King Asago po
14
(Dąį 14–16)
Asa aga Juda dabego king pedelali
1 Te king Abiya isibo si, augwaligo aga king Devitgo taunde pubulali. Tama aga ogwa Asa te king pedelali. Te Asago te kantri Juda tonalubadi boi me hwįsąmadi kibu be nogo si mu pali.
2 Asago wiegi yai doloba pai kolesaga naga te Genuai Bidi aga God gedude yali.
3 Asago te bidi dabego gasa kantri bidi dabego tibo godiba lotu weyu yali te alta sai sela sąyani. Tama me agai te tibo godiba lotu wabo pesage dolama, tama me agai te tibo godigo piksa elalubo masigi pos me togwa sąyu, me agai te god we Aserago piksa elalubo te ni pos gelama tagalali.
4 Tama agai Juda dabebolo augwaligo augwa wąįgo God Genuai Bidigo homu kolesaga wali pabo bomo elama piao po wali, tama agai bomai po tigidali wali peyu, agai po wali piąo po wali.
5 Te Juda bulude tigidali taun dabede agai tigidali tibo godiba lotu wabo pesage sese sela sąnama, tama agai te wiegi yai denami hano holobo ofa ulabo te alta dabe me sese tama dolama tagalali. Agai te kantri bugagia tonalubadi te boi me pedalobeo
6-7 Tialima Asago Juda dabebolo e tiwai po walali, “Dago meba taun bagulabo bomai obo meba elama, tama te obo ugwadu daide bobobage taua be geselinao, te ami bidi dabe tede bidiyu, te boi bidi dabe no bidiyu tonaluabo. Tama me dago hanu sunumi dabe geseliyu, me te sunumi paliabo bomai ain ba geselinao. Megi da, da dena kantride wiagila te bidibao. Magi baso meni. Dago dena God dago Genuai Bidigo homu kolesaga wali bomo elama peyu ebao. Tama tialima, Genuai Bidigo dago kantri bugagia tonaluyu, tama tiyu dwai sęgę dago bulude me pedalobeo,” Asago te po wai. Tama tialima, Asago sę bidi dabe meba tagala palama, tama masigigo nigai bomai obo te meba taun dabe bagulama igi pali, te Juda bulude. Tama augwaligo te sę dabe idubadi, te boi me hwįbeo. Magi baso meni. Genuai Bidigo boi bidi dabego augwaliba hwįagasomainu me sula tagalobeo. Tama tialima Juda dabego te yali sę te wiegi yai mu yali.
8 King Asago ami bidi dabe te Juda hanigo bidi dabe te 300,000; Benjamin hani bidi agai ami tomode bidali bidi te 280,000 ami bidi tama bidali. Te Juda hani bidi dabego da, te ene sesemone dabe me hwįabo awa ni name dabe tolalubo dao. Tama te Benjamin bidi hanigo da, te hwįabo sabele ni name dage dabe me enesigi dabe dali tolalubo dao. Te bidi dabe augwali boma pelama, tama augwali hwįabo wiegi yai bage dao.
Genuai Bidigo Asago Sudan bage aiyaba elalumainu tau sali
9 Te Asa aga te Juda bulude king bidi bidibadi, te Sera te kantri Sudan bidigo aga ami bidi hauwa mu selama, tama kantri Judaba boi hwįainu asali. Te Serago ami bidi dabego namba te 1,000,000 dao, tama hwįabo karis te 300 tama elaluali. Augwali aselama, te taun Maresaba sabolagasali.
10 Augwali polo sabolagasai madi, king Asa aga ami bidi dabe dali hogodama, augwali hwįainu pali. Te Juda dabe augwali te taun Maresa pąba saboligi pali, tama augwaligo te Serago ami bidi dabe augwaligo te odogo malu bulu te augwali nogi Sefata wabo bulude suali. Tama te ami bidi hani si tama dolaluyu boi hwįabo kegaluali.
11 Tama tialima Asago Godibolo i weyu e tama po wali, “Genuai Bidi, nago koneani, eno ami hauwa menio, tama dago bomo menio. Tama te bidigo da ami hani hauwa mu dao. Tiali goli nago te bomo meni yai bidi dabe tau sabo dao, tama augwaligo te bomai bidi dabe aiyaba elalubo dao. Genuai Bidi, nage da te dago God dao. Da tau sao, magi baso meni, dago dena homu nageba megi mubao,” Asago te po wai.
12 Asago gedu haluasa po ola silama, tama aga ami bidi dabe dali augwali Sudan dabe dali boi hwįgi pali. Tama Genuai Bidigo Sudan dabe aiyaba elalubaso, te Sudan dabe augwali wi pali.
13 Tama tialima Asa aga ami bidi dabe dali augwaligo te bage pobeasa pelama, taun Gerarba usu nigi pali, tama ami bidi dabe hauwa mu elama isilali, tama te Sudan ami bidi dabego ma hwįabo usu meni yani. Genuai Bidigo aga ami bidi dabe tau sali, te Juda dabe dao, tama augwaligo augwali mu dolama, tama augwaligo te boide augwaligo nai dabe hauwa mu sali.
14 Tama Genuai Bidigo te taun Gerar augwali wi dwai mu emainu ilali. Tama tialima Asago ami bidi dabego te hanu dua mu sali, te taun dabede nai dabe hauwa mu te bulude elaluali, tama te Asago ami bidi dabego te doado bage hauwa mu selama selasa pali.
15 Tama me te bulude te sipsip kibu me donki kibu tonalubo bidi dabe dali hwįnama tama augwaligo sipsip kibu me donki hauwa selama, tama augwa Jerusalemba selasa pali.