Tuni Bidi Dabego Po Elalubo Buku Si
Hasia nedebo po
Te polobadu te Juda dabe augwaligo te buku nogi Tuni Bidi Dabego Po Elalubo Buku me deli naga elaluali, te moni bobobage buku dao. Tiali goli nosali gasa bidi dabe augwaligo te bobobage buku pedema, tama te me pedai nogi Tuni Bidi Dabego Po Elalubo Buku Deli poali, te nosali pedai buku nogi Tuni Bidi Dabego Po Elalubo Buku Si poayu yali. Tialima te Buku Si wabo bukude elalubo po page suainu da, te Buku Deli nogi wabo bukude Hasia Nedebo Pode suao. Te Buku Si wabo bukugo te king Solomon bidali sogo gagalama, tama pelama, te Israel dabe augwa kantri si peda pali te po pusai buku dao. Tama te bukugo po ibanu pelama, te kantri si te boi bidi dabego nogode doligi pali poba sabolai dao. Tiali goli e bukugo te Israel bulude te not badu pedalali sę dabe po hauwa kuna pusubeo. Te e bukugo te Juda bulude yali sę po dabe dali te hanu Jerusalem side naga pedalali po dabe naga elalubao.
King Solomongo po
1
(Dąį 1–9)
Godigo wiegi yai homu kolesaga Solomonbolo mani
(1 Kin 3:4-15)
1 Solomon, te Devitgo ogwa, agai bomonama eyu, te bomai king mu pedelali. Tama God Genuai Bidi aga dali bidiyu, tama agai genuai nogi ugwanu mu somainu ilali.
2 Tialima Solomongo te tigidali ofisa dabe i wali, augwali mebago te 1,000 bidi dabe tonaluali, mebago 100 bidi dabe tonaluali, agai augwali i wali. Me te po tų odobo jas bidi dabe me, te Israel dabego augwa hanide genuai bidi dabe me i wali. Tama me te deli ayago togali hanigo tobolu bidi dabe i wali. Tama te bidi dabe augwali te Israel we bidi dabe dali sisinagasali, tama Solomongo augwali dali po pusali.
3 Tama nosali augwali sese tama aga dali te lotu wabo pesage te hanu Gibeonba pali. Magi baso meni. Godigo ugwa be te hanude elalubaso. Te haus sel te polobadu Moses, te Genuai Bidi aga sę bidigo, sę yani te sel ugwa be dao, te nai meni yai wa pai bulude sę yani sel ugwa be.
4 Tiali goli te Dąų Wali Bomai Po Muani Halobage da, te Jerusalemde te gasa ugwa be me elaluali Te polobadu king Devitgo sę yani ugwa be dao. Tama Devitgo te Dąų Wali Bomai Po Muani Halobage te hanu Kiriat Jearimde selama, tama seselama, te Jerusalem taunba te sel ugwa be ba muagasai dao.
5 Tama me te alta me te Genuai Bidigo ugwa be gesabidi badu me elaluali, te bulu Gibeonde. Te da te brasgo nigai alta dao, te bidi Besalelgo polobadu nigai dao. Besalel te Urigo ogwa dao, tama wąį te Hur dao. Tialima Solomon aga te tigidali we bidi dabe dali te buluba pelama, augwali teba lotu po wagi pali, te Godiba.
6 Tama Solomon aga te brasgo nigai alta pąba dologi pelama, tama Genuai Bidigo gedude agai 1,000 ofa te isigo te hasa dabe sese dela silibo ofa yali, te alta saide.
7 Solomongo te ofa ela silai digi, te hulide God aga bidibo digi aselama, e tiwai po walali, “Nago enabolo mena nai nago wei ebaso da, nago enabolo hanalu wagameo. Tama eno nagebolo mawaibao,” wali.
8 Tama Solomongo Godigo po wei ponoyu, e tiwai po wali, “Nago eno aya Devit godolo mu eyu te aga dali homu kęą pai kolesaga iduai dao, tama nago aga dali wiegi yai sę mu yai dao. Tialima megi da nago ena king pedalama, agai pesage somainu ilai dao.
9 O God, Genuai Bidi, nago enabolo tonalumainu mani te we bidi augwali hauwa mu dao, tama te bidi dabego augwali nedebo usu me egobeo. Tama tialima megi da, eno aya Devit dali nago dąų wali po usu nagasa homu ebao.
10 Tama eno homugo nago enabolo wiegi yai hobolu du dali, wiegi yai kolesaga dali momainao homu ebao. Te tama tilama da, eno te we bidi bugagia tonaluabo usu yaibao. Tialima meni eyu da, teda nago te genuai we bidi hani tonaluabo bidi meni yaibao. Eno deligo eno usu munu me egobeo,” Solomongo te po wai.
11 Tama Godigo Solomongo po wei ponoyu e tiwai po wali, “Nago hanalu wali po wiegi yai mu dao. Nago enabolo mone hauwa hanaluyu, me o genuai nogi sainogo hanalubeo, tama nago enabolo nago boi bidi dabe dolomainogo me hanalubeo. Tama nago enabolo nage tǫde nage bobobage sogo bidaio olama me hanalubeo. Menio. Nago enabolo wiegi yai hobolu du dali, wiegi yai kolesaga dali si hanalu wai dao. Teda nago eno nagebolo tonalumainu mani te we bidi nago wiagila tonalubo usu yaibao.
12 Tama tialima, megi da eno nagebolo te wiegi yai hobolu du dali, me kolesaga dali si nagebolo mawaibao. Tama me eno nagebolo mone hauwa me mayu, te we bidigo nagebolo genuai nogi momainu ilaibao. Tama te tibogo da, te hasia bidali king dabego mone dabe me genuai nogi edelaibao, me te nosali asobo te king dabego mone dabe me genuai nogi dabe edelama mu elaluaibao,” Godigo te po wai.
13 Tama tialima Solomon aga Gibeonde te Godigo sel ugwa be te lotu wabo pesage taga pelama, tama aga Jerusalemba ma pali. Tama aga king Jerusalemde bidiyu, te Israel dabe tonaluali.
King Solomongo ami bidi me doado bage hauwa mu elaluali
(1 Kin 10:26-29)
14 Tigidali sogo Solomongo te karis dabe te hwįabo nai dabe siyu, me te aga ami bidi dabego hos kibu dabe siyu yali. Tama me badu agai te nai dabe te agai tonaluainogo sa muani te hanude dabe tagalali, tama me badu aga dali Jerusalemde bidali. Agai 1,400 hwįbo karis elaluali, me te 12,000 hos kibu me elaluali.
15 Tama te Solomon aga king bidali sogo agai te silva me gol me wiegi yai ni bǫ hauwa mu te Jerusalemba sesali. Tama tialima te sogo silva me gol hauwa mu elaluali, te olo masigi dabe tiwai yali gilama. Me te ni bǫ hauwa mu elaluali, te olo ni dabe te Israel dabego dwasianu bulu du dabede elalua pabo ni dabe yali gilama tama elaluali.
16 Solomon agai aga hos kibu dabe te kantri Musri me kantri Silisiade sali. Agai te bisnis bidi dabe te Silisiaba agai hos dabe abeligi pomainu tagala paliyu yali.
17 Tama te bisnis bidi dabego agai karis dabe hos dabe Musride abeliyu yali. Tama te deli karis abelebo mone te 6,000 kina, me te deli deli hos kibu abelebo mone te 1,500 kina usu nama elaluali. Tama te bisnis bidi dabego te karis me hos dabe te Hit dabe me Siria dabego king dabe pageba sela peyu yali. Tama te king dabego abeliyu yali dao.