17
Profet Natango Godigo po Devitba mawai
(2 Sml 7:1-17)
1 King Devit aga beba pelama bidigi pai elalubadi, tama nosali aga te Godigo po pusa mani bidi profet Natanbolo e tiwai wali, “Ena te genuai wiegi yai be me deli augwaligo te dwagi yai ni bǫgo sęwai bede bidibao, tiali goli te Genuai Bidigo Dąų Wali Bomai Po Halobage te sel ugwa olo bede munalubao. Te dolo meni da homu ebao,” wali.
2 Tialima te profet Natango Devitba te tiwai po walio, “God nage dali bidibao, tibaso nago mena sę me deli yabo homu ebaso, te sę yao,” wali.
3 Tialima te sogo hulide digi Godigo Natanbolo te tiwai po wali,
4 “Nage eno sę bidi Devitba pelama, tama nago eno e po agabolo mao, ‘Devit, nage eno te be sę yabo bidi da olama, sa muani bidi nage menio,’ te po Devitbolo wao.
5 ‘Ena te genuai bede bidibeo. Menio. Eno te Israel dabe te Isipde ma selama odasa asali sogo, ena te sel ugwa bede naga bidali. Te tigidali badu ena peyu asu yali, ena te sel ugwa bede naga bidai dao.
6 Te dage Israel dabe dali te hauwa pedai badu bilalio, tama eno te dageba dąį ilali tobolu bidi dabe me deli augwaliba hanalu eno te tiwai po me wabeo, “Magi baso nago eno be te wiegi yai ni bǫ namego sę ebe dawe?” eno te po wabe.’ Te po Devitbolo pusao,” Genuai Bidigo te Natanbolo wali.
7 Tama Genuai Bidigo po ma daganu Natanbolo tama po wali, “Nago te Devitbolo e po pusao, ‘Ena Tigidali Bomo Elalubo Genuai Bidigo, eno nage te kibu sipsip tonalubo bidi bidali sogo selama, tama eno nage te ena we bidi Israel dabego tobolu bidi pedalumainu sa muyu dąį ilai dao.
8 Ena te nage mena badu pabo tigidali usu nama bidai. Tama nago boi bidi dabe eno aiyaba bomo kidilai madi te nosali nago augwali aiyaba elaluali. Te eno nageba genuai nogi mawaibao, te gasa tǫ kantri dabego polalubo bomai bidi dabego genuai nogi tiwai elalueibao.
9-10 Eno te dage Israel dabego tǫ me deli dąį ilali elalubao, te ena we bidi dabe, tama eno dage duga te tǫde bugagia bidimainu yalio. Tama te dwai sę ebo bidi dabego dageba dwai sę munu ma me egobeo. Te wąį nǫų dabego te tǫ sabode gagalama, te eno dagego tobolu bidi dąį ilibo sogoba usu nama te boi bidi dabego dage dolali sę teba dąį yagasaibao. Tialima megi da, eno augwali palibaso da, te augwaligo dage munu ma dolisąyu, te dagego tǫ kantri me dologobeo. Te eno nago hani dabe bidalumainu sula tagalama, te augwaligo nago wąį nǫų dabe dalomainu yaibao,’ te po Devitbolo wao,” wali.
11 “ ‘Te nage isama augwaligo nage pubalobo sogo da, teda eno nago ogwa me deli te king pedalumainu yaibao. Te aga bomai king pedelama, te eno magi nai me deligo aga aiyaba elalumainu me egobeo.
12 Te kingo tama te eno be sęwaibao. Te eno agai hani bidide naga te sesemane sogo king pedalumainu yaibao po walio.
13 Tama ena te aga aya bidu, te aga eno ogwa bidaibao. Tama eno agaba te olo mu tau sabo wiegi yai kolesaga sesemane sogo idueibao. Eno aga tudiba me mugobeo, te nage king bidisiąbadi te bidali kingba eno te yali kolesaga tiwai me egobeo. Menio.
14 Te eno agai hani bidi dabede te king sesemane pedalumainu ilaibao, tama augwaligo eno te we bidi hani dabe tonalumainu yaibao po wai dao,’ te po Devitbolo pusao,” Genuai Bidigo Natanbolo te po wai.
15 Tama Natango Genuai Bidigo te po dabe wabo odama, tialima aga pelama, te Genuai Bidigo agabolo te ola mani sę po tigidali te Devitba waligi palio.
Devitgo gedu haluasa po Genuai Bidiba wali
(2 Sml 7:1-17)
16 King Devitgo Godigo te po dabe wali odobo si da, tialima aga te Genuai Bidigo sel ugwa be tomoba pelama te Genuai Bidigo geduba duagi pelama, te tiwai gedu haluasa po wali, “God, Genuai Bidi, nago te wiegi yai kolesaga hauwa enabolo yalio. Tialima ena dali te eno we wai da hani sibi, da te wiegi yai mu bidibaso nago te tiwai sę ebeo.
17 God, nago te wiegi yai kolesaga dabe enabolo yali te usu isąbo homu ebaso, te nago gasa wiegi yai sę megi enabolo ma ebao. Te nago eno wąį nǫų dabe dali yabo sę po pusalio. God, Genuai Bidi, megi digi nago ena te genuai nogi elalubo bidi tonobo tiwai elama,
18 te nago ena nogi ugwaba sobao. Tama tialima, eno mena po nagebolo wagawe? Ena naga sę bidi, te nago ena koneai dao.
19 Nago ena wiegi yai bugagia ilabo homu ebaso, te naga homugo digi nago te genuai sę dabe ebao. Te megi da, nago te tama genuai sę dabe yabo po enabolo pusali dao.
20 Genuai Bidi, nage tiwai deli me menio. Naga duba deli te God mu da, te dago dena wąį nǫų dabego pedauwalide odali tiwai dao.
21 Nago da Israel dabe te Isipde kalabus bidibadi ma selama, nago da te naga hani we bidi pedalumainu ilali. Tama tialima, te gasa hani bage te naga hani we bidi dabe da tiwai me elalubeo. Tama nago da tau sabo te wiegi yai genuai mu te nago we bidi dabe da te tǫ kantriba sabalubo sogo ebao. Nago te gasa hani we bidi dabe ela gudulama, te dago augwaligo tǫ sagasalio. Tama tibaso, te tigidali bulu tǫ kantrigo te nageba genuai nogi mabo dao.
22 Genuai Bidio, nago da Israel dabe te naga we bidi hani mu pedalumainu elama, tama da te tiwai sesemane sogo bidaibao. Te naga digi nage dago God pedelama bidibao,” wali.
23 “Genuai Bidio, eno homugo nago te enabolo me eno haniba te bomai po dąų walu te yaibao wali tiwai sę te tiwai sę nago sesemane sogo yao.
24 Te we bidi dabe augwaligo nago te sę ebo sulama, te sesemane augwaligo nageba homu kone palu, te nageba genuai nogi mawaibao. Augwa te tama po waibao, ‘Tigidali Bomo Elalubo Genuai Bidi, te Israelgo God, aga duba deli mu te Israel augwaligo God da.’ Tama nago eno hani bidi dabe delide naga te king sesemane sogo pedaludumainu yaibao te po wai dao.
25 Nage eno God, nago enabolo te tama tiwai ola mani, nago te eno wąį nǫų hani dabe te bomo sesemane elaludumainu ilaibao. Tibaso ena, nago sę bidi, eno te tama gedu haluasa po nageba wabo wi me egobeo.
26 Genuai Bidi, naga digi nage God, tama nago te wiegi yai po ena dali dąų wai dao.
27 Tama tialima eno homugo nago eno haniba wiegi yai sę bugagia yao, tama augwali nage dologode sesemane sogo bugagia bidimainao. Nago eno hani dabe augwaliba te dwagi yai sę yaibao po wali, tibaso eno koneani, te nago sesemane sogo augwali bugagia wiegi yai ilaibao,” Devitgo te gedu haluasa po wai dao.