Te Godigo te Israel dabede yali kolesagade Polgo po wali
9
(Dąį 9–11)
Polgo Israel dabe augwalide homu sęgę mu yali po wai
1 Ena Kraisde wadolai bidi bidibaso, tama eno megi wabo po te mu po naga waibao, tibo po wagobeo. Tama Godigo Tedali Mobo Bidigo te eno yabo kolesaga dagalobo homu tonaluyu, tama agai eno po me tau selama tama eno mu po naga obao.
2 E tiwai dao, eno homu sęgę mu elama tama sesemane sogo ena dwai dene ebo dao. Magi baso meni, te eno hani Juda bage augwali meba hauwago Krais tudiba muanio.
3 Eno homugo te Godigo eno ama dede augwali ma dobola somainogo ebo homu godolo ebao, augwali ena dali deli kaneme elalubao. Tama te tų elalugi sogo da, augwali tobade te eno Kraisba gedu haluasa po olama agai ena i ola mayu tama sela sąnama tama ena hagamainogo elama tama augwali tau somainogo hasegeligi da. Eno te homu bomonama ebo dao.
4 Augwali da, te Abraham aga ogwago ogwa Jekop aga hani dao, tama Godigo augwali aga wai dabe nogi poali. Tama tiyu aga agai ula yai bomo augwali dali bidagasidu geai dao, te bidi meni yai kemi tǫ bulude. Aga digi agai dąų wali po augwalibolo madu geai. Godigo agai bomai po me augwalibolo mani. Tama agai te augwaligo agabolo lotu po wabo kolesaga te agai ola mani. Tama agai aga sa muani bidi Krais nosali augwaligo hanidu pedalaibao po augwali dali dąų walali.
5 Augwaligo wąį mu Abraham dali, Aisak dali, te Jekop dali, augwali polobadu bidiyu te genuai nogi sai bidi dabe hasia bidali, tama augwali te augwa bulai wai dabe naga bidai. Tama Krais aga e tǫba dulama tama da bidi tiwai tigi sali sogo, agai te Juda hanide naga te bidi mu pedalali. Aga te tigidali nai tobolu bidi bidibao. Aga te God dao, te aga nogi dago sesemane bidada pabo sogo ugwaba sinao. Mu dao.
6 Te eno hani Juda bage augwali hauwago Krais tudiba muai goli, te Godigo polobadu dąų wali po te olo hagabo tiwai me egobeo. Menio. E tiwai dao, te Jekop aga nogi me Israel, te bidi aga hanide pedalali bidi augwali tigidali te Godigo hagea sali Israel dabe mu me ebo meni.
7 Tama dago e tiwai po me olamuo, “Augwali te Abrahamgo kanemede pedalama, tama tigidali augwali te aga wai dabe mu bidibao,” te wagio. Menio. Polobadu Godigo e tiwai po Abrahambolo wai dao, “Te nago hani bidi nogi nosali nedada pabo si, te Aisakgo hani augwali naga nedada paibao.”
8 Te po page e dao, te Godigo gedude te tigigo ebo kolesagade naga pedalali wai dabe augwali te Godigo wai dabe me egobeo. Menio. Te Godigo Abraham dali dąų wali pode ame nani wai dabe, te augwali Abrahamgo hanide nogi elaluai dao.
9 Tama te kolesagade homu paliyu, Godigo te dąų wali po e tiwai hasia polobadu te Abrahambolo wai, “Te eno te bodolu mani sogo ena ma asaibao, tama nago we Sarago te wai ogwa ame naibao,” te po wai.
10 Tama Godigo te naga me ebeo. Te Sarago ogwa Aisak ame nenama, tama genuai elama, tama agai aga we Rebeka sali. Tama Rebekago tabi elama tama te wai si deli sogo elaluali. Tama te wai sigo aya deli naga, te Aisak, da Juda dabego wąį monu dao.
