dabe yali, tialima agai nogi genuai elalu te ami bidi selago genuai nogi elalubo tiwai elaluali. 25 Agai te sali genuai nogigo te ami bidi bidi sese deli olama nogo si 30 te gasa ami dabego elalubo bomo aiyaba elaluali, tialima aga te genuai nogi elalubo ami bidi selago nogi tiwai agade me elalubeo. Devitgo Benaia dąį ilama, te kingo be tonalubo ami bidi hani dabe tonalubo bidi nigilai dao.

26 Te badu te Devitgo ami bidi hani dabede te bomai ami bidi dabego nogi asęani elalubao. Asahel, te Joapgo ama, me te Elhanan, te Dodogo ogwa, te taun Betlehem bidi da, 27 tama Samot te Haror bulu bidi, te Heles te Pelon bulu bidi, 28 te Ira, te Ikesgo ogwa, te taun Tekoa bidi da, te Abieser te Anatot taun bidi, 29 tama Sibekai te Husa bulu bidi, te Ilai te Ahohi hani bidi da, 30 tama Maharai te Netofa taun bidi, te Helet, te Banago ogwa, te Netofa taun bidi, 31 te Itai, te Ribaigo ogwa, te Gibea taun bidi te Benjamin hanigo tǫ da, tama Benaia te taun Piraton bidi da, 32 tama Hurai te odogo bulu pąde te Gas bulu du bidi, te Abiel te taun Araba bidi, 33 te Asmavet te Baharum bulu bidi, te Eliaba te taun Salbon bidi da, 34 tama te Hasemgo ogwa dabe te bulu Gison bage, te Jonatan, te Sagego ogwa, te Harar bulu bidi da, 35 tama Ahiam, te Sakargo ogwa, te Harar bulu bidi, me Elifali, te Urgo ogwa da, 36 te Hefer te Mekera bulu bidi, te Ahiya te Pelon bulu bidi, 37 tama Hesro te taun Karmel bidi, te Nadai, te Esbaigo ogwa, 38 tama Joel, te Natango ama, te Miphar, te Hakrigo ogwa da, 39 tama Selek te tǫ kantri Amon bidi, te Naharai te taun Berot bidi da, aga te Joapgo boi hwįbo nai te ene dabe sabilibo bidi, 40 tama Ira me Garep te bidi si te Itra taun bidi, 41 tama Uria te Hit hani, te Sabat, te Alaigo ogwa, 42 te Adina te Sisago ogwa, aga te Ruben hanide tobolu bidi me deli da, tama te Adina hani te bidi sese deli nogo si 30 bidi da, 43 tama Hanan, te Makago ogwa, te Josafat te Mitan bulu bidi, 44 tama Usia te Astarot taun bidi, te Sama me Jeiel, augwali si te Hotamgo ogwa te Aroer taun bidi da, 45 tama Jediael me Joha, te bidi si te Simrigo ogwa si te Tis bulu bidi da, 46 te Eliel te Mahava bulu bidi, te Jeribai me Josavia, te bidi si te Elnamgo ogwa, te Itma te Moap tǫ kantri bidi da, 47 tama Eliel, me Obet, me Jasiel, te bidi sela te bulu Mesoba bidi dao.