11-12 Tiali goli, Godigo homude bidi sa muabo kolesaga yalio. Agai te bidigo sę ebode homu me ebeo. Aga digi aga homu naga wali peyu, te bidi i olama tama aga sa muaibao. Tama te wai si Jekop dali, Iso dali, augwali si ame nesiąbadi, tama augwaligo te wiegi yai kolesaga ma te dwai kolesaga me isąbadi, Godigo Rebekabolo te aga tamadi ame nabo wai side te po wai, “Te nago ogwa si deli sogo ame nenama, tama nosali te gomunai bidi te i badu bidi dologode bidaibao,” te po wai.
13 Tama te tiwai naga pedalali, te Godigo po pusali bidi nogi Malakai agai nosali asęani Godigo wali po tiwai gilama yalio, “Eno Jekopde dwagi yai homu eyu godolo mu yali, tiali goli eno Iso hagela homu mu yali,” Godigo te po wai.
14 Tama tibaso, dago te sęde magi po waibawe? “Godigo aga homu wali peyu, te bidi deli naga sa mubaso, agai te dolo me isąwai kolesaga yalio,” te dago te tiwai po omainogo yagawe? Mu menio.
15 Magi baso meni. Godigo e tiwai po Mosesbolo polobadu wai, “Te ena digi eno bidi me delibolo te olo tau siyu mabo wiegi yai kolesaga yabo homu ebaso da, teda eno homu naga wali peyu, eno olo mabo wiegi yai kolesaga agabolo yaibao. Te eno bidi me deli homu dene yainogo da, teda eno homu naga wali peyu, aga eno homu dene ebo dao,” Godigo te po wai.
16 Tama te po obaso, dago koneani, te Godigo bidi sa mubo page, te bidigo homugo me te aga sę denego me ebaso Godigo aga sa mugobeo. Menio. Te Godigo te bidide homu dene eyu, olo tau siyu mabo wiegi yai kolesagago naga te bidi sa mubo dao.
17 Tama Mosesgo te bukude asęani Godigo e tiwai po te Isip tǫ tuni bidibolo wali, “Eno bomo tigidali bidibolo ola mawaio wali, te augwaligo eno nogi te tigidali tǫba sela pelama pusugi pomainogo obao. Tede naga eno nage hodolama, tama tuni bidi nigilama, tama eno te nage dali hwįbo dao,” Godigo te wali po asęani.
18 Tama tibaso dago koneani, te Godigo aga homu naga wali peyu te olo tau siyu mabo wiegi yai kolesaga te bidi me delibolo yainogo da, teda agai te olo mabo wiegi yai kolesaga te agabolo yaibao. Me ma, te bidi me deli agai te po odosiąbo bidi ilainogo homu eyu da, teda agai te bidi te po odosiąbo bidi ilibo dao.
Godigo sębę dali te Godigo wiegi yai kolesaga ola mabo po dali wai
19 Tiali goli, bidi mego enabolo e tiwai po wagi da homu yali da, “Te Godigo aga homu naga wali peyu, tama bidi me deli sa munama tama gasa bidi meni. Tama tiyu da, teda magi baso agai te bidigo dwai kolesaga ebo po me odubadi geaibawe? Dego te Godigo ebo homu kolesaga gisilainogo usu egowe? Bidi menio.”
20 Bidi me deligo te tiwai po hanalu weyu da, teda eno te po wei ponoyu te po waibao, “Abagi, nage de da weyu, tama nago te po Godibolo ela palamuo. Ma te mama tǫgo nigali senego te aga nigali bidigo geda muani homu eyu, tama te bidibolo te po wai, ‘Magi baso nago ena te tiwai nigali’ po waibawe? Menio.
21 Te sene nigibo bidigo te agai mama tǫ pedai me deli selama, tama te tǫgo te sene si nigali, me deli te wiegi yai sę yabo sene te wiegi yai nigali, tama me deli te olo sę yabo dwai sene nigai. Aga homu naga wali peyu, tama te tiwai ebaso da, te usu da, po meni, te aga sę dao.”
22 Te Godigo me te tiwai yai. Agai te aga sębę homu ebo te bidi dabebolo hania hanilabo homu yali, te tigidali bidigo agai bomo me konemainogo yai. Tama te dwai sę yali dene sabo we bidi augwali dolabo sę te sisi yai elalubo, tiali goli agai augwali gogolama polo elebeo, tama bobage sogo tonaluali.
23 Magi baso meni, agai homugo te agai homu dene eyu tau sabo sa muani we bidi augwalibolo mabo wiegi wiegi yai ula yai bomo, te bomo augwali ola momainogo agai bobage sogo tonaluali. Augwali agai polobadu hagea sai dao, tama agai bomo yai ula augwaligo saibao.
24 Te da dao. Agai da i wali, te da Juda hani naga i me wabe, menio, te gasa hani dabe dali me i walio.
25 Te Godigo aga homu naga wali peyu, te we bidi meba naga hagea sabo kolesagade te polobadu Godigo po pusali bidi Hoseago asęani pode Godigo wali po me te e tiwai po asęani,
“Te eno hani isąwai we bidi hani, te augwali eno
hani nogi poaibao. Tama te eno augwalide dwagi
yai homu eyu godolo isąwai hani, te hani eno ‘Te
eno godolo mu ebo hani’ nogi poaibao.
26 ‘Dage eno hani meni,’ tama eno te po wali
madi, te bulude naga te eno augwali nogi olama, ‘Te
bidabo ula elalubo Godigo wai da’ po waibao,”
Godigo te po olama, tama Hoseago asęani.
27 Tama te gasa polobadu Godigo po pusali bidi Aisaiago te Israel hanide po olama tama te tiwai i wali, “Tama te Israel dabe augwaligo hani nedebo namba te ąį sanede elalubo masigi kemi tiwai pedalubaso da, tagalao, teda Godigo augwali meba naga dią selama, tama dwasianu hani naga ma dobola saibao.
28 Magi baso meni. Genuai Bidigo po tų silibo si tama te po polo togwa sąnama tama te tǫde we bidi augwalibolo te dene wei ponaibao,” Aisaiago te po wai.
29 Tama polobadu Aisaiago te po olama po wai tiwai. Agai te po wai, “Te tigidali bomo elalubo Genuai Bidi agai te dago dwasianu hani bidimainogo egi menigi sogo da, teda da mu doloyu, te bulu si nogi Sodom dali Gomora dali si tiwai pedalama, tama da mu dolai bidigi dao.” Aisaiago te po asęani.
Te Israel dabe augwaligo Kraisde konealubo po dąų mu olama, te doloba pai we bidi pedelabo homu elama konealubo po dąų wabe
30 Tama tibaso dago koneani, te gasa hani dabe augwaligo te doloba pai bidi nogi sabo sę dene me ebe, tiali goli augwaligo te doloba pai bidi nogi salio. Te e doloba pai kolesaga te augwaligo konealubo po dąų olama sai.
31 Me ma, te Israel dabe augwali da, te Godigo augwalibolo doloba pai bidi nogi pomainogo eyu, tama augwali te bomai po bugagia wali pabo tų gegali goli, te tų augwaligo subeo, te augwali te bomai pogo usu niba kadu wabeo.
32 Augwali te Godigo gedude te doloba pai we bidi magi baso pedalebewe? Augwaligo te Kraisgo yali sęde te konealubo po dąų wasiąyu, tama augwaligo te Godigo te doloba pai bidi nogi poaibao homu eyu yali. Te po digi po begelama te tiwai yali, te sągąde dolobo masigigo te augwaligo sągąde dolama tama augwali tulaluai dao.
33 Te tiwai po me deli te Godigo po bukude polobadu asęani, te po e tama wai,
“Odao. Te Saion hanude eno te bidi sągą dani tuą
palama tulaluabo masigi me deli mubao. Eno te
bidi me deli tede mubao, tama we bidi augwaligo
aga dali dwai homu yaibao, te augwali dani tuą
palama tulaluabo masigi tiwai dao. Tama tiali goli
we bidigo agaba konealubo po dąų wabo bage, agai
augwali tau mu sabo usu mu yaibao, te augwali
tulaluama hale me sogobeo,”
te po asęani